പഴവർഗങ്ങൾ

വീടിനോട് ചേർന്ന് സ്ഥലപരിമിതിയുള്ളവർക്ക് പച്ചക്കറിക്ക് സ്ഥലം കണ്ടെത്തുക ബുദ്ധിമുട്ടാണ്. ഉള്ള സ്ഥലം മുഴുവൻ ഫലവൃക്ഷങ്ങളുടേയും മറ്റും തണലിലാണെങ്കിലും അവിടെ പച്ചക്കറികൾ വിജയകരമായി നടത്താൻ പ്രയാസമുണ്ട്. ഇത്തരം സാഹചര്യങ്ങളിലാണ് വീടിന്റെ ടെറസ്സിൽ പച്ചക്കറി കൃഷി ചെയ്യുന്നതിനെ കുറിച്ചു ആലോചിക്കേണ്ടിവരുന്നത്.
നല്ല വെയിൽ ലഭിക്കുന്നതിനാൽ ടെറസ് പച്ചക്കറി കൃഷിക്ക് അനുയോജ്യമാണ്. പൂർണ്ണമായും ജൈവ കൃഷിയാണ് ടെറസിൽ അനുവർത്തിക്കണ്ടത്. ഇത്തരം കൃഷിയിൽ
പ്ലാസ്റ്റിക്ക്ചാക്കുകളോ ചട്ടികളോ ഗ്രോ ബാഗുകളോ ആണ് നല്ലത്.

ചട്ടിയാണെങ്കിൽ ഏറ്റവും കുറഞ്ഞത് ഒരടി വലിപ്പമുള്ളതാവണം. ചാക്കുകളിൽ മിശ്രിതം നിറക്കുമ്പോൾ അതിന്റെ രണ്ടു മൂലകളും ഉള്ളിലേക്ക് തള്ളിവെച്ചാൽ ചുവട് വൃത്താകൃതിയിലായിചമറിഞ്ഞു വീഴാതിരിക്കും.
പുറത്ത് നിന്നു വാങ്ങുന്ന ഗ്രോ ബാഗ് ആണെങ്കിൽ 40 സെ.മീ x 24 സെ.മീ x 24 സെ.മീ വലുപ്പമുള്ളതും 150 മൈക്രോൺ , 600 ഗേജ് യുവി ഷീറ്റ് കൊണ്ടുണ്ടാക്കിയതാണ് സൗകര്യവും ഈട് നിൽക്കുന്നതും.
പോട്ടിങ് മിശ്രിതം വിവിധ തരത്തിൽ തയ്യാറാക്കാം.
മേൽമണ്ണ്, മണൽ, ചാണകപ്പൊടി, എന്നിവ 2:1:1 എന്ന അനുപാതത്തിലാകാം. ഉലർച്ചയില്ലാത്ത കട്ടയാകുന്ന മണ്ണാണെങ്കിൽ മിശ്രിതത്തിൽ മണൽ നിർബന്ധമാണ് . മിശ്രിതത്തിന് ഇളക്കം കിട്ടാനാണിത്. മണലിന് പകരം ചകിരിച്ചോറ് ചേർത്താലും മതി. ചാണകപ്പൊടിക്ക് പകരം മണ്ണിര കംബോ സ്റ്റോ മറ്റു കംബോസ്റ്റ് വളങ്ങളോ ആവാം.
ഇങ്ങനെ തയ്യാറാക്കിയ പോട്ടിങ്ങ് മിശ്രിതത്തെ കുറച്ചു കൂടി മികച്ചതാക്കാൻ 100 കി.ഗ്രാം നടീൽ മിശ്രിതത്തിലേക്ക് മൂന്നു കി.ഗ്രാം പൊടിച്ച വേപ്പിൻപിണ്ണാക്ക് , ഒരു കി.ഗ്രാം എല്ലു പൊടി , ഒരു കി.ഗ്രാം ട്രൈക്കോഡെർമ എന്നിവ ചേർത്ത് സമ്പുഷ്ടമാക്കാം.
നടീൽ മിശ്രിതം നിറക്കുന്നതിന് മുമ്പ് ബാഗിന് / ചട്ടിക്ക് ജലവാർച്ചക്ക് സുഷിരങ്ങളുണ്ടെന്ന് ഉറപ്പാക്കണം.
ഗ്രോ ബാഗിന്റെ ഏറ്റവും താഴെ ചകിരിയോ ചരലോ രണ്ടിഞ്ച് കനത്തിൽ നിരത്തണം. അതിനു ശേഷം അറപതു ശതമാനം മാത്രം നടീൽ മിശ്രിതം നിറക്കുക. ബാക്കി മുപ്പതാം ദിവസവും നാൽപ്പത്തി അഞ്ചാം ദിവസവുമാണ് നിറക്കേണ്ടത്. പരമാവധി ബാഗിന്റെ / ചട്ടിയുടെ എൺപതു ശതമാനം വരെ മാത്രമേ നടീൽ മിശ്രിതം നിറക്കാവൂ.
ടെറസ്സിൽ കൈവരിയോട് ചേർത്തും അടിയിൽ ചുവര് വരുന്ന ഭാഗത്തിന് മുകളിലായും വരിയായി ചട്ടികളോ ബാഗുകളോ വെക്കാം. നടുക്കുള്ള സ്ഥലം ഒഴിച്ചിട്ടിരിക്കണം. രണ്ടോ മൂന്നോ ഇഷ്ടിക അടുക്കി അതിനു മുകളിൽ ഇവ വെക്കുന്നതാണ് നല്ലത്.

ടെറസ്സിന് ചുറ്റുമുള്ള അരമതിലിനോട് ചേർന്ന് ഉദേശം മുക്കാൽ മീറ്റർ വീതിയുള്ള തടങ്ങളാക്കി അതിൽ നടീൽ മിശ്രിതം നിശ്ചിത അളവിൽ ഇട്ടും പച്ചക്കറി കൃഷി ചെയ്യാവുന്നതാണ് . തയ്യാറാക്കിയ മിശ്രിതം ഏറ്റവും കുറഞ്ഞത് 25 സെ.മീറ്റർ ഉയരത്തിൽ ഇടണം. ഇത് 30 സെ.മീറ്റർ ആയാലും കുഴപ്പമില്ല. ടെറസ്സിന് മുകളിൽ അമിതഭാരം കയറ്റേണ്ട എന്നത് കൊണ്ടാണ് ഏറ്റവും കുറഞ്ഞ ഭാരം നിർദ്ദേശിക്കുന്നത്. മിശ്രിതം കൊണ്ടുണ്ടാക്കിയ തടങ്ങൾക്ക് ചുറ്റും ഇഷ്ടിക നിരത്തി അതിരു പിടിപ്പിച്ചാൽ മണ്ണ് ഒലിച്ചു പോകാതെയിരിക്കും. ഉണങ്ങിയ തേങ്ങയുടെ തൊണ്ടുകൾ ഒന്നിന് മേൽ മറ്റൊന്നായി കമിഴ്ത്തിയും ആവശ്യന് ഉയരത്തിലുള്ള അതിരുണ്ടാക്കാം. മണ്ണ് ഒലിച്ചിറങ്ങാതിരിക്കുകയെന്നതാണ് ഇത് കൊണ്ട് ഉദ്ദേശിക്കുന്നത്. തൊണ്ട് ഉപയോഗിക്കുന്നത് കൊണ്ട് ടെറസ്സിലെ ഭാരം കുറക്കാൻ കഴിയുമെന്ന് മാത്രമല്ല അത് ജലാംശം പിടിച്ചു വെക്കുന്നതിനാൽ തടത്തിൽ എപ്പോഴും ഈർപ്പം നിലനിൽക്കുന്നതിനും സഹായകമാകും.

ടെറസ് കൃഷിയിൽ താങ്ങും പടരാനുള്ള സൗകര്യവുമേർപ്പെടുത്താനാവുമെങ്കിൽ പടരുന്ന പച്ചക്കറികൾ ഉൾപ്പെടെ മിക്കവാറും എല്ലായിനം പച്ചക്കറികളും വളർത്താം. മഴ മറ സ്ഥാപിച്ചിട്ടുള്ള ടെറസുകളിൽ പൊളവെ പച്ചക്കറി എല്ലാക്കാലത്തും നടാം. എന്നാൽ കാബേജ്, കോളിഫ്ളവർ, കാരറ്റ്, റാഡിഷ്, ബീറ്റ്റൂട്ട് എന്നിവ സപ്തംബർ-ഒക്ടോബർ മാസങ്ങളിൽ തുടങ്ങുന്നതാണ് നല്ലത്.
മഴ മറ സൗകര്യങ്ങളില്ലാത്ത സ്ഥലങ്ങളിൽ വെണ്ട, വഴുതന, വള്ളിപ്പയർ, കുറ്റിപ്പയർ എന്നിവ മെയ് – ജൂൺ മാസങ്ങളിലും, ഒക്ടോബർ-നവംബർ മാസങ്ങളിലും, പാവൽ, പടവലം, വെള്ളരി, മത്തൻ, കുമ്പളം, തണ്ണിമത്തൻ എന്നിവ ജനുവരി – മാർച്ച് മാസങ്ങളിലും, മെയ് ജൂൺ മാസങ്ങളിലും തക്കാളി സപ്തംബർ-ഒക്ടോബർ മാസത്തിലും, കാബേജ്, കോളിഫ്ളവർ, കാരറ്റ്, റാഡിഷ്, ബീറ്റ്റൂട്ട് എന്നിവ സപ്തംബർ-ഒക്ടോബർ മാസങ്ങളിലും ആരംഭിക്കാം.
ചട്ടിയിലോ ഗ്രോ ബാഗിലോ തടങ്ങളിലോ മിശ്രിതം നിറച്ച് പത്ത് ദിവസം കഴിഞ്ഞ് വിത്ത് പാകുകയോ തൈകൾ നടുകയോ ചെയ്യാം.
വിത്ത് നടുമ്പോൾ ഓരോ വിത്തിന്റേയും വലുപ്പം അനുസരിച്ച് അത്രയും കനത്തിൽ തന്നെ വിത്തിന്റെ മുകളിൽ മണ്ണ് വരുന്ന വിധത്തിൽ നടുന്നതാണ് നല്ലത്.
പറിച്ചുനടുന്ന തൈകൾ നാലില പ്രായത്തിൽ നടാവുന്നതാണ്. വിസ്താരമേറിയ ചാക്കുകളിൽ രണ്ടു തൈകളെ വളർത്താവുന്നതാണ്.
ബാഗുകൾ /ചട്ടികൾ തമ്മിൽ ചുരുങ്ങിയത് 60 സെ.മീറ്റർ അകലം നൽകണം.
ചെടി നട്ടാൽ രണ്ട് – മൂന്ന് ദിവസം നേരിട്ട് മഴയും വെയിലും ഏൽക്കാതെ സംരക്ഷിക്കണം
ബാഗിന്റെ / ചട്ടിയുടെ വലുപ്പമനുസരിച്ച് രണ്ട് – മൂന്ന് സ്പൂൺ കുമ്മായം ഇട്ടു കൊടുക്കാം. ഇത് മാസത്തിലൊരിക്കൽ ആവർത്തിക്കണം.
പച്ചക്കറികൾക്ക് ദിവസവും നന വേണം. കഴിയുമെങ്കിൽ രണ്ടുനേരം നനക്കണം . രാവിലെയും വൈകുന്നേരവും . ചാക്കിലായാലും ചട്ടിയിലായാലും തടത്തിലായാലും വെള്ളം വളരെ കുറച്ചു മാത്രം മതി. ചെടി വാടരുത് എന്നാൽ വെള്ളമൊട്ടു നഷ്ടപ്പെടുകയുമരുത്.

ടെറസ് കൃഷി പൂർണ്ണമായും ജൈവ കൃഷിയാണ്. ചാരം, ചാണകപ്പൊടി, മണ്ണിര കംബോസ്റ്റ് , വേപ്പിൻപിണ്ണാക്ക്, കടലപിണ്ണാക്ക്, എല്ലുപൊടി, ഫിഷ്മീൽ ഇങ്ങനെ ഏത് ജൈവവളവുമാകാം. ഇവ ചെറിയ അളവിൽ മാത്രം ആഴ്ച തോറും നൽകാം. വീട്ടിൽ തയ്യാറാക്കുന്ന ഫിഷ് അമിനോ ആസിഡ്, എഗ്ഗ് അമിനോ ആസിഡ് എന്നിവയും ഉപയോഗിക്കാം. പുളിപ്പിച്ച ജൈവ വളക്കൂട്ടുമെല്ലാം ചെടികളുടെ ആരോഗ്യകരമായ വളർച്ചക്ക് ഉപകരിക്കും.
ഗോമൂത്രം, വെർമി വാഷ് എന്നിവയിലൊന്ന് എട്ടിരട്ടി വെള്ളം ചേർത്ത് ചെടിയുടെ ചുവട്ടിലും പുഷ്പിക്കുന്നതുവരെ പത്രപോഷണവും നടത്താവുന്നതാണ്.

ടെറസ് കൃഷിയിൽ രാവിലേയും വൈകുന്നേരവും കുറച്ച് സമയം ചെലവിടാൻ കഴിയണം. കീടങ്ങളെ കണ്ടെത്തി നശിപ്പിക്കുകയാണ് നല്ലത്. രാവിലെ തണുപ്പുള്ള അന്തരീക്ഷത്തിൽ ചില കീടങ്ങൾ ഇലകളുടെ പുറത്ത് വന്നിരുന്ന് കാർന്നു തിന്നാറുണ്ട്. ഈ സമയത്ത് ഇവയെ കണ്ടെത്തി നശിപ്പിക്കുവാൻ എളുപ്പമാണ്.
കീട-രോഗ ബാധകൾ കാണുന്ന ഭാഗങ്ങൾ ചെടിയിൽ നിന്നും നീക്കം ചെയ്യുന്നത് ഇത് കൂടുതൽ വ്യാപിക്കാതിരിക്കാൻ സഹായകമാകും.
കീടബാധ രൂക്ഷകരമാണെങ്കിൽ അസാഡിറാക്ടിൻ മാതിരി യുളള വേപ്പധിഷ്ഠിത കീടനാശിനി ഒരു ലിറ്റർ വെള്ളത്തിൽ രണ്ടു മില്ലി എന്ന തോതിൽ ആവശ്യത്തിന് ലായനി തയ്യാറാക്കി തളിക്കാവുന്നതാണ്.
കീട നിയന്ത്രണത്തിന് ബ്യൂവേറിയ , മെറ്റാറൈസിയം എന്നിവയും ഉപയോഗിക്കാം.
സ്യൂഡോമോണസ്, ട്രൈക്കോഡർമ എന്നിവയുടെ ഉപയോഗം ഒരു പരിധിവരെ രോഗങ്ങളിൽ നിന്ന് ചെടികളെ സംരക്ഷിക്കും.

എം കെ പി മാവിലായി

കേരളത്തിലെ സാംസ്ക്കാരിക, വൈകാരിക മണ്ഡലങ്ങളിൽ ഏറെ സ്വാധീനം ചെലുത്തുന്ന ഒരു കാർഷിക വിളയാണ് വാഴ. പഴത്തിൽ നിന്നും മറ്റും നിർമ്മിക്കുന്ന മൂല്യാധിഷ്ഠിത ഉൽപ്പന്നങ്ങൾ മുതൽ വാഴനാരുകൾ കൊണ്ടുണ്ടാക്കുന്ന കരകൗശല വസ്തുക്കൾ, തുണിത്തരങ്ങൾ വരെ എത്തി നിൽക്കുന്നു വിപണിയുടെ നേട്ടങ്ങൾ .
വാഴപ്പഴത്തിൽ നിന്നും സ്വാദും പോഷക സമൃദ്ധവുമായ നിരവധി മൂല്യവർധിത വിഭവങ്ങൾ തയ്യാറാക്കുവാനുളള പരമ്പരാഗതമായ അറിവുകളും, ഗവേഷണ കേന്ദ്രങ്ങൾ ഉരുത്തിരിച്ചെടുത്തിട്ടുള്ള അറിവുകളും നമുക്ക് വഴി കാട്ടിയായിട്ടുണ്ട്.
ഇതിൽ വാണിജ്യ പ്രാധാന്യമേറിയ ഏതാനും ഉൽപ്പന്നങ്ങളെ പരിചയപ്പെടാം.

നേന്ത്രപ്പഴം ജാം.

അധികം പഴുക്കാത്ത നേന്ത്രപ്പഴം തൊലി കളഞ്ഞ് വട്ടത്തിൽ അരിഞ്ഞത് ഒരു കി.ഗ്രാം, ഗ്രാമ്പൂ 12 എണ്ണം , കറുവപ്പട്ട ഒരിഞ്ച് നീളത്തിൽ 4 കഷണം, ഓറഞ്ച് നീര് അല്ലെങ്കിൽ പഴുത്ത കൈതച്ചക്ക പുഴുങ്ങിയെടുത്ത ചാറ് 6 കപ്പ്, പഞ്ചസാര 9 കപ്പ്, സിട്രിക്കാസിഡ് ഒരു ടീസ്പൂൺ എന്നീ തോതിലാണ് ചേരുവകൾ എടുക്കേണ്ടത്.

ഇതിൽ ആദ്യം കാണിച്ച കറുവപ്പട്ട വരെയുളള ചേരുവകൾ എടുത്ത്
എടുത്ത് അവ നിറക്കാൻ മാത്രം വെള്ളം ഒഴിച്ച് വേവിച്ച് ഞെരടിപിഴിഞ്ഞ് തുണിയിൽ അരിച്ചെടുക്കണം. ഇത് പിഴിഞ്ഞെടുക്കുമ്പോൾ പത്ത് കപ്പ് കാണും. ഇതിന്റെ കൂടെ ഓറഞ്ച് അല്ലെങ്കിൽ ഈ പഴച്ചാറിൽ സിട്രിക്കാസിഡും , പഞ്ചസാരയും ചേർക്കുക.

ജാം ചെറുപഴം ഉപയോഗിച്ച്

പൂവൻ, കർപ്പൂരവള്ളി, പാളയംകോടൻ അഥവാ മൈസൂർ തുടങ്ങിയ ചെറുപഴങ്ങൾ ഉപയോഗിക്കാം.

രണ്ട് കി.ഗ്രാം പഴുത്ത പഴം,600 ഗ്രാം പഞ്ചസാര, 4 ടീസ്പൂൺ നാരങ്ങ നീര്, 10 ഗ്രാമ്പൂ എന്നിവയാണ് ചേരുവകൾ.

പഴങ്ങൾ മൂന്ന് – നാല് കഷണങ്ങളാക്കി മുറിക്കുക. കഷണങ്ങൾ മൂടാൻ പാകത്തിൽ വെള്ളമൊഴിച്ച് 10 മിനുട്ട് പ്രഷർ കുക്കറിൽ വേവിക്കുക. തണുക്കുമ്പോൾ കനം കുറഞ്ഞ ഒരു തുണി കൊണ്ട് അരിക്കുക. അവശിഷ്ടം നീക്കി വേർതിരിച്ച ലായനി ഒരു പാത്രത്തിലേക്ക് മാറ്റുക. ഇതിലേക്ക് പഞ്ചസാര, നാരങ്ങ നീര് , ഗ്രാമ്പൂ എന്നിവ ചേർത്ത് ചെറു തീയിൽ വേവിക്കുക. ഇളക്കുകയും വേണം. പാകം ചെയ്യുന്നതിനനുസരിച്ച് ക്രമേണ ലായനിയുടെ നിറം ചുവപ്പായി മാറും. ലായനി കട്ടിയാകുന്നതുവരെ ഇത് തുടരണം. ജാമിന്റെ പരുവമാകുമ്പോൾ തീയിൽ നിന്നും മാറ്റുക. തണുക്കുമ്പോൾ വീണ്ടും കട്ടിയാകും. വൃത്തിയാക്കിയ കുപ്പിയിൽ ജാം നിറക്കാം. ഇത് മാസങ്ങളോളം കേട് കൂടാതിരിക്കും.

വൈൻ

പാളയംകോടൻ അഥവാ മൈസൂർ പഴം 10 എണ്ണം , പഞ്ചസാര മുക്കാൽ കി.ഗ്രാം , യീസ്റ്റ് ഒരു ടേബിൾസ്പൂൺ, തിളപ്പിച്ചാറ്റിയ വെള്ളം രണ്ടു കുപ്പി എന്നിവയാണ് വൈൻ തയ്യാറാക്കുവാൻ ആവശ്യമായത്.
പഴം തൊലി കളഞ്ഞ് സ്റ്റീൽ കത്തികൊണ്ടരിഞ്ഞ് ചേരുവകളെല്ലാം കൂട്ടി ചേർത്ത് ഒരു ഭരണിയിലാക്കി പത്ത് ദിവസത്തോളം വെക്കണം. ദിവസം ഒരു പ്രാവശ്യം ഭരണി അനക്കണം. ഒരു കപ്പ് പഞ്ചസാര കരിച്ച് ഒടുവിൽ ചേർത്താൽ ആകർഷകനിറം കിട്ടും. വൈൻ ഊറ്റിയെടുത്ത് കുപ്പിയിലാക്കാം.

ബനാന ബട്ടർ

വാഴപ്പഴം നന്നായി ഉടച്ചെടുത്തത് മൂന്ന് കപ്പ്, നാരങ്ങ നീര് കാൽ കപ്പ് , ചെറിപ്പഴം അരിഞ്ഞത് കാൽ കപ്പ്, ഉണക്കമുന്തിരി ചെറുതായി അരിഞ്ഞത് കാൽ കപ്പ് , പഞ്ചസാര ആറര കപ്പ്, കറുവപ്പട്ട പൊടിച്ചത് അര ടീസ്പൂൺ, ജാതിക്ക പൊടിച്ചത് കാൽ ടീസ്പൂൺ , ലിക്വിഡ് പെക്ടിൻ ഒരു ബോട്ടിൽ (6 ഔൺസ്) എന്നിവയാണ് ബട്ടർ തയ്യാറാക്കാൻ ആവശ്യമായ ചേരുവകൾ.
ഒരു വലിയ സോസ്പാൻ എടുത്ത് മേൽ കാണിച്ച ചേരുവകളിൽ പെക്ടിൻ ഒഴികെ മറ്റുള്ളവ ഇളക്കി യോജിപ്പിച്ചിച്ച് ഒരു മിനുട്ടു സമയം തിളപ്പിക്കുക. അടുപ്പിൽ നിന്നും വാങ്ങി പെട്ടെന്നു തന്നെ ലിക്വിഡ് പെക്ടിൻ ഇതിലേക്ക് ചേർത്തിളക്കുക. ഇത് അവിമുക്തമാക്കിയ ജാറിൽ ഒഴിച്ച് സീൽ ചെയ്യുക.

നേന്ത്രക്കായ ചിപ്സ്

നേന്ത്രക്കായ് ആണ് പ്രധാനമായും ചിപ്സ് അഥവാ ഉപ്പേരി ഉണ്ടാക്കുവാൻ ഉപയോഗിക്കുന്നത്.
പാകമായ നേന്ത്രക്കായുടെ തൊലി കീറിമാറ്റി മഞ്ഞൾപ്പൊടി കലർത്തിയ വെള്ളത്തിൽ ഇട്ടു വയ്ക്കുന്നു. ഉപ്പേരിക്ക് മഞ്ഞനിറം കിട്ടാനും കായുടെ കറ നീക്കാനുമാണിങ്ങനെ ചെയ്യുന്നത്. ഇതിന് ശേഷം ഇവ നേർത്ത കഷണങ്ങളായി വട്ടത്തിൽ അരിഞ്ഞ് വെളിച്ചെണ്ണയിൽ വറുത്ത് കോരുന്നു. കോരിയെടുക്കുന്നതിന് മുൻപ് പാകത്തിന് ഉപ്പുവെള്ളവും തളിക്കും.
മൂന്ന് നേന്ത്രക്കായ്ക്ക് ഒരു ടീസ്പൂൺ മഞ്ഞൾപ്പൊടി, അരടീസ്പൂൺ ഉപ്പ് എന്നീ തോതിൽ ആവശ്യമായി വരും.
വറുത്തുപ്പേരി വൃത്തിയുള്ള പോളിത്തീൻ സഞ്ചികളിലാക്കിയാണ് വിൽപ്പനക്കൊരുക്കുന്നത്.

വാഴപ്പഴം ഹൽവ

വാഴപ്പഴം 6 എണ്ണം, പഞ്ചസാരപ്പാനി 2 കപ്പ്, നെയ്യ് 12 ടി സ്പൂൺ , ഏലക്ക 4 എണ്ണം എന്നീ തോതിൽ ചേരുവകൾ വേണം.
വാഴപ്പഴം ചെറു കഷ്ണങ്ങളായി മുറിക്കുക. പഞ്ചസാര പാനി ചേർത്ത് വേവിക്കുക. കുഴമ്പുപരുവമാകുമ്പോൾ നെയ്യ് ചേർക്കുക. നെയ്യ് നന്നായി തെളിഞ്ഞു വരുമ്പോൾ , അതായത് ഒട്ടിപ്പിടിക്കാത്ത പരുവം ഏലക്കാപ്പൊടി ചേർക്കുക. നെയ്യ് തടവിയ ഒരു പാത്രത്തിലേക്ക് ഒഴിച്ചു വച്ചു തണുക്കുവാൻ വെക്കുക. ഒരു മണിക്കൂറിന് ശേഷം കഷണങ്ങളായി മുറിച്ച് ഉപയോഗിക്കാം.

ശർക്കര ഉപ്പേരി

പച്ച നേന്ത്രക്കായ് തൊലി കളഞ്ഞ് കനത്തിൽ അരിഞ്ഞതും ശർക്കരയും വെല്ലം) വെളിച്ചെണ്ണയും ജീരകവും ഏലക്കായുമാണ് ചേരുവകൾ. നേന്ത്രക്കായ് വൃത്തിയായി കഴുകി വെളിച്ചെണ്ണയിൽ വറുത്തെടുക്കണം. തുടർന്നു വെല്ലം അഥവാ ശർക്കര ഉരുക്കി കട്ടിപ്പരുവമാകുമ്പോൾ ജീരകപ്പൊടിയും ഏലക്കായയും വറുത്ത കോരിയ കായയും ഇളക്കുക. ചൂടാറിയ ശേഷവും ഇളക്കാം.

ബനാന ഫിഗ്

പഴുത്ത വാഴപ്പഴം നിർജലീകരിച്ച് ജലാംശം മുഴുവൻ നീക്കി തയ്യാറാക്കുന്ന ഉൽപ്പന്നമാണിത്. റോബസ്റ്റ, പൂവൻ, പച്ചക്കദളി തുടങ്ങിയ പഴങ്ങളാണ് ഇതിന് യോജിച്ചത്. പഴം തൊലി കളഞ്ഞ് 0.1% വീര്യമുള്ള പൊട്ടാസ്യം മെറ്റാബൈ സൾഫൈറ്റ് ലായനിയിൽ പത്ത് മിനുട്ട് നേരം മുക്കിയിടണം. തുടർന്ന് വെള്ളം വാർത്തു കളഞ്ഞ് വെയിലത്തുണക്കണം. 50 സെന്റിഗ്രേഡിൽ ഹോട്ട് എയർ അവനിൽ 48 മണിക്കൂർ നേരം വച്ചും ഉണക്കാം.
ഫിഗ് അതേ പടി ഭക്ഷിക്കാം. കേക്ക്, ബിസ്ക്കറ്റ് പായസം, കേസരി, ഐസ് ക്രീം എന്നിവയിൽ ഉണക്ക് മുന്തിരിക്ക് പകരം ചേരുവയാക്കുകയോ ചെയ്യാം.

കേരളീയർക്ക് അത്ര സുപരിചിതമല്ലാത്ത പഴമാണ് ലൊക്കൊട്ട് അഥവാ ജപ്പാൻ പ്ലം. വയനാട്ടിലെ ഒട്ടനവധി തോട്ടങ്ങളിൽ അടുത്ത കാലത്തായി സ്ഥാനം പിടിച്ചിട്ടുണ്ട്. ഇന്ത്യയിൽ ലൊക്കൊട്ട് കൃഷിക്ക് തുടക്കം കുറിച്ചത് ഉത്തർപ്രദേശിലെ സഹറൻപൂർ ഹോർട്ടികൾച്ചറൽ ഗവേഷണ കേന്ദ്രമാണ്.ജപ്പാൻ, ചൈന, ആസ് ത്രേലിയ, ദക്ഷിണാഫ്രിക്ക എന്നീ രാജ്യങ്ങളാണ് ലൊക്കൊട്ട് ഉൽപ്പാദനത്തിൽ മുന്നിട്ട് നിൽക്കുന്നത്. പഞ്ചാബ്, ഹിമാചൽ പ്രദേശ്, ആസ്സാം , മഹാരാഷ്ട്ര, തമിഴ്നാട് എന്നീ സംസ്ഥാനങ്ങളിൽ സാമാന്യം വ്യാപകമായ തോതിൽ ഇതിന്റെ കൃഷിയുണ്ട്.

സസ്യ വിവരണം

റോസേസി (Rosaceae)എന്ന സസ്യകുടുംബത്തിൽപ്പെട്ട ഈ ചെടിയുടെ ശാസ്ത്രനാമം എറിയോബോട്രയാ ജപ്പോണിക്ക (Eriobotrya Japonica )എന്നാണ്. ആപ്പിൾ, പിയർ തുടങ്ങിയ പഴങ്ങളുടെ ബന്ധുവാണിത്.കുലകളായുണ്ടാകുന്ന വെളുത്ത പൂക്കൾ സുഗന്ധികളാണ്. ഇതിന്റെ പഴങ്ങളും കുലകളായാണ് ഉണ്ടാവുക. ഗോൾഡൻ യെല്ലോ, ലാർജ് റൌണ്ട്, സഫേദ് , ഫയർ ബാൾ, കാലിഫോർണിയ അഡ്വാൻസ്, തനാക്ക എന്നിവ ഇതിലെ പ്രധാന ഇനങ്ങളാണ്.പഴത്തിന് പൊതുവെ മഞ്ഞനിറമാണ്. എന്നാൽ അപൂർവ്വം ചിലയിനങ്ങൾ ഓറഞ്ച് നിറത്തിലും ഇളം ചുവപ്പ് നിറത്തിലും കാണാംമണ്ണും കാലാവസ്ഥയും മിതോഷ്ണ മേഖലയാണ് ഇതിന്റെ കൃഷിക്ക് ഏറ്റവും അനുയോജ്യം. അതിശൈത്യമുളള സ്ഥലങ്ങളിൽ ഇവ നന്നായി വളരുമെങ്കിലും കായ്ക്കാറില്ല. മിക്കവാറും എല്ലാതരം മണ്ണിലും ഇത് നന്നായി വളരും. എന്നാൽ വെളളം കെട്ടി നിൽക്കുന്ന പ്രദേശം ഒഴിവാക്കണം. വർഷം മുഴുവൻ നീണ്ടു നിൽക്കുന്ന നേരിയ മഴയാണ് അനുയോജ്യം. കേരളത്തിലെ ഹൈറേഞ്ച് പ്രദേശങ്ങളിലെ കാലാവസ്ഥ പൊതുവെ ഇതിന്റെ വളർച്ചക്ക് അനുകൂലമാണ്.

കൃഷി രീതി

കായ്കളിൽ നിന്നും ശേഖരിക്കുന്ന വിത്ത് നട്ടാണ് സാധാരണ രീതിയിൽ തൈകൾ തയ്യാറാക്കുന്നത്. കായ്കളിൽ നിന്നും വേർപെടുത്തിയാൽ ഉടൻ നടാൻ ശ്രദ്ധിക്കണം. അല്ലാത്ത പക്ഷം അവക്ക് കിളിർപ്പാനുള്ള ശേഷി നഷ്ടപ്പെടും. വിത്ത് തൈകൾക്ക് മാതൃ തൈകളുടെ സ്വാഭാവവിശേഷം പലപ്പോഴും കുറഞ്ഞു പോകുന്നതിൽ ഇപ്പോൾ ലെയറിങ്ങ് വഴി തയ്യാറാക്കുന്ന തൈകളാണ് കൂടുതലായും നടാൻ ഉപയോഗിക്കുന്നത്.തനി വിളയായി ഇത് കൃഷി ചെയ്യുമ്പോൾ തൈകൾ തമ്മിൽ 8 മീറ്റർ അകലം നൽകണം. 75 സെ.മീറ്റർ നീളവും വീതിയും താഴ്ചയുമുളള കുഴികളെടുത്ത് ചാണകപ്പൊടിയും മേൽ മണ്ണുമായി ചേർത്ത് കുഴി പൂർണ്ണമായും നിറച്ച ശേഷം നില നിരപ്പിന് സമാന്തരമായി തൈകൾ നടാം.
വേനൽക്കാലം ആരംഭിക്കുന്നതു മുതൽ നന നൽകുന്നത് ചെടികളുടെ ആരോഗ്യകരമായ വളർച്ചക്ക് ഉപകരിക്കും.
വർഷംതോറും വളർച്ചക്കനുസരിച്ച് 20 മുതൽ 50 കി.ഗാം വരെ ജൈവ വളം നൽകണം. എല്ലുപൊടി, പിണ്ണാക്ക് വളങ്ങൾ എന്നിവ കൂടി ജൈവ വളങ്ങളിൽ ഉൾപ്പെടുത്തുന്നത് ഗുണം ചെയ്യും.
ലെയർ തൈകൾ നട്ടാൽ മൂന്ന്-നാല് വർഷങ്ങൾ കൊണ്ട് തന്നെ ചെടികൾ പുഷ്പിച്ച് തുടങ്ങും. എന്നാൽ മികച്ച വിളവ് ലഭിക്കാൻ പത്ത് വർഷത്തോളം വേണ്ടി വരും. ഒക്ടോബർ-നവംബർ മാസങ്ങളിലാണ് ചെടി പുഷ്പിച്ച് തുടങ്ങുന്നത്. മരത്തിൽ വെച്ചു തന്നെ കായ്കൾ പഴുക്കുവാൻ അനുവദിക്കണം.ഒരു ചെടിയിൽ നിന്നും 30 കി.ഗ്രാം വരെ വിളവ് ലഭിക്കുന്നതാണ്. വിളവെടുത്ത് രണ്ടാഴ്ച വരെ കേട് വരാതെ ശീതസംഭരണിയിൽ സൂക്ഷിക്കാം.

പോഷക , ഔഷധ ഗുണം

100 ഗ്രാം പ്ലം പഴത്തിൽ 10 ഗ്രാം സുക്രോസ്, ഒന്നു മുതൽ നാല് ഗ്രാം വരെ ഡയറ്റി നാരുകൾ, എന്നിവ അടങ്ങിയിട്ടുണ്ട്. കൂടാതെ വിറ്റാമിൻ എ, ബി, സി, ധാതുലവണങ്ങളായ കാത്സ്യം , മഗ്നീഷ്യം, ഫോസ്ഫറസ്, ഇരുമ്പ്, പൊട്ടാസ്യം എന്നിവയുമുണ്ട്. ല്യൂട്ടിൻ (Lutein),ക്രിപ്റ്റോ സാൻന്തിൻ ( Cryptotax anthin), സിയാസാന്തിൻ ( Ziaxanthin) എന്നീ ആന്റി ഓക്സിഡന്റ് പദാർത്ഥങ്ങളും ഈ പഴത്തിൽ വേണ്ടുവോളമുണ്ട്. ഓക്സാലിക്ക് അമ്ലം (oxalic acid) ആണ് പ്ലമിന് പുളിരസം നൽകുന്നത്. പഴത്തിലുള്ള ഫെറ്റുലിക് അമ്ലം (Ferulic acid) എല്ലുകൾക്ക് ബലം നൽകി ഓസ്റ്റിയോപോറോസിസ് രോഗത്തിൽ നിന്നും സംരക്ഷിക്കുന്നു. പൂരിത കൊഴുപ്പ് ഒട്ടും ഇല്ലാത്ത ഈ പഴം എല്ലാ പ്രായക്കാർക്കും ഒരുപോലെ പോഷക പ്രദവും ഭക്ഷ്യയോഗ്യവുമാണ്.

എംകെപി മാവിലായി

വെൽവെറ്റ് ആപ്പിൾ

എംകെപി മാവിലായി

കണ്ടാൽ ആപ്പിളിനോട് സാമ്യമുള്ള ഒരു പഴവർഗ്ഗച്ചെടിയാണ് വെൽ വെറ്റ് ആപ്പിൾ. വെൽ വെറ്റ് പോലുള്ള നേർത്ത രോമങ്ങളാൽ ആവരണം ചെയ്ത ഫലമാണിത്.
ഫിലിപ്പൈൻസ് സ്വദേശിയായ വെൽ വെറ്റ് ആപ്പിൾ ഇന്ത്യയുൾപ്പെടെ മലേഷ്യ, സുമാത്ര, ജാവ തുടങ്ങി മിക്ക ഏഷ്യൻ രാജ്യങ്ങളിലും കൃഷി ചെയ്തു വരുന്നു. നമ്മുടെ മണ്ണും കാലാവസ്ഥയും മറ്റു സാഹചര്യങ്ങളുമെല്ലാം വെൽ വെറ്റ് ആപ്പിൾ ചെടിയുടെ വളർച്ചക്ക് അനുകൂലമാണ്. മലയോരങ്ങളിലും മറ്റും ഇത് വ്യാപകമായി വെച്ചുപിടിപ്പിക്കുന്നത് മണ്ണൊലിപ്പ് തടയുന്നതിനും ഉപകരിക്കും. സമുദ നിരപ്പിൽ നിന്നും 900 മീറ്റർ വരെ ഉയരമുളള പ്രദേശങ്ങളിൽ ഇത് നന്നായി വളരും.എബണേസിയേ ( Ebenaceae) എന്ന സസ്യ കുടുംബത്തിൽപ്പെടുന്ന ഈ ചെടിയുടെ ശാസ്ത്രനാമം ഡയോസ്പൈറോസ് ബ്ലാൻകോയ് (Diospyros blancoi) എന്നാണ്.

സസ്യ വിവരണം

ചെടി പൂർണ്ണവളർച്ചയെത്തുമ്പോൾ 15 മീറ്റർ വരെ ഉയരം വെക്കുന്ന ഒരു നിത്യ ഹരിത വൃക്ഷമാണിത്. ഇതിൽ ആൺ ചെടികളും പെൺ ചെടികളുമുണ്ട്. ഇലകൾ പൊതുവെ നല്ല വലുപ്പമുളളവയാണ്. ഇലകൾക്ക് 15 സെ.മീറ്റർ മുതൽ 25 സെ.മീറ്റർ വരെ നീളവും 5 മുതൽ 9 സെ.മീറ്റർ വരെ വീതിയുമുണ്ട്. തളിർ ഇലകൾക്ക് ഇളം പച്ചനിറവും സിൽക്ക് മാതിരി നേരിയ ആവരണവുമുണ്ട്. വളർച്ച എത്തിയ ഇലകൾക്ക് കടും പച്ചനിറമാണ്. മരത്തിൽ ധാരാളം ശാഖകൾ ഉണ്ടാകും. നേരിയ സുഗന്ധത്തോടു കൂടിയ പൂക്കൾ കുലകളായിട്ടാണ് കാണുക. പൂക്കൾക്ക് ഇളം മഞ്ഞനിറമാണ്.നമ്മുടെ കാലാവസ്ഥയിൽ വേനൽ മാസങ്ങളിൽ അതായത് ഫിബ്രവരി, മാർച്ച് , ഏപ്രിൽ മാസങ്ങളിലാണ് ചെടികൾ പൂവിടുക. ജൂൺ മുതൽ സപ്തംബർ വരെയുളള മഴക്കാലങ്ങളിലാണ് വിളവെടുപ്പിന്നാവുക. പഴത്തിൽ തവിട്ട് നിറത്തിൽ നാല് മുതൽ എട്ടുവരെ വിത്തുകൾ കാണാറുണ്ട്.

കൃഷി രീതി

തുറസ്സായ നല്ല സൂര്യപ്രകാശം ലഭിക്കുന്ന സ്ഥലമാണ് ഇതിന്റെ വളർച്ചക്ക് യോജിച്ചത്. എല്ലാ തരം മണ്ണിലും ഇത് കൃഷി ചെയ്യാമെങ്കിലും വെളളക്കെട്ടില്ലാത്തതും നീർവാർച്ചാ സൗകര്യവുമുളള സ്ഥലങ്ങളാണ് നല്ലത്. വിത്ത് വഴി സ്വാഭാവിക വംശവർധന നടത്തുന്ന ഈ മരത്തിന്റെ വിത്തുകൾ കൂടാതെ ഗ്രാഫ്റ്റ്, ലെയറിങ്ങ് വഴി തയ്യാറാക്കിയ തൈകളും നടീൽ വസ്തുവായി ഉപയോഗിക്കാം. നന്നായി മൂപ്പെത്തിയ കായ്കളിൽ നിന്നും വേണം വിത്ത് ശേഖരിക്കാൻ. ഇവ ശേഖരിച്ച് അധിക നാൾ കഴിയും മുമ്പേ നടണം. പഴകുമ്പോൾ മുള ശേഷി നഷ്ടപ്പെടും. വളക്കൂറുളള മണ്ണ് നിറച്ച നഴ്സറി ബാഗിൽ വിത്ത് നട്ട് തൈകളാക്കാം. തൈകൾക്ക് ആറ് മാസത്തെ വളർച്ചയെത്തിയാൽ സ്ഥിരമായ സ്ഥലത്തേക്ക് മാറ്റി നടാം. ഗ്രാഫ്റ്റ് തൈകൾ തയ്യാറാക്കുന്നതിന് ഇപ്രകാരം തയ്യാറാക്കിയ വിത്ത് തൈകളെ റൂട്ട് സ്റ്റോക്കായി ഉപയോഗിച്ച് മികച്ച ഇനങ്ങളുടെ കമ്പുകൾ ഒട്ടിച്ചെടുക്കാം. നല്ലയിനം മരത്തിലെ ശാഖകളിൽ വേരുപിടിപ്പിച്ചെടുത്താണ് ലെയറിങ്ങ് വഴി തൈകൾ ഉൽപ്പാദിപ്പിക്കുന്നത്.
വിത്ത് തൈകൾ നട്ടാൽ അവയിൽ പലതും ആൺ മരങ്ങളായേക്കാം. പുഷ്പ്പിക്കും മുമ്പും ആൺ-പെൺ ചെടികളെ തിരിച്ചറിയുക പ്രയാസമാണ്. എന്നാൽ പെൺ മരങ്ങളുടെ ശാഖകളാണ് ഗ്രാഫ്റ്റിങ്ങ്, ലെയറിങ്ങിൽ ഉപയോഗിക്കുക എന്നതിനാൽ അവ പെൺ മരങ്ങളാണെന്ന് നേരത്തെ ഉറപ്പു വരുത്താനാകും. വിത്തുതൈകൾ നട്ട് കായ്ക്കാൻ ആറ് – ഏഴ് വർഷങ്ങളെടുക്കുമ്പോൾ ലെയർ , ഗ്രാഫ്റ്റ് തൈകൾ നട്ടാൽ നാലാം വർഷം മുതൽ തന്നെ കായ്ച്ച് തുടങ്ങുന്നതായി കണ്ടിട്ടുണ്ട്. മാത്രമല്ല ഇവ അധികം ഉയരത്തിലല്ലാതെ വളരുന്നതുകൊണ്ട് വിളവെടുപ്പ് നടത്താനും എളുപ്പമാകും.
60 സെ.മീറ്റർ വീതം നീളവും വീതിയും താഴ്ചയുമുളള കുഴിയെടുത്ത് മേൽമണ്ണും ചാണകപ്പൊടിയും അൽപ്പം വേപ്പിൻപിണ്ണാക്കും ചേർത്ത് കുഴിനിറച്ച ശേഷം തൈകൾ വെക്കാം. തോട്ടമടിസ്ഥാനത്തിൽ നടുമ്പോൾ തൈകൾ തമ്മിൽ അഞ്ച് മുതൽ ഏഴ് മീറ്റർ വരെ ഇടയകലം നൽകണം.

വിളവും പോഷകവും

നേരിയ ക്രീം കലർന്ന പിങ്ക് നിറമുളള കാമ്പിന് പാൽക്കട്ടിയുടെ ഗന്ധമാണ്. വിപണിയിൽ ഈ പഴത്തിന് നല്ല പ്രിയമാണ്. നല്ല കയറ്റുമതി സാദ്ധ്യതയുമുണ്ട്. പഴത്ത് പാകമെത്തിയ വെൽവെറ്റ് ആപ്പിളിന്റെ പുറന്തൊലി നീക്കിയാൽ ഭക്ഷ്യയോഗ്യമായി.
100 ഗ്രാം പഴത്തിൽ 77.8 ഗ്രാം ജലാംശവും , 0.75 ഗ്രാം മാംസ്യവും, 11.47 ഗ്രാം അന്നജവും, 0.16 ഗ്രാം മാലിക് ആസിഡും അടങ്ങിയിട്ടുണ്ട്. കൂടാതെ ഫൈറ്റിൻ (Phytin) എന്ന രാസപദാർത്ഥവും ഈ ഫലത്തിലുണ്ട്.

ഇതിന്റെ തടി സാന്ദ്രവും ഉറപ്പുള്ളതും ഫർണിച്ചർ, അലങ്കാര വസ്തുക്കൾ എന്നിവയുടെ നിർമ്മാണത്തിന് ഉപയോഗിക്കുന്നു.. മരം തറ നിരപ്പിൽ നിന്ന് നാലടി മുകളിലായി വെട്ടിയെടുത്താൽ വീണ്ടുമിത് കിളിർത്ത് ആരോഗ്യകരമായി വളർന്ന് വിളവ് തരുന്നതായി കണ്ടിട്ടുണ്ട്.

എംകെപി മാവിലായി

ഭാരതത്തിൽ കേരളമുൾപ്പെടെയുളള മിക്ക സംസ്ഥാനങ്ങളിലും കൃഷി ചെയ്തു വരുന്നതും ഏവർക്കും സുപരിചിതവുമായ പഴമാണ് സപ്പോട്ട അഥവാ ചിക്കു . ദീർഘകാലം ഇടതടവില്ലാതെ ആദായം തരാനുള്ള കഴിവ്, കീടരോഗങ്ങളെ കീഴ്പ്പെടുത്തി കൊണ്ടുള്ള വളർച്ച എന്നിവ സപ്പോട്ട മരത്തിന്റെ പ്രത്യേകതയാണ്. വീട്ടുവളപ്പിൽ വളർത്താനും വാണിജ്യ കൃഷിക്കും യോജിച്ചതാണിത്.
ഉഷ്ണമേഖലാ കാലാവസ്ഥയിൽ നന്നായി വളരുകയും സമൃദ്ധമായി കായ്ക്കുകയും ചെയ്യുന്ന ഈ ഫലവൃക്ഷം സാപ്പോട്ടേ സിയേ (Sapotaceae) സസ്യ കുടുംബത്തിൽ പെട്ടതാണ്. മനിൽക്കര സപ്പോട്ട (ManilKera sapota) എന്നാണ് ശാസ്ത്ര നാമം .
മഹാരാഷ്ട്ര, ആന്ധ്രപ്രദേശ്, തമിഴ് നാട്, ഗുജറാത്ത്, കർണ്ണാടക എന്നീ സംസ്ഥാനങ്ങളിലാണ് സപ്പോട്ട കൂടുതലായും വാണിജ്യാടിസ്ഥാനത്തിൽ കൃഷി ചെയ്തു വരുന്നത്.
ഭാരതത്തിന് പുറമെ ഫിലിപ്പീൻസ്, ശ്രീലങ്ക, മലേഷ്യ എന്നീ ഏഷ്യൻ രാജ്യങ്ങളിലും വാണിജ്യാടിസ്ഥാനത്തിൽ സപ്പോട്ട കൃഷിചെയ്യുന്നുണ്ട്.
ദക്ഷിണ അമേരിക്കയാണ് ഈ പഴത്തിന്റെ ജന്മദേശം.

സസ്യ വിവരണം

ഏറെ അയുസ്സുള്ള നിത്യ ഹരിത വൃക്ഷമാണിത്. ഏകദേശം 20 മീറ്റർ വരെ ഉയരത്തിൽ വളരാനുളള കഴിവ് ഈ വൃക്ഷത്തിനുണ്ട്. പഴത്തിന് വേണ്ടത്ര സൗന്ദര്യമില്ലെങ്കിലും മരം കാഴ്ചയിൽ മനോഹരമാണ്. തിളക്കമുള്ള മിനുത്ത ഇലകളും ഉറപ്പു കൂടിയ മരത്തടിയുമാണ് ഇവയ്ക്കുണ്ടാവുക. മരത്തിന്റെ ഫലമുൾപ്പെടെ എല്ലാ ഭാഗങ്ങളിലും വെളുത്ത കറ ഇതിന്റെ പ്രത്യേകതയാണ്. ഇളം ശാഖകളിൽ ബെൽ രൂപത്തിലുള്ള വെളളപ്പൂക്കൾ ചെറിയ കൂട്ടങ്ങളായാണുണ്ടാവുക. പൂക്കൾ പരാഗണം കഴിഞ്ഞ് കായ്കൾ വിളഞ്ഞ് പാകമാകുവാൻ നാല് മാസത്തോളമെടുക്കും. ഫലത്തിന് ഗോളാകൃതിയോ മുട്ടയുടെ ആകൃതിയോ ആണുള്ളത്. കാഴ്ചയിൽ ഉരുളക്കിഴങ്ങിനോട് സാമ്യമുണ്ട്. ഉള്ളിൽ മാംസളവും ഭക്ഷ്യയോഗ്യവുമായ ഭാഗം അറകൾ പോലെ വിഭജിച്ചിരിക്കും. കായ്ക്കുള്ളിൽ രണ്ട് മുതൽ പത്ത് വരെ വിത്തുകൾ കാണും. പുറം തൊലിയും വിത്തുകളും ഒഴികെ പഴത്തിന്റെ ബാക്കി ഭാഗം ഭക്ഷ്യയോഗ്യമാണ്. ഒരു സാധാരണ മരത്തിൽ നിന്നും പ്രതിവർഷം 160 കി.ഗ്രാം പഴങ്ങൾ ലഭിക്കും.

കൃഷിരീതി

എല്ലാതരം മണ്ണിലും സപ്പോട്ട വളരും. നല്ല നീർവാർച്ചയുള്ള മണ്ണാണ് അനുയോജ്യം. വാർഷിക മഴ 225 – 375 സെ.മീറ്ററും താപനില 10 മുതൽ 34 സെൽഷ്യസ് വരെയാകാം. സമുദ്രനിരപ്പിൽ നിന്നും നാലായിരം അടി ഉയരമുള്ള പ്രദേശങ്ങളിലും ഇവ നന്നായി വളരുന്നുണ്ട്.

കൃഷി രീതി

മഴക്കാലമാണ് നടീലിന് നല്ലത്. വിത്ത് മുളപ്പിച്ചെടുത്ത തൈകൾക്ക് മാതൃവൃക്ഷത്തിന്റെ അതേ ഗുണം ഉണ്ടായിരിക്കില്ല എന്നതുകൊണ്ട് ലെയറുകളോ ഗ്രാഫ്റ്റുകളോ നട്ടുവളർത്തുന്നതാണ് നല്ലത്. സപ്പോട്ടയുടെ ഒട്ടുതൈകൾ ഉണ്ടാക്കുന്നതിന് റൂട്ട് സ്റ്റോക്കായി സപ്പോട്ടയുടെ കുടുംബത്തിൽപ്പെട്ട കിർണി എന്ന മരത്തിന്റെ വിത്ത് മുളപ്പിച്ച തൈകളാണ് ഏറ്റവും യോജിച്ചത്. ആറ് മാസം പ്രായമായ തൈകളിൽ ഗ്രാഫ്റ്റിങ്ങ് നടത്താവുന്നതാണ്.

വിവിധയിനം സങ്കര ഇനങ്ങൾ സപ്പോട്ടയിൽ പ്രചാരത്തിലുണ്ട്. ക്രിക്കറ്റ് ബോൾ, ഓവൽ, കാലിപ്പട്ടി, ബദാമി, ബാരാമസി ,കൽക്കട്ട റൗണ്ട് , പാല, ബാംഗ്ളൂർ, ദ്വാരപ്പുഡി , ഛത്രി എന്നിവയാണ് ഇവയിൽ പ്രധാനം.
സാമാന്യം വലിപ്പമുളള ഉരുണ്ട കായ്കൾ തരുന്ന ഇനമാണ് ക്രിക്കറ്റ് ബാൾ. ഇടത്തരം വലിപ്പത്തത്തിൽ അണ്ഡാകൃതിയിലുള്ള പഴമാണ് പാല. ഇത് സമൃദ്ധിയായി കായ്ക്കുന്നവയാണ്. ഓവൽ എന്നയിനം സാമാന്യം വലുപ്പമുളളതും കാമ്പ് തരിയുള്ളതുമാണ്. രുചിയുടെ കാര്യത്തിൽ ഏറ്റവും മികച്ചത് ദ്വാരാ പുഡി എന്ന ഇനമാണ്.

60 സെ.മീറ്റർ വീതം നീളം, വീതി, താഴ്ചയുള്ള കുഴികളെടുത്ത് മേൽമണ്ണ് ചാണകപ്പൊടി എന്നിവ യോജിപ്പിച്ച് കുഴി പൂർണ്ണമായും മൂടിയ ശേഷം അതിന്റെ മധ്യഭാഗത്തായി തൈകൾ നടാം. നട്ട തൈകൾ ഒരു താങ്ങുമായി ചേർത്ത് ബന്ധിപ്പിക്കുന്നത് നല്ലതാണ്. ആദ്യ ഒന്ന് – രണ്ട് വർഷങ്ങളിൽ വേനൽ മാസങ്ങളിൽ ഭാഗികമായ തണൽ നൽകുന്നതും നന നൽകുന്നതും നല്ല ഫലം ചെയ്യും. മഴക്കാലത്ത് ചെടിക്ക് ചുറ്റും വെള്ളം കെട്ടി നില്ക്കാതിരിക്കാനും ശ്രദ്ധിക്കണം.
പൂർണ്ണവളർച്ചയെത്തിയ മരത്തിന് പ്രതിവർഷം 5 മുതൽ 10 കി.ഗ്രാം വരെ കാലിവളമോ, കംബോസ്റ്റോ നൽകുന്നത് മികച്ച വിളവെടുപ്പിന് സഹായകമാകും. വിത്ത് തൈകൾ വളർത്തുമ്പോൾ മരം വളർച്ചയുടെ ഒരു ഘട്ടത്തിലും കമ്പ് മുറിച്ച് വളർച്ച ക്രമീകരിക്കേണ്ട ആവശ്യമില്ല എന്നാൽ ഗ്രാഫ് റ്റോ , ലെയറോ ആണെങ്കിൽ മുകളിലേക്ക് വളരുന്ന കമ്പ് തായ്ത്തടിയായി നിർത്തി അതിൽ നിന്നും എല്ലാ വശത്തേക്കും ശാഖകൾ ഉണ്ടായി വരുന്ന വിധത്തിൽ കമ്പുകോതി നിർത്തണം.
കാലാവസ്ഥയിലുണ്ടാകുന്ന ചെറിയ വ്യതിയാനങ്ങളൊന്നും വിളവിനെ ബാധിക്കുകയില്ല.

വിളവെടുപ്പ്

നമ്മുടെ കാലാവസ്ഥയിൽ ഒക്ടോബർ-നവംബർ , ഫിബ്രുവരി – മാർച്ച് മാസങ്ങളിലാണ് സപ്പോട്ട സമൃദ്ധമായി പൂവിടുക. ഒട്ടു തൈകൾ രണ്ടാം വർഷം മുതൽ കായ്ച്ചു തുടങ്ങുമെങ്കിലും ആറാം വർഷം മുതലാണ് നന്നായി കായ്കൾ നൽകി തുടങ്ങുക.
കായ്കൾ മൂത്ത് പാകമായാൽ പുറന്തൊലിയിൽ കാണുന്ന മൊരി പോലുള്ളവ അപ്രത്യക്ഷമായി നല്ല മിനുസമായിത്തീരും. നല്ലതുപോലെ വിളഞ്ഞ കായിൽ നേരിയ ഒരു പോറൽ ഏൽപ്പിച്ചാൽ മഞ്ഞ നിറം ഉണ്ടാകും. അതേസമയം പാകമാകാത്ത കായിലാണെങ്കിൽ ഇത് പച്ചനിറത്തിലായിരിക്കും. കൂടാതെ കറ കുറവായിരിക്കും. പരിചയം കൊണ്ട് പാകം വന്ന കായ്കൾ പെട്ടെന്ന് തിരിച്ചറിയാനാകും. ഇവ പറിച്ചു കഴിഞ്ഞാൽ നിരത്തിയിട്ട് കറ പോകാൻ അനുവദിക്കണം. ഒരു കായയുടെ കറ മറ്റു കായ്കളിൽ വീണാൽ ആ ഭാഗം കേടു വരാൻ സാധ്യതയുണ്ട്. കറ ഉണങ്ങിയ ശേഷം വൈക്കോലിൽ പൊതിഞ്ഞു പഴുപ്പിച്ചെടുക്കാം. പറിച്ചു നാല് – അഞ്ച് ദിവസം കൊണ്ട് കായ്കൾ പഴുക്കും. പിന്നെ ഒരാഴ്ചക്കകം കേടാകുകയും ചെയ്യും.
വാണിജ്യകൃഷിയിൽ പറിച്ചെടുത്ത കായ്കൾ തണുത്തവെള്ളത്തിൽ കഴുകി തൊലിയിൽ പറ്റി പ്പിടിച്ചിട്ടുള്ള അഴുക്കുകൾ നീക്കം ചെയ്യും. ഒരു ഡിറ്റർജന്റിൽ 0.25 ശതമാനം കുമിൾനാശിനി ലയിപ്പിച്ചതിൽ കഴുകും. കറയൂറിയിട്ടുണ്ടെങ്കിൽ തുണി കൊണ്ട് തുടച്ചുനീക്കും. ഗ്രേഡിങ്ങ് ടേബിളിൽ നിരത്തി ഉണക്കും. ഇതെല്ലാം 10 മിനുട്ടുകൊണ്ട് തീർക്കും.
വിളവെടുപ്പിന് ശേഷമുള്ള സംസ്കരണത്തിൽ ചിലർ വാക്സിംഗ് ഉൾപ്പെടുത്താറുണ്ട്. മസ് ലിൻ തുണി കൊണ്ട് ഓരോ കായും വാക്സ് കൊണ്ട് പൂശുന്നതാണ് വാക്സിംഗ് . 15 ദിവസം വരെ പഴം കേട് കൂടാതെ സൂക്ഷിക്കുവാൻ ശീതീകരണവും സാധാരണമാണ്.

പോഷക ഗുണം

100 ഗ്രാം ഭക്ഷ്യയോഗ്യമായ സപ്പോട്ടയിൽ 73.7 ശതമാനം ജലാംശമാണ്. 0.44ഗ്രാം പ്രോട്ടീൻ, 19. 9 ഗ്രാം അന്നജം 1.1 ഗ്രാം കൊഴുപ്പ്, 28 മില്ലിഗ്രാം കാത്സ്യം , 2 മില്ലിഗ്രാം ഇരുമ്പ്, 6 മില്ലിഗ്രാം വിറ്റാമിൻ സി എന്നിവ അടങ്ങിയിരിക്കുന്നു. 100 ഗ്രാം കാമ്പ് 83 കലോറി ഊർജ്ജം പ്രധാനം ചെയ്യുന്നു. പഴത്തിൽ ധാതുലവണങ്ങളായ പൊട്ടാസ്യം, കോപ്പർ കൂടാതെ വിറ്റാമിൻ എ, വിറ്റാമിൻ ബി വിഭാഗത്തിൽപ്പെട്ട നിയാസിൻ (Niacin), പന്റാതെനിക്ക് അമ്ലം (Pantothenic acid), ഫോളേറ്റ് (Folate) എന്നിവയും അടങ്ങിയിട്ടുണ്ട്.
ഇതിന്റെ വിത്തിൽ നിന്നും എടുക്കുന്ന വിവിധ ആയൂർവേദ മരുന്നുകൾക്കായി ഉപയോഗിച്ചു വരുന്നു. സപ്പോട്ട മരത്തിലടങ്ങിയിരിക്കുന്ന ചിക്കിൾ എന്ന കറ ച്യൂയിംഗത്തിന്റെ നിർമ്മാണത്തിനുപയോഗിക്കുന്നു.