കാർഷികവാർത്തകൾ

സംസ്ഥാന സർക്കാരിൻ്റെ നൂറുദിന കർമ്മ പരിപാടിയുടെ ഭാഗമായി കൃഷിക്കാർക്ക് മികച്ച ഡിജിറ്റൽ സേവനം സാധ്യമാക്കാൻ കതിർ പോർട്ടൽ സ്മാർട്ട് ഐഡി കാർഡ്, സോയിൽ ഹെൽത്ത് കാർഡ് എന്നിവയുടെ സംസ്ഥാനതല വിതരണോദ്ഘാടനവും മുട്ടിൽ സ്‌മാർട്ട് കൃഷിഭവൻ ഉദ്ഘാടനവും ഒക്ടോബർ മൂന്നിന് നടക്കും. മുട്ടിൽ പഞ്ചായത്ത് കൃഷിഭവൻ പരിസരത്ത് രാവിലെ 11 ന് കൃഷിവകുപ്പ് മന്ത്രി അഡ്വ. ടി സിദ്ദീഖ് ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്റ് ചന്ദ്രിക കൃഷ്ണൻ അധ്യക്ഷയാകും. കതിർ-മണ്ണ് പരിശോധന പോർട്ടൽ മോഡ്യൂളും സോയിൽ ഹെൽത്ത് കാർഡ് വിതരണവും എംഎൽഎ ഐ.സി ബാലകൃഷ്ണൻ ഉദ്ഘാടനം ചെയ്യും. വിത്ത് വിതരണവും എൽനിനോ പത്രിക വിതരണ ഉദ്ഘാടനവും എംഎൽഎ ഉഷ വിജയൻ നിർവഹിക്കും. ജില്ലാ കലക്ടർ വി ചെൽസാസിനി മുഖ്യപ്രഭാഷണം നടത്തും. പരിപാടിയുടെ ഭാഗമായി കിസാൻ മേളയും സംഘടിപ്പിക്കും.

പ്രകൃതിക്ഷോഭത്തില്‍ കാര്‍ഷിക വിളകള്‍ക്ക് നാശനഷ്ടം സംഭവിച്ച സംസ്ഥാനത്തെ കര്‍ഷകര്‍ക്ക് നല്‍കാനുള്ള സഹായ ധനം ഒക്ടോബര്‍ അവസാനത്തോടെ ലഭ്യമാക്കുമെന്ന് കൃഷിവകുപ്പ് മന്ത്രി അഡ്വ. ടി. സിദ്ദീഖ്. കല്‍പ്പറ്റ ചന്ദ്രഗിരി ഓഡിറ്റോറിയത്തില്‍ സംഘടിപ്പിച്ച ഏഴാമത് അന്താരാഷ്ട്ര കാപ്പി ദിനാഘോഷം ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. വിള ഇന്‍ഷുറന്‍സ് കുടിശ്ശിക തീര്‍പ്പാക്കാന്‍ ആറു കോടി രൂപ നീക്കിവെച്ചെതായും തുക വിതരണത്തിനുള്ള നടപടികള്‍ പൂര്‍ത്തീകരിച്ചതായും മന്ത്രി പറഞ്ഞു. അടുത്ത സാമ്പത്തിക വര്‍ഷം മുതല്‍ പ്രകൃതിക്ഷോഭത്തിന്റെ ഭാഗമായി കര്‍ഷകനുണ്ടാകുന്ന വിള നഷ്ടത്തിനൊപ്പം പുതിയ നടീല്‍ വസ്തുക്കള്‍, തുക, വളം നല്‍കുന്ന പദ്ധതി കൃഷി വകുപ്പ് ആവിഷ്‌കരിക്കും. വന്യമൃഗ ശല്യത്താല്‍ കര്‍ഷകന് നഷ്ടമുണ്ടായാല്‍ നഷ്ടത്തിന് നിലവില്‍ കിട്ടുന്ന തുക നൂറു ശതമാനമാക്കി വര്‍ദ്ധിപ്പിക്കാന്‍ സംസ്ഥാന സര്‍ക്കാര്‍ തീരുമാനമെടുക്കുകയാണെന്നും മന്ത്രി പറഞ്ഞു. കര്‍ഷകനെ സംരക്ഷിച്ച് ചേര്‍ത്തുപിടിക്കാന്‍ സാധ്യമായ നടപടികള്‍ സ്വീകരിച്ച് ജില്ലയുടെ കാര്‍ഷിക അഭിവൃദ്ധിക്കും കാര്‍ഷിക ടൂറിസത്തിനും നവോന്മേഷമേകുമെന്നും മന്ത്രി പറഞ്ഞു.

വയനാടിന്റെ സമ്പദ് വ്യവസ്ഥയില്‍ കാപ്പി വഹിക്കുന്ന സ്വാധീനം വലുതാണെന്നും കാപ്പി കൃഷിയുമായി ബന്ധപ്പെട്ട് നേരിടുന്ന പ്രധാന വെല്ലുവിളി കാലാവസ്ഥാ വ്യതിയാനമാണെന്നും മന്ത്രി സൂചിപ്പിച്ചു. കാലാവസ്ഥ പ്രതിഭാസത്തിന്റെ ഭാഗമായി ഉണ്ടാകുന്ന മേഘസ്‌ഫോടനം, ഉരുള്‍പൊട്ടല്‍, മണ്ണിടിച്ചില്‍ എന്നിവ കര്‍ഷകരെ പ്രതിസന്ധിയിലാക്കുകയാണ്. അത്തരം പ്രശ്‌നങ്ങളില്‍ ഇടപെടല്‍ നടത്താന്‍ സര്‍ക്കാറും കൃഷിവകുപ്പും പ്രത്യേക ദൗത്യം ഏറ്റെടുക്കും. കേന്ദ്ര സര്‍ക്കാരിന്റെ കോഫി ഡവലപ്‌മെന്റ് ബോര്‍ഡ്, സംസ്ഥാന സര്‍ക്കാരിന്റെ കൃഷി വകുപ്പ് മുഖേന കാപ്പിക്ക് പ്രത്യേകമായി പദ്ധതികള്‍ നടപ്പാക്കും. ജില്ലയിലെ കാപ്പിയുടെ ഉത്പാദനക്ഷമത ഒരു ഹെക്ടറില്‍ 918 കിലോഗ്രാമാണ്. കുടകില്‍ 1494 കിലോഗ്രാമാണ്. കുടകിലേക്കാള്‍ മികച്ച രീതിയില്‍ വരുമാനമുണ്ടാക്കാനുള്ള ഒരു വലിയ മുന്നേറ്റത്തിന് സര്‍ക്കാര്‍ തുടക്കം കുറിക്കുകയാണ്. കേരയുടെ പ്രവര്‍ത്തനങ്ങള്‍ കാപ്പി കൃഷി വികസനം, പുനര്‍കൃഷി എന്നിവയില്‍ മാത്രം ഒതുങ്ങി നിര്‍ത്താതെ സമ്പൂര്‍ണ്ണമായി കാപ്പിയെ പുനരുദ്ധരിക്കാനുള്ള പ്രവര്‍ത്തനങ്ങള്‍ക്ക് നേതൃത്വം കൊടുക്കണമെന്നും മന്ത്രി പറഞ്ഞു.

വയനാടന്‍ റോബസ്റ്റ കാപ്പിക്ക് ഭൗമ സൂചിക പദവി ലഭിച്ചെങ്കിലും മൂല്യവര്‍ദ്ധനവ് ഉറപ്പാക്കണം. അതിന്റെ ബയോ വേസ്റ്റുകള്‍ മുഴുവന്‍ സെക്കന്‍ഡ് ഇന്‍ഗ്രീഡിയന്റാക്കി മാറ്റാന്‍ സാധിക്കണം. അതിനായി വിവിധ സ്‌കീമുകളെ ഉപയോഗപ്പെടുത്തി ഒരു സമ്പൂര്‍ണ്ണ ആവാസവ്യവസ്ഥ സൃഷ്ടിക്കാന്‍ കൂടിയാലോചനകള്‍ നടക്കുന്നുണ്ട്. വയനാടന്‍ റോബസ്റ്റ കാപ്പിയുടെ ഭൗമ സൂചികാ പദവി മുന്‍നിര്‍ത്തി ഫാം ടു കപ്പ് എന്ന അന്താരാഷ്ട്ര ബ്രാന്‍ഡിംഗ് പദ്ധതി നടപ്പിലാക്കും. സംസ്ഥാനത്ത് അന്താരാഷ്ട്ര ഉച്ചകോടി സംഘടിപ്പിക്കാന്‍ ലക്ഷ്യമിടുന്നതായും മന്ത്രി അറിയിച്ചു. നെസ്ലെ, ലുലു, വാള്‍മാര്‍ട്ട് ഉള്‍പ്പെടെ ലോകോത്തര കയറ്റുമതി അധിഷ്ഠിത ബിസിനസ് സംരംഭങ്ങള്‍ കേരളത്തിലേക്ക് ആകര്‍ഷിക്കാന്‍ കര്‍ഷകരുമായി നേരിട്ടുള്ള ബി ടു ബി മുഖാമുഖം, ചര്‍ച്ചകള്‍, ധാരണാപത്രം ഒപ്പുവെക്കല്‍ എന്നിവ നടപ്പിലാക്കും. ഇത്തരം അഭിമുഖങ്ങളില്‍ കോഫിക്ക് പ്രത്യേകമായ ഇടമുണ്ടാകുമെന്നും മന്ത്രി പറഞ്ഞു.

കാപ്പി കൃഷിക്ക് മൂല്യവര്‍ദ്ധനവിലൂടെ പുതിയ വിപണി സാധ്യതകള്‍ കണ്ടെത്തണം: മന്ത്രി പി.കെ കുഞ്ഞാലിക്കുട്ടി

കര്‍ഷകരെയും വയനാടിന്റെ സാമ്പത്തിക മേഖലയുടെയും ജീവനാഡിയായ കാപ്പി കൃഷിയുടെ വികസനത്തിന് മൂല്യവര്‍ദ്ധനവും അടിസ്ഥാന സൗകര്യ വികസനവുമാണ് പ്രധാനമെന്ന് വ്യവസായ വകുപ്പ് മന്ത്രി പി.കെ. കുഞ്ഞാലിക്കുട്ടി പറഞ്ഞു. അന്താരാഷ്ട്ര കാപ്പി ദിനാചരണത്തിന്റെ ഉദ്ഘാടന യോഗത്തില്‍ ഓണ്‍ലൈനായി സംസാരിക്കുകയായിരുന്നു അദ്ദേഹം. ആഗോളതലത്തില്‍ വലിയ വിപണി സാധ്യതയുള്ള ഉത്പന്നമാണ് കാപ്പി. എന്നാല്‍ കര്‍ഷകര്‍ നിലവില്‍ നേരിടുന്ന പ്രയാസങ്ങള്‍ക്ക് പരിഹാരം കാണാന്‍ സര്‍ഗാത്മകവും പ്രായോഗികവുമായ നിര്‍ദ്ദേശങ്ങള്‍ ഉയര്‍ന്നുവരേണ്ടതുണ്ടെന്ന് അദ്ദേഹം പറഞ്ഞു. കാര്‍ഷിക ഉത്പന്നത്തിന്റെ വികസനത്തില്‍ മൂല്യവര്‍ദ്ധനവിനുള്ള പങ്ക് വലുതാണ്. വ്യവസായിക അടിസ്ഥാനത്തില്‍ കാപ്പി അധിഷ്ഠിത ഉത്പന്നങ്ങളുടെ മൂല്യവര്‍ദ്ധനവിനായി മികച്ച പദ്ധതി നിര്‍ദ്ദേശങ്ങള്‍ സമര്‍പ്പിച്ചാല്‍ അത് ചര്‍ച്ച ചെയ്യാനും ആവശ്യമായ എല്ലാ പിന്തുണയും നല്‍കാനും വ്യവസായ വകുപ്പ് തയ്യാറാണെന്ന് മന്ത്രി അറിയിച്ചു.

കാര്‍ഷിക മേഖലയില്‍ ഗൗരവമുള്ള ഇടപെടലുകള്‍ നടത്തുക സര്‍ക്കാര്‍ ലക്ഷ്യം്- മന്ത്രി എ.പി. അനില്‍കുമാര്‍

കാര്‍ഷിക മേഖലയില്‍ ഗൗരവമുള്ള ഇടപെടലുകള്‍ നടത്താനാണ് സര്‍ക്കാര്‍ ലക്ഷ്യമിടുന്നതെന്ന് റവന്യൂ വകുപ്പ് മന്ത്രി എ.പി അനില്‍കുമാര്‍ പറഞ്ഞു. കാപ്പി കൃഷി വികസനത്തിന് കര്‍ഷകരുടെ ക്ഷേമത്തിന് മുന്‍ഗണന നല്‍കുമെന്ന് മന്ത്രി എപറഞ്ഞു. ജില്ലയെ സംബന്ധിച്ചും സംസ്ഥാന കാര്‍ഷിക മേഖലയെ സംബന്ധിച്ചും വലിയ മുന്നേറ്റ സാധ്യതകളുള്ള മേഖലയാണ് കാപ്പി കൃഷി. കാപ്പിയുടെ പ്രസക്തിയും പ്രാധാന്യവും ചര്‍ച്ച ചെയ്യാന്‍ വിപണിയിലെ പുതിയ സാധ്യതകള്‍ കണ്ടെത്താന്‍ ദിനാചരണങ്ങളും സെമിനാറുകളും സഹായിക്കുമെന്ന് മന്ത്രി അഭിപ്രായപ്പെട്ടു. എം.എല്‍.എ ഉഷ വിജയന്‍ അധ്യക്ഷയായ പരിപാടിയില്‍ അമൃദ് യൂണിറ്റിന്റെ ലോഗോ മന്ത്രി ടി. സിദ്ദീഖ് പ്രകാശനം ചെയ്തു. മലയാളം കോഫി ഗൈഡ് ജില്ലാ കളക്ടര്‍ വി ചെല്‍സാസിനി പ്രകാശനം ചെയ്തു. കാപ്പി ദിനാഘോഷത്തിന്റെ ഭാഗമായി കര്‍ഷകര്‍ക്കായി വിവിധ സാങ്കേതിക സെഷനുകള്‍, കാപ്പിയും അനുബന്ധ ഉപകരണങ്ങളും പരിചയപ്പെടുത്തുന്ന 32 ഓളം സ്റ്റാളുകളും ഒരുക്കി. കല്‍പ്പറ്റ ചന്ദ്രഗിരി ഓഡിറ്റോറിയത്തില്‍ നടന്ന പരിപാടിയില്‍ കൃഷിവകുപ്പ് ഡയറക്ടര്‍ അര്‍ജുന്‍ പാണ്ഡ്യന്‍, കോഫി ബോര്‍ഡ് കേരളം-തമിഴ്‌നാട് ജോയിന്റ് ഡയറക്ടര്‍ ഡോ. എം. കറുത്തമണി, പ്രിന്‍സിപ്പല്‍ കൃഷി ഓഫീസര്‍ ബി.ജെ സീമ, കാനറാ ബാങ്ക് കോഴിക്കോട് സര്‍ക്കിള്‍ ചീഫ് ജനറല്‍ മാനേജര്‍ വിജയലക്ഷ്മി, ജന പ്രതിനിധികള്‍, കര്‍ഷകര്‍, കൃഷിവകുപ്പ് ഉദ്യോഗസ്ഥര്‍, കോഫി ബോര്‍ഡ് പ്രതിനിധികള്‍, പ്ലാന്റേഷന്‍ മേഖലയിലെ പ്രതിനിധികള്‍ എന്നിവര്‍ പങ്കെടുത്തു.

കാർഷിക മേഖലയിലെ സമഗ്ര സംഭാവനയ്ക്കുള്ള സംസ്ഥാന സ‍ർക്കാറിന്റെ പ്രഥമ ഉമ്മൻചാണ്ടി പുരസ്കാര ജേതാവായ പത്മശ്രീ ചെറുവയൽ രാമനെ കൃഷി വകുപ്പ് മന്ത്രി അഡ്വ ടി സിദ്ദീഖ് കമ്മനയിലെ വീട്ടിലെത്തി സന്ദർശിച്ചു. ചിങ്ങം ഒന്നിന് ഏറണാകുളത്ത് കൃഷി വകുപ്പ് സംഘടിപ്പിക്കുന്ന കർഷക ദിനാചരണം സംസ്ഥാനതല ഉദ്ഘാടനത്തിൽ മുഖ്യമന്ത്രി വി.ഡി സതീശനാണ് പുരസ്കാരം സമ്മാനിക്കും. അഭിനന്ദനം അറിയിക്കുകയും പുരസ്കാര വിതരണ ചടങ്ങിലേക്ക് കുടുംബസമേതം ക്ഷണിക്കുന്നതിനുമാണ് മന്ത്രി ചെറുവയൽ രാമന്റെ വസതിയിലെത്തിയത്. അതിജീവനത്തിനായി പോരാടുന്ന കർഷകന്റെ പ്രതീകമായ പത്മശ്രീ ചെറുവയൽ രാമന് പ്രഥമ ഉമ്മൻചാണ്ടി പുരസ്കാരത്തിനായി തിരഞ്ഞെടുത്തത് അഭിമാനകരമാണെന്ന് മന്ത്രി പറഞ്ഞു. അഡീഷണൽ ചീഫ് സെക്രട്ടറിയുടെ നേതൃത്വത്തിൽ കൃഷി വകുപ്പ് സ്പെഷ്യൽ സെക്രട്ടറിയും കൃഷി ഡയറക്ടറും അംഗങ്ങളായിരുന്ന പുരസ്കാര നിർണയ കമ്മിറ്റി ഐക്യകണ്ഠേനയാണ് ചെറുവയൽ രാമനെ തിരഞ്ഞെടുത്തത്. കൃത്രിമത്വത്തിന്റെ ഒരു അംശം പോലുമില്ലാതെ മണ്ണിനോടും പ്രകൃതിയോടും കൃഷിയോടും താദാത്മ്യം പ്രാപിച്ചയാളാണ് അദ്ദേഹം. രാജ്യം ആദരിച്ച ചെറുവയൽ രാമനെ സംസ്ഥാന കൃഷി വകുപ്പ് ഈ പുരസ്കാരത്തിലൂടെ ആദരിക്കുകയാണെന്നും മന്ത്രി പറഞ്ഞു.

അഞ്ച് ലക്ഷം രൂപയും ഫലകവും പ്രശസ്തി പത്രവുമടങ്ങുന്നതാണ് പുരസ്കാരം. വ്യക്തിപരമായി ഏറെ ഇഷ്ടപ്പെടുന്ന ഉമ്മൻചാണ്ടിയുടെ പേരിലുള്ള പുരസ്കാരം ലഭിച്ചതിൽ അതിയായ സന്തോഷമുണ്ടെന്ന് പത്മശ്രീ ചെറുവയൽ രാമൻ പ്രതികരിച്ചു. എം.എൽ.എ ഉഷ വിജയൻ, മാനന്തവാടി ബ്ലോക്ക് പഞ്ചായത്ത് പ്രസിഡൻ്റ് മീനാക്ഷി രാമൻ, ജനപ്രതിനിധികൾ, ഉദ്യോഗസ്ഥർ എന്നിവർ മന്ത്രിയോടൊപ്പം ചെറുവയൽ രാമന്റെ വസതിയിലെത്തിയിരുന്നു.

കാസർകോട്: സംസ്ഥാനത്ത് കശുവണ്ടി വ്യവസായം പുനരുജ്ജീവിപ്പിക്കുന്നതിനെക്കുറിച്ച് പഠിച്ച് ശുപാർശ നല്കാൻ നിയോഗിച്ച വിദഗ്ധ സമിതിയുടെ റിപ്പോർട്ട് സർക്കാർ അംഗീകരിച്ചു. ഇതിന്റെ അടിസ്ഥാനത്തിൽ കശുവണ്ടി മേഖലയിലെ തൊഴിലാളികൾക്കും സംരംഭകർക്കും പ്രയോജനപ്പെടുന്ന പദ്ധതികൾ തയ്യാറാക്കാൻ വ്യവസായവകുപ്പ് ഡയറക്ടർക്ക് നിർദേശം നൽകി.

സമ്പൂര്‍ണ്ണ ആരോഗ്യ പരിരക്ഷ ഉറപ്പാക്കുന്ന ഏകാരോഗ്യം പദ്ധതിയിലൂടെ മൃഗസമ്പത്ത് സംരക്ഷിക്കുമെന്നും അന്തര്‍ സംസ്ഥാനങ്ങളില്‍ നിന്നെത്തുന്ന മൃഗങ്ങളില്‍ രോഗ സാധ്യത കൂടുതലായതിനാല്‍ ക്വാറന്റൈന്‍ സംവിധാനം ഒരുക്കുമെന്നും മൃഗസംരക്ഷണ- ക്ഷീര വികസന വകുപ്പ് മന്ത്രി ജെ. ചിഞ്ചുറാണി. പൂക്കോട് വെറ്ററിനറി ആന്‍ഡ് ആനിമല്‍ സയന്‍സ് സര്‍വകലാശാലയില്‍ ഡിസംബര്‍ 29 വരെ നടക്കുന്ന അന്താരാഷ്ട്ര ലൈവ്‌സ്റ്റോക്ക് കോണ്‍ക്ലേവ് ഉദാഘാടനം ചെയ്ത് സംസാരിക്കുകയായിരുന്നു മന്ത്രി. മേപ്പാടിയിലെ ദുരന്തത്തില്‍ കന്നുകാലി, വളര്‍ത്തുമൃഗങ്ങളെ പുനരധിവസിപ്പിക്കുന്നതിന് സമാനതകളില്ലാത്ത ദൗത്യമാണ് സര്‍ക്കാര്‍ നടപ്പാക്കിയത്.

മുണ്ടക്കൈ- ചൂരല്‍മല ദുരന്തം പ്രദേശത്തെ ക്ഷീര -കാര്‍ഷിക മേഖലയ്ക്ക് കനത്ത നഷ്ടമാണ് ഉണ്ടാക്കിയതെന്നും കര്‍ഷകരെയും സംരംഭകരെയും ഉയര്‍ത്തിയെടുക്കാന്‍ വിവിധങ്ങളായ പ്രവര്‍ത്തനങ്ങളാണ് വകുപ്പ് ഉറപ്പാക്കുന്നതെന്നും മന്ത്രി കൂട്ടിച്ചേര്‍ത്തു. വിനോദസഞ്ചാരികള്‍, കര്‍ഷകര്‍, സൂക്ഷ്മ-ഇടത്തരം സംരംഭകരെ ജില്ലയിലേക്ക് എത്തിക്കുകയെന്ന ലക്ഷ്യത്തോടെയാണ് അന്താരാഷ്ട്ര ലൈവ്‌സ്റ്റോക്ക് കോണ്‍ക്ലേവ് സംഘടിപ്പിക്കുന്നത്. സംസ്ഥാനത്ത് പാലുത്പാദനത്തില്‍ ജില്ല രണ്ടാമതാണെന്നും കുറഞ്ഞ പശുകളില്‍ നിന്നും കൂടുതല്‍ പാല്‍ എന്ന മികച്ച രീതിയാണ് ജില്ല അവലംബിച്ചതെന്നും മന്ത്രി വ്യക്തമാക്കി. 131 കോടി വകയിരുത്തി മലപ്പുറം ജില്ലയിലെ മൂര്‍ക്കനാട് നിര്‍മ്മിക്കുന്ന പാല്‍പ്പൊടി ഫാക്ടറി പൂര്‍ത്തീകരിക്കുന്നതിലൂടെ പാല്‍ സംഭരിച്ച് സൂക്ഷിക്കാന്‍ സാധിക്കും. കോവിഡ് കാലത്ത് നേരിട്ട പ്രതിസന്ധി പരിഹിരിക്കാനും അധിക പാല്‍ പൊടിയാക്കി മാറ്റാനും സാധിക്കും. വിവിധ സംരംഭങ്ങളിലായി വളര്‍ത്തുന്ന പക്ഷി-മൃഗാദികള്‍ നഷ്ടപ്പെട്ട കര്‍ഷകര്‍ക്ക് നഷ്ടപരിഹാര തുക വകുപ്പ് മുഖേന വിതരണം ചെയ്യുന്നുണ്ട്. കോണ്‍ക്ലേവിലൂടെ ക്ഷീര-കാര്‍ഷിക മേഖലയിലെ സമഗ്ര വിഷയങ്ങളില്‍ ചര്‍ച്ച ചെയ്ത് സാധ്യമായ പ്രതിവിധികള്‍ ഉറപ്പാക്കും. കോണ്‍ക്ലേവിന്റെ ഭാഗമായി സജ്ജീകരിച്ച പ്രദര്‍ശന സ്റ്റാളുകളുടെ ഉദ്ഘാടനം മന്ത്രി നിര്‍വഹിച്ചു. കേരള വെറ്ററിനറി ആന്റ് അനിമല്‍ സയന്‍സ് യൂണിവേഴ്സിറ്റി വൈസ് ചാന്‍സലര്‍ പ്രൊഫ. ഡോ. അനില്‍ കെ.എസ് അധ്യക്ഷനായ പരിപാടിയില്‍ പൂക്കോട് വെറ്ററിനറി കോളേജ് സംരംഭക വിഭാഗം ഡയറക്ടര്‍ പ്രൊഫ. ഡോ. ടി എസ് രാജീവ്, കോളേജ് രജിസ്ട്രാര്‍ പ്രൊഫ. പി സുധീര്‍ ബാബു, ഡീന്‍ ഡോ. എസ്. മായ്, ജില്ലാ മൃഗസംരക്ഷണ ഓഫീസര്‍ ഡോ. രാജേഷ്, വൈത്തിരി ഗ്രാമപഞ്ചായത്ത് അംഗം എന്‍.കെ ജ്യോതിഷ് കൂമാര്‍, വെറ്ററിനറി സര്‍വകലാശാല ഫിനാന്‍സ് ഓഫീസര്‍ എ.കെ ദിനേശന്‍, സര്‍വകലാശാല മാനേജ്മന്റ് കൗണ്‍സില്‍ അംഗങ്ങളായ ഡോ. കെ.സി ബിബിന്‍, ഡോ. പി.ടി ദിനേശ്, സി.ആര്‍ സന്തോഷ്, പി. അഭിരാം എന്നിവര്‍ പങ്കെടുത്തു.

മഴക്കാടുകൾ നശിപ്പിക്കപ്പെടുന്നു എന്നതാണ് ഇന്ന് ലോകം നേരിടുന്ന പ്രധാന വെല്ലുവിളികളിൽ ഒന്ന്.
മഴക്കാടുകൾ സംരക്ഷിക്കപ്പെടേണ്ടതിൻ്റെ പ്രാധാന്യം മനസ്സിലാക്കുന്നതിനും മഴക്കാട് സംരക്ഷണ പ്രവർത്തനത്തെ പ്രോത്സാഹിപ്പിക്കുന്നതിനും വേണ്ടിയാണ് ജൂൺ 22 ലോക മഴക്കാട് ദിനമായി ഐക്യരാഷ്ട്രസഭ ആചരിക്കുന്നത്.

ആവാസ വ്യവസ്ഥയുടെ അവിഭാജ്യ ഘടകമാണ് മഴക്കാടുകൾ. ഉഷ്ണമേഖലാ പ്രദേശത്ത് കാണപ്പെടുന്ന നിത്യ ഹരിത വനങ്ങളാണ് മഴക്കാടുകൾ എന്ന് യുണൈറ്റഡ് നേഷൻസ് എൻവിറോൺമെന്റ് പ്രോഗ്രാമിന്റെ വേൾഡ് കൺസർവേഷൻ മോണിറ്ററിങ്ങ് സെന്റർ നിർവചിച്ചിരിക്കുന്നു.

ലോകത്തിലെ ഏറ്റവും വലിയ മഴക്കാട് ആമസോൺ വനമാണ്. ലോകത്തിലെ ആകെ ജന്തുസസ്യജാലങ്ങളുടെ പകുതിയും വസിക്കുന്നത് മഴക്കാടുകളിലാണ്.

വളരെയധികം മഴ ലഭിക്കുന്ന വനങ്ങളെയാണ് മഴക്കാടുകൾ എന്നു പറയുന്നത്.

അപൂർവ്വങ്ങളായ സസ്യങ്ങളും ജന്തുക്കളും ഏറ്റവും കൂടുതൽ കാണപ്പെടുന്നതും മഴക്കാടുകളിലാണ്‌.

ഏറ്റവും സങ്കീർണ്ണമായ ഇക്കോ വ്യൂഹങ്ങളിലൊന്നാണ് മഴക്കാട്. സ്വയം പര്യാപ്തമായ ഒരു ഇക്കോ വ്യൂഹമായി ഇതിനെ പരിഗണിയ്ക്കാം. മഴക്കാടുകളുടെ ഊർജ്ജസ്രോതസ്സ് സൂര്യൻ തന്നെയാണ്. മരങ്ങളും സസ്യലതാദികളും ഉദ്പാദകരുംവിവിധ തരം ജന്തുക്കൾ ഉപഭോക്താക്കളും ബാക്ടീരിയ, കുമിൾ, ചിതൽ, പുഴുക്കൾ, കീടങ്ങൾ, മുതലായവ വിഘാടകരുമാണ്. വിഘാടകർ മൃതശരീരങ്ങളെയും ഇല, തണ്ട്, പൂവ് എന്നിവയും അവയിലടങ്ങിയിട്ടുള്ള കാർബൺ, നൈട്രജൻ തുടങ്ങിയവയെയും പ്രകൃതിയിലേയ്ക്ക് മുതൽക്കൂട്ടുന്നു

മഴക്കാടിന്റെ ഉദ്പാദകർ മരങ്ങളാണ് രാക്ഷസ മരങ്ങൾ മുതൽ കുഞ്ഞുചെടികൾ വരെ ഇതിൽ പെടും. ഒറ്റനോട്ടത്തിൽ കുറ്റിച്ചെടികൾ എന്ന് തോന്നുന്നവ പോലും മരത്തിൻറെ രൂപത്തിലാകും.
ഭൂമധ്യരേഖയ്ക്ക് സമീപത്തായി കാണപ്പെടുന്ന വനങ്ങളാണ് ഉഷ്ണമേഖലാ മഴക്കാടുകൾ. (Tropical Rainforests).
മറ്റുള്ള വനങ്ങളെ അപേക്ഷിച്ച് വൃക്ഷവൈവിധ്യത്താൽ ശ്രദ്ധേയമാണ് ഉഷ്ണമേഖലാ വനങ്ങൾ. തെക്കേ അമേരിക്കയിലെ ആമസോൺ നദീതടം, ആഫ്രിക്കയിലെ കോംഗോ നദീതടം, ഏഷ്യയുടെ തെക്കു കിഴക്കൻ പ്രദേശങ്ങൾ എന്നിവിടങ്ങളിലായാണ് പ്രധാനമായും ഉഷ്ണമേഖലാ മഴക്കാടുകൾ വ്യാപിച്ചിരിക്കുന്നത്. ഇവിടുത്തെ വൃക്ഷങ്ങളിൽ 75 ശതമാനത്തിൽ അധികവും വീതിയേറിയ ഇലകളോട് കൂടിയവയാണ്. 200 സെ.മീ. വാർഷിക വർഷപാതമുള്ള പ്രദേശങ്ങളാണിവ. പൊതുവേ വരണ്ട കാലാവസ്ഥ ഇവിടെ അനുഭവപ്പെടാറില്ല. ഭൂമിയിലെ കരഭാഗത്തിന്റെ ഏകദേശം ഏഴു ശതമാനത്തോളം പ്രദേശത്താണ് ഉഷ്ണമേഖലാ മഴക്കാടുകൾ വ്യാപിച്ചിരിക്കുന്നതായി കണക്കാക്കുന്നത്.

പ്രകൃതിയുടെ ഏറ്റവും വിലപിടിപ്പുള്ള സമ്പത്തുകളിലൊന്നായ മഴക്കാടുകളെ സംരഷിക്കാൻ ജൂൺ 22 എന്ന ദിനം നീക്കിവെച്ചത് 2017 മുതലാണ്.

“Empowering the World in Defense of our Rainforests”
(” നമ്മുടെ മഴക്കാടുകളുടെ പ്രതിരോധത്തിൽ ലോകത്തെ ശാക്തീകരിക്കുക” )
എന്നതാണ് ഈ വർഷത്തെ ദിനാചരണത്തിൻ്റെ പ്രമേയം.
മഴക്കാടുകളുടെ സംരക്ഷണത്തിനുള്ള രീതികളും തന്ത്രങ്ങളും പ്രോത്സാഹിപ്പിക്കുന്നതിനുള്ള വ്യത്യസ്ത പ്രചാരണങ്ങളുടെ ഭാഗമായി ലോകമെമ്പാടുമുള്ള ആളുകൾ
ഈ അവസരത്തിൽ ഒന്നിക്കുന്നു.

കേരള ബയോടെക്‌നോളജി കമ്മീഷന്റെയും കേന്ദ്ര സര്‍ക്കാരിന്റെ ഡിപാര്‍ട്‌മെന്റ് ഓഫ് ബയോടെക്‌നോളജിയുടെയും സഹകരണത്തോടെ പുത്തൂര്‍വയല്‍ എം.എസ്.സ്വാമിനാഥന്‍ ഗവേഷണ നിലയത്തിന്റെ നേതൃത്വത്തില്‍ കൃഷിയിലെ നൂതന സാങ്കേതിക വിദ്യകള്‍ എന്ന വിഷയത്തില്‍ പരിശീലനം നല്‍കുന്നു. ടിഷ്യു കള്‍ച്ചര്‍, കൂണ്‍ ഉത്പാദനം, ജൈവകൃഷി എന്നിങ്ങനെ മൂന്ന് വിഷയത്തിലാണ് ഒരു മാസം ദൈര്‍ഘ്യമുളള പരിശീലനം നല്‍കുന്നത്. പ്ലസ്ടു യോഗ്യതയുള്ളവര്‍ക്ക് പരിശീലനത്തില്‍ പങ്കെടുക്കാം. പരിശീലനത്തില്‍ പങ്കെടുക്കുന്നവര്‍ക്ക് സ്റ്റൈപെന്‍ഡും കേന്ദ്ര സര്‍ക്കാര്‍ അംഗീകൃത സര്‍ട്ടിഫിക്കറ്റും ലഭിക്കും.

കൂണ്‍ ഉത്പാദനത്തില്‍ വിത്തുമുതല്‍ വിപണി വരെ അറിയേണ്ടതെല്ലാം ഉള്‍ക്കൊള്ളിച്ചാണ് പരിശീലനം. വിവിധയിനം കൂണുകള്‍, ഔഷധ ഗുണങ്ങള്‍, കൃഷി രീതികള്‍, മൂല്യവര്‍ദ്ധിത ഉത്പന്നങ്ങള്‍, കൂണ്‍ വിത്ത് ഉത്പാദനം, ബാങ്ക് വായ്പാ ലഭ്യതകള്‍ എന്നിങ്ങനെയുള്ള അറിവുകള്‍ പരിശീലനത്തില്‍ പങ്കുവെക്കും. ഓരോ വിഷയത്തിലും 390 മണിക്കൂര്‍ വീതമുള്ള ക്ലാസ്സുകളാണ് ലഭ്യമാവുക. ജൈവകൃഷിയിലെ അടിസ്ഥാന തത്വങ്ങള്‍, വിളപരിപാലന രീതികള്‍, വിത്ത് സംഭരണരീതികള്‍, ഇടവിളകള്‍ എന്നിവയെക്കുറിച്ചെല്ലാം ജൈവകൃഷി പരിശീലനത്തില്‍ അടുത്തറിയാം. ടിഷ്യു കള്‍ച്ചറിനെക്കുറിച്ചും കൂടുതല്‍ അറിവുകള്‍ പകര്‍ന്ന് നല്‍കും. കൂടുതല്‍ വിവരങ്ങള്‍ പുത്തൂര്‍വയലിലെ എം.എസ്.സ്വാമിനാഥന്‍ ഗവേഷണ നിലയത്തില്‍ നിന്നും ലഭ്യമാകും. ഫോണ്‍ 04936 204477, 9388020650, 7025223362

നമ്മുടെ ശരീരത്തിന്റെ ആരോഗ്യത്തിന്‌ അത്യന്താപേക്ഷിതമായ ഘടകങ്ങൾ ആണ്‌ പോഷകങ്ങൾ. ഇവ നാം കഴിക്കുന്ന ഭക്ഷണത്തിലൂടെ തന്നെ നമുക്ക്‌ ലഭിക്കുന്നു. എന്നാൽ ആവശ്യമായ പോഷകങ്ങൾ ലഭിക്കാതെ കോടിക്കണക്കിന്‌ ജനങ്ങൾ ആണ്‌ ലോകത്ത്‌ ജീവിച്ച്‌ വരുന്നത്‌. എല്ലാ വർഷവും മെയ്‌ 28 പോഷകാഹാര ദിനമായി ആചരിച്ച്‌ വരുന്നു .

നിലനില്പിനുവേണ്ടിയോ വിനോദത്തിനു വേണ്ടിയോ മനുഷ്യർ ഉൾപ്പെടുന്ന എല്ലാജീവികൾക്കും ഭക്ഷിക്കാൻ കഴിയുന്ന എന്തിനെയും ആഹാരം എന്നു വിളിക്കാം. ശരീരഘടന സസ്യഭുക്കിന്റെതാണെങ്കിലും മനുഷ്യൻ ആദികാലം മുതൽക്കേ മിശ്രഭുക്കാണ്. ഓരോ സംസ്കാരങ്ങൾക്കും അവരുടേതായ ആഹാര രീതിയാണുള്ളത്. ഒരു പ്രദേശത്തെ ഭക്ഷ്യസാധനങ്ങളുടെ ലഭ്യതയും കാലാവസ്ഥയും ആ പ്രദേശത്തെ ജനങ്ങളുടെ ആഹാരരീതിയെ സ്വാധീനിക്കുന്നു. ഉദാഹരണത്തിന് തണുപ്പുകൂടുതലുള്ള രാജ്യങ്ങളിൽ ശരീരത്തിന്റെ നിലനിൽപ്പിന് ആവശ്യമായ ഘടകങ്ങൾ കൂടുതലും മാംസ ഭക്ഷണത്തിൽ നിന്നും ലഭിക്കുന്നു. അതുകൊണ്ട് തണുപ്പുരാജ്യങ്ങളിലെ ജനങ്ങളുടെ ഭക്ഷണത്തിൽ മാംസം കൂടുതൽ അടങ്ങിയിരിക്കുന്നതായി കാ‍ണാം. കേരളത്തിലെയും ബംഗാളിലെയും ജനങ്ങൾ സുലഭമായ മത്സ്യം കൂടുതൽ ഭക്ഷിക്കുന്നു.

നമ്മുടെ ശരീരത്തിനാവശ്യമായ സുപ്രധാന ഘടകങ്ങളാണ് പോഷകാഹാരങ്ങൾ. വിറ്റാമിൻ എ, വിറ്റാമിൻ ബി 1 വിറ്റാമിൻ ബി 2 വിറ്റാമിൻ ബി 3 വിറ്റാമിൻ ബി 6 വിറ്റാമിൻ ബി 9 വിറ്റാമിൻ ബി 12 വിറ്റാമിൻ സി, വിറ്റാമിൻ ഡി, വിറ്റാമിൻ ഇ എന്നിവ പോഷക ഘടകങ്ങളാണ് അഥവാ ധാതുക്കൾ.

ഇവ ശരിയായ അളവിൽ ഓരോ മനുഷ്യനും ലഭിക്കേണ്ടതുണ്ട്‌ . ഇതിനായുള്ള ബോധവൽക്കരണമാണ്‌ പോഷകാഹാര ദിനത്തിലൂടെ നാം ലക്ഷ്യം വക്കുന്നത്

ടെറസ്സിലാണെങ്കിലും എല്ലായിനം കീടങ്ങളും രോഗങ്ങളും പച്ചക്കറിസസ്യങ്ങളെ ബാധിക്കും. മറ്റൊരിടത്തും കൃഷി ഇല്ലെങ്കില്‍ പരിസരത്തുള്ള പറക്കാന്‍ കഴിയുന്ന ഷട്പദങ്ങളെല്ലാം പറന്നുവരും. പാവല്‍, പടവലം എന്നിവയെ കായീച്ചകളും, പയറുവര്‍ഗ്ഗങ്ങളെ അരക്ക് ഷട്പദങ്ങളും(ഇലപ്പേന്‍) ആക്രമിക്കും. പയറിന്റെ നീരുറ്റികുടിക്കുന്ന ഷട്പദങ്ങള്‍ ഒന്നോ രണ്ടോ വന്നാല്‍ പിറ്റേദിവസം കൂട്ടത്തോടെ പറന്നുവരും. ഇവ കൂടാതെ ഇലകള്‍ തിന്നുന്ന ലാര്‍വ്വകള്‍ പലതരം കാണപ്പെടും. ലാര്‍വ്വകള്‍ ഓരോ തരവും ഒരേ ഇനത്തില്‍പ്പെട്ട ചെടികളെ മാത്രമാണ് ആഹാരമാക്കുന്നത്. പിന്നെ പച്ചക്കറി സസ്യങ്ങളില്‍ കാണുന്ന മിക്കവാറും ഷട്പദലാര്‍വ്വകള്‍ രാത്രിയില്‍ മാത്രം പുറത്തിറങ്ങി ആഹാരം കഴിക്കുന്നവയാണ്. അതുകൊണ്ട് പകല്‍നേരങ്ങളില്‍ നോക്കിയാല്‍ അവരുടെ അടയാളം മാത്രമേ കാണുകയുള്ളു.

പുകയില കഷായം, കാന്താരി മിശ്രിതം, മണ്ണെണ്ണക്കുഴമ്പ് തുടങ്ങിയവ പ്രധാന ജൈവ കീടനാശിനികളാണ്. ഇവ കൂടാതെ നേരിട്ടല്ലാതെ കീടങ്ങളെ നശിപ്പിക്കാന്‍ പഴക്കെണി, തുളസിക്കെണി, ശര്‍ക്കരക്കെണി തുടങ്ങിയവയും പ്രയോഗിക്കാം.

പുകയിലക്കഷായം: 50 ഗ്രാം പുകയില, 500 മില്ലി ലിറ്റര്‍ വെള്ളത്തില്‍ 24 മണിക്കൂര്‍ കുതിര്‍ത്തശേഷം പിഴിഞ്ഞെടുത്ത വെള്ളത്തില്‍ 12ഗ്രാം അലക്കുസോപ്പ് പതയാക്കി ഇളക്കിച്ചേര്‍ത്ത് യോജിപ്പിക്കുക. ആവശ്യമനുസരിച്ച് അളന്നെടുത്ത് ആറിരട്ടി വെള്ളം ചേര്‍ത്ത് നേര്‍പ്പിച്ച് ചെടികളില്‍ തളിക്കാം.

മണ്ണെണ്ണ കുഴമ്പ്: ഒരു ലിറ്റര്‍ മണ്ണെണ്ണയില്‍, 50 ഗ്രാം ബാര്‍സോപ്പ് അര ലിറ്റര്‍ വെള്ളത്തില്‍ കലക്കിയത് യോജിപ്പിച്ച് നന്നായി ഇളക്കിയിട്ട് 20 ഇരട്ടി വെള്ളം ചേര്‍ത്ത് ചെടിയില്‍ തളിക്കുക.

പഴക്കെണി: വെള്ളരി, പാവല്‍, പടവലം എന്നിവയില്‍ കായീച്ചയുടെ ഉപദ്രവം ഒഴിവാക്കാനാണ് പഴക്കെണി ഉപയോഗിക്കുന്നത്. നന്നായി പഴുത്ത മൈസൂര്‍ പഴം വട്ടത്തില്‍ മുറിച്ചത് ചിരട്ടയില്‍ ഇട്ട് വെള്ളം ഒഴിച്ച് അതില്‍ ഏതാനും തരി ഫുഡറാന്‍ ചേര്‍ക്കുക. ഇങ്ങനെയുള്ള ചിരട്ടക്കെണികള്‍ പാവല്‍, പടവലം എന്നിവയുടെ പന്തലിനു ചുറ്റും തൂക്കിയിട്ടാല്‍ അവിടെ വരുന്ന ധാരാളം കായിച്ചകള്‍ പഴച്ചാര്‍ കുടിച്ച് ചിരട്ടയില്‍ ചത്തതായി കാണാം. അതുപോലെ തുളസിയില അരച്ചെടുത്ത നീരില്‍ ഫുഡറാന്‍ കലര്‍ത്തിയത് ചിരട്ടകളില്‍ തൂക്കിയിട്ടാലും കായിച്ചകള്‍ അവ കുടിക്കാന്‍ വരും.

കഞ്ഞിവെള്ളം: പയറിനെ കൂട്ടമായി ആക്രമിക്കുന്ന അരക്ക് ഒഴിവാക്കാന്‍ നല്ല കൊഴുത്ത കഞ്ഞിവെള്ളം ഒരു ബ്രഷ് ഉപയോഗിച്ച് ആക്രമണം ഉള്ള ഭാഗങ്ങളില്‍ പുരട്ടിയാല്‍ മതിയാവും. പച്ചപപ്പായ പലതായി മുറിച്ച് ഒരു പാത്രത്തിലെ വെള്ളത്തില്‍ ഇട്ട് വെച്ചത്, ഏതാനും ദിവസം കഴിഞ്ഞ് ഇളക്കിയാല്‍ കുഴമ്പ് രൂപത്തിലാവും. ഇത് ബ്രഷ് ഉപയോഗിച്ച് തളിച്ചാല്‍ പയറിലുള്ള അരക്ക്(ഇലപ്പേന്‍) ഒഴിവാകും. അരക്കിന്റെ ആക്രമണം ആരംഭത്തില്‍തന്നെ ഒഴിവാക്കണം.

കടലാസ് പൊതിയല്‍: ടെറസ്സിലാവുമ്പോള്‍ ഏറ്റവും നല്ല കീടനിയന്ത്രണ മാര്‍ഗ്ഗങ്ങള്‍ ചിലത് കൂടിയുണ്ട്. കായീച്ചയെ ഒഴിവാക്കാന്‍ പാവക്ക, പടവലം തുടങ്ങിയവ ഉണ്ടായതിന്റെ പിറ്റേദിവസംതന്നെ കടലാസുകൊണ്ട് പൊതിഞ്ഞാല്‍ മതിയാവും. വീട്ടില്‍ കറിവെക്കാനുള്ള പച്ചക്കറികള്‍ ലക്ഷ്യമാക്കി കൃഷി ചെയ്യുന്നതിനാലും, ധാരാളം കായകള്‍ ഒന്നിച്ച് കായ്ക്കാത്തതിനാലും അവ പത്രക്കടലാസ് കൊണ്ട് പൊതിഞ്ഞ് സംരക്ഷിക്കുന്നതാണ് നല്ലത്. ഇലകളും കായകളും തിന്നുന്ന പുഴുക്കളെ തെരഞ്ഞ്പിടിച്ച് നിലത്തിട്ട് അമര്‍ത്തികൊല്ലുന്നതാണ് നല്ലത്.

ഉരഗവർഗ്ഗത്തിൽപ്പെടുന്ന വെള്ളത്തിലും കരയിലും ജീവിക്കാൻ കഴിയുന്ന പുറംതോടുള്ള ജീവികളാണ്‌ ”’ആമകൾ”’ വെള്ളത്തിലോ വെള്ളത്തിനു സമീപമോ ജീവിക്കുന്ന ഇവ കരയിലാണ്‌ മുട്ടയിടുന്നത്. ഏകദേശം 270-ഓളം വംശജാതികൾ ഇന്ന് ജീവിച്ചിരിക്കുന്നു, ഇവയിൽ പലതും വംശനാശഭീഷണി നേരിടുന്നവയാണ്‌.

മറ്റുള്ള ഉരഗങ്ങളെപ്പോലെ ആമകളും അവയുടെ ശരീരത്തിലെ ഊഷ്മാവ്(ശീത രക്തം) സമീപ പരിസ്ഥിതിക്കനുസരിച്ച് മാറ്റുന്നവയാണ്. ഇവയെ സാ‍ധാരണ ശീതരക്തമുള്ള ജീവികളായിട്ടാണ് അറിയപ്പെടുന്നത്. ഇവയും സാധാരണരീതിയിൽ വെള്ളത്തിലേയും, കരയിലേയും വായു ശ്വസിക്കുകയും ചെയ്യുന്നു. ഇവ മുട്ടയിടുന്നത് കരയിലാണ്.

കട്ടി കൂടിയ പുറന്തോട് കൂടിയതാണ് ആമകൾ. അവയുടെ തലയും നാല് കാലുകളും തോടിനുള്ളിലേക്ക് വലിച്ചെടുത്ത് സുരക്ഷിതമാകുവാൻ സാധിക്കുന്നതാണ്.ഇവയുടെ പുറന്തോട് നിർമ്മിച്ചിരിക്കുന്നത് പരസ്പര ബന്ധിതമായ 60 അസ്ഥികൾ കൊണ്ടാണ്.ആമയുടെ ശരാശരി ആയുസ്സ് സാധാരണ 90 – 150 വർഷമാണ്. എന്നാൽ ഇന്ത്യയിലെ ഏറ്റവും പ്രായം കൂടിയ ആമ അദ്വൈത മരിച്ചത് 255 വയസ്സുള്ളപ്പോൾ AD-2006-ൽ ആണ്. അതിന്റെ ജനനം AD-1750 ൽ ആയിരുന്നെന്നു ഗവേഷകർ പറയുന്നു. എങ്കിലും ഇക്കാര്യത്തിൽ ഭിന്നാഭിപ്രായങ്ങളുണ്ട്.

ഇവ വെള്ളം കുടിക്കുന്നത് മൂക്കിലൂടെയാണ്.ആൺ ആമകൾക്ക് പെൺ ആമകളേക്കാൾ വലിപ്പം കുറവാണ്.5 അടി നീളമുള്ള ആമകൾ ഉണ്ട്.ആമകൾക്ക് പല്ലുകളില്ല. പകരം ശക്തിയേറിയ ചുണ്ടുകളാണുള്ളത്.ആമ സസ്യഭുക്ക് ആണ്. വിവിധതരം പൂക്കൾ, ധാന്യങ്ങൾ, കിഴങ്ങുകൾ, വേരുകൾ, ഇലകൾ എന്നിവയാണ് ഇവയുടെ ഭക്ഷണം.ആമകൾ ജീവിതകാലം മുഴുവൻ വളർന്നുകൊണ്ടിരിക്കും.ആമകൾ രണ്ടു തരത്തിൽ ഉണ്ട് .കറുത്ത ആമ അഥവാകാരാമ,
വെളുത്ത ആമ അഥവാ വെള്ളാമ.

പെൺ ആമകൾ ഏകദേശം മുപ്പത് മുട്ടകൾ ഇടുന്നു.രാത്രിയാണ് ആമകൾ മുട്ടയിടുക.മണ്ണ്,മണൽ തുടങ്ങിയവ കൊണ്ട് അവ പൊതിഞ്ഞു സംരക്ഷിക്കും.അറുപതു മുതൽ നൂറ്റിയിരുപതു ദിവസങ്ങൾ വരെ മുട്ട വിരിയാൻ എടുക്കും.

ലോക ആമ ദിനത്തിന്റെ ഉദ്ദേശ്യം, ആമകളെയും കടലാമകളെയും കുറിച്ചുള്ള അറിവും പരിഗണനയും വർദ്ധിപ്പിക്കുക, ഒപ്പം ഇവയെ അതിജീവിക്കാനും അഭിവൃദ്ധി പ്രാപിക്കാനുമുള്ള പ്രവർത്തനങ്ങളെ പ്രോത്സാഹിപ്പിക്കുക എന്നിവയാണ്.