നെല്ലിക്ക പാനീയങ്ങൾ
_________
ആരോഗ്യം നിലനിർത്താനും രോഗങ്ങൾ വരാതിരിക്കുവാനും ജരാനരകൾ വേഗത്തിൽ ബാധിക്കാതിരിക്കാനും നെല്ലിക്ക ഔഷധമായും ആഹാരമായും നൂറ്റാണ്ടുകൾക്ക് മുൻപ് തന്നെ നമ്മുടെ പൂർവ്വികർ ഉപയോഗിച്ചു വന്നിരുന്നു. താളിയോലകളിലും സഹസ്രയോഗം തുടങ്ങിയ പുരാണ ആയുർവേദ ഗ്രന്ഥങ്ങളിലും നെല്ലിക്കയുടെ ഔഷധവീര്യവും മറ്റു ഗുണങ്ങളും വിവരിച്ചിട്ടുണ്ട്. ഇപ്പോൾഔഷധിയും വിവിധ നെല്ലിക്ക പാനീയങ്ങൾ തയ്യാറാക്കി ടോണിക്ക് രൂപത്തിൽ നൽകുന്നുണ്ട്.

അവയിൽ ചിലത്.
ഗ്രീൻബെറി
ചേരുവകൾ
നെല്ലിക്ക 100 ഗ്രാം
ഇന്തുപ്പ് ഒരു ഗ്രാം
പുതീനയില ഒരു ഗ്രാം
നിർമ്മാണം
നെല്ലിക്ക കുരു കളഞ്ഞെടുത്ത് പുതിനയിലയും ചേർത്ത് ജൂസറിലിട്ട് നീരെടുക്കുക.
പാത്രത്തിൽ ശേഖരിച്ച നെല്ലിക്കനീരിൽ
തിളപ്പിച്ചാറിയ ശുദ്ധജലം 200 മില്ലി ചേർക്കുക. പിന്നീട് ഇന്തുപ്പും ചേർത്ത് നല്ലതുപോലെ ഇളക്കി യോജിപ്പിച്ച ശേഷം കുടിക്കാവുന്നതാണ്.
ഗുണങ്ങൾ
മലബന്ധം, അതിയായ രക്തസമ്മർദ്ദം, വയർ വീർപ്പ് എന്നീ രോഗങ്ങൾ ഉള്ളവർക്ക് വളരെ ഫലപ്രദം.
പൊതുവെ രോഗപ്രതിരോധ ശേഷി വർദ്ധിക്കും.

ഡയബറ്റ് ബെറി
ചേരുവകൾ
നെല്ലിക്ക 100 ഗ്രാം
മഞ്ഞൾപ്പൊടി 2 ഗ്രാം
ഇന്തുപ്പ് ഒരു ഗ്രാം
പുതിനയില ഒരു ഗ്രാം
കുരുമുളക് പൊടി അര ഗ്രാം
വെള്ളം 200 മില്ലി

നിർമ്മാണം
കുരു കളഞ്ഞ നെല്ലിക്ക, പുതിനയില എന്നിവ ജ്യൂസറിലിട്ട് നീരെടുത്ത് അതിൽ 200 മില്ലി തിളപ്പിച്ചാറ്റിയ ശുദ്ധജലം ചേർക്കുക. തുടർന്ന് കുരുമുളക് പൊടിയും ഇന്തുപ്പ് പൊടിയും ചേർത്ത് ഇളക്കി യോജിപ്പിച്ച് കുടിക്കാം.
ഗുണങ്ങൾ
പ്രമേഹ രോഗികൾക്ക് അത്യുത്തമം.
ക്യാരറ്റ് ബെറി
ചേരുവകൾ
നെല്ലിക്ക 100 ഗ്രാം
ക്യാരറ്റ് 200 ഗ്രാം
പുതിനയില ഒരു ഗ്രാം
പഞ്ചസാര ആവശ്യത്തിന്
വെളളം 200 മില്ലി
നിർമ്മാണം
കുരു കളഞ്ഞ നെല്ലിക്ക, ക്യാരറ്റ്, പുതിനയില എന്നിവ ജ്യൂസറിലിട്ട് നീരെടു ക്കുക.അതിൽ തിളപ്പിച്ചാറ്റിയ 200 മില്ലി വെളളം ചേർത്ത് കുടിക്കാം.
ഗുണങ്ങൾ

ശരീര സൗന്ദര്യത്തിനും, ഹൃദയ സംബന്ധമായ അസുഖങ്ങൾ വരാതിരിക്കാനും ഉത്തമം.
കൂൾബെറി
ചേരുവകൾ
നെല്ലിക്ക100 ഗ്രാം
വെളളരിക്ക 150 ഗ്രാം
ഇഞ്ചി 3 ഗ്രാം
പുതിനയില ഒരു ഗ്രാം
പഞ്ചസാരപ്പൊടി ആവശ്യത്തിന്
വെള്ളം 200 മില്ലി.

നിർമ്മാണം
കുരു കളഞ്ഞ നെല്ലിക്കയും, വെളളരിക്കയും, പുതിനയിലയും, ഇഞ്ചിയും ചേർത്ത് ജ്യൂസറിലിട്ട് നീരെടു ക്കുക. തിളപ്പിച്ചാറ്റിയ ശുദ്ധജലം 200 മില്ലി ചേർത്ത് നേർപ്പിച്ച ശേഷം ആവശ്യത്തിന് പഞ്ചസാരയും ചേർത്ത് കഴിക്കാം.

ഗുണങ്ങൾ

ശരീരത്തിന് നല്ല തണുപ്പും, ക്ഷീണമകറ്റാനും, രോഗപ്രതിരോധ ശേഷിക്കും ഉപകരിക്കും.

നാം വളർത്തുന്ന ചെടികൾക്ക് ഉണർവ്വും ഉന്മേഷവും രോഗ – കീട പ്രതിരോധ ശേഷിയും നൽകുന്നതിന് വൃക്ഷായുർവേദത്തിൽ നിർദ്ദേശിക്കുന്ന ഒരു സിദ്ധൗഷധമാണ് ഹരിത കഷായം.
വയനാട് എം.എസ്. സ്വാമിനാഥൻ ഗവേഷണ കേന്ദ്രം ഇത് കർഷകരുടെ ഇടയിൽ വ്യാപകമായി പ്രചരിപ്പിക്കുകയും ചെയ്തു വരുന്നുണ്ട്. റിസൾട്ട് വളരെ തൃപ്തികരമായിരുന്നു.

ആദ്യമായി നമുടെ സമീപ പ്രദേശങ്ങളിൽ നിന്നും കീടബാധ പൊതുവെ ഏൽക്കാത്ത ഏതെങ്കിലും പത്ത് തരം സസ്യങ്ങളുടെ ഇലകൾ ശേഖരിക്കണം.
കാഞ്ഞിരം, കിരിയാത്ത്,കാട്ട് പുകയില,പച്ചക്കർപ്പൂരം,കൂവളം, കർപ്പൂര തുളസി, കൊങ്ങിണി (അരിപ്പൂ ), പാണൽ , ആര്യവേപ്പ്, കരിനൊച്ചി, ആടലോടകം, അരളി, കമ്മൽപ്പൂ
തുടങ്ങി അസഹ്യമായ ഗന്ധമുള്ളതും ചവർപ്പ് അല്ലെങ്കിൽ കയ്പ്പ് രസ പ്രധാനികളുമായ ഇലകളാണ് നല്ലത്. മേൽ കാണിച്ചതോ അല്ലെങ്കിൽ മറ്റുള്ളവയോ ഏതെങ്കിലും പത്ത് സസ്യങ്ങളുടെ ഇലയും ഇളം തണ്ടുകളും ഏതാണ്ട് 20 കി.ഗ്രാം എടുത്ത് കഷായത്തിന് തറിക്കുന്നതു പോലെ ചെറുകഷണങ്ങളാക്കി വെക്കണം.പുല്ല് വർഗ്ഗത്തിൽ പെട്ടതും പൊട്ടിച്ചാൽ അഥവാ ഒടിച്ചാൽ പാൽ വരുന്നതുമായ ചെടികൾ കഷായ കൂട്ടിന് പറ്റിയതല്ല.നാടൻ പശുവിന്റെ പച്ചച്ചാണകം 10 കി.ഗ്രാം, മുളപ്പിച്ച വൻപയർ (മമ്പയർ ) 2 കി.ഗ്രാം , കറുത്ത വെല്ലം 3 കി.ഗ്രാം എന്നിവ കൂടി കഷായക്കൂട്ടിന് കരുതി വെക്കണം.

200 ലിറ്റർ ശേഷിയുളള ഒരു ബാരലിൽ ആദ്യം കുറച്ച് പച്ചച്ചാണകം വിതറിയിടണം. അതിന് മുകളിൽ രണ്ടു പിടി അരിഞ്ഞ ഇലകൾ ഇടണം. തുടർന്ന് മുളപ്പിച്ച പയറും വെല്ലവും ഇടണം. ഈ ക്രമത്തിൽ പല അടുക്കുകളായി ബാരലിൽ നിക്ഷേപിക്കണം.തുടർന്നു 100 ലിറ്റർ വെളളമൊഴിക്കണം. 10 ദിവസം അടച്ചു വെക്കണം.എല്ലാ ദിവസവും കാലത്ത് പത്ത് പ്രാവശ്യം വലത്തോട്ട് ഇളക്കണം.രണ്ടാഴ്ചക്ക് ശേഷം അരിച്ചു കിട്ടുന്ന പത്തില കഷായം ചെടികൾക്ക് ഒഴിച്ചു കൊടുക്കു കയോ തളിച്ചു കൊടുക്കുകയോ ചെയ്യാം.100 മില്ലി കഷായം ഒരു ലിറ്റർ വെള്ളത്തിൽ കലർത്തി ചെടിക്ക് ചുറ്റും ഒഴിക്കാനുളള ലായനി തയ്യാറാക്കാം.50 മില്ലി കഷായം ഒരു ലിറ്റർ വെളളത്തിൽ എന്ന തോതിൽ കലർത്തി ഇലകളിൽ സ്പ്രേ ചെയ്യാനുളള ലായനി തയ്യാറാക്കാം.

MKP മാവിലായി

പത്ര പ്രവർത്തക യൂണിയൻ മാധ്യമ പ്രവർത്തകർക്കും ജീവനക്കാർക്കുമായി തുടങ്ങുന്ന ഗ്രാമ സൗഹൃദകർഷക ചന്ത ഇന്ന് [1.06.202l ചൊവ്വ ] കേസരി മന്ദിരത്തിനടുത്തുള്ള പി.ആൻ്റ് റ്റി ഹൗസിൽ ആരംഭിക്കുകയാണ്. വിഷ രഹിത പച്ചക്കറി ന്യായ വിലയിൽ ലഭ്യമാക്കുകയാണ് ഉദ്ദേശം.

ഉച്ചക്ക് രണ്ടിന് കൃഷി മന്ത്രി പി പ്രസാദ് ഉദ്ഘാടനം ചെയ്യും. ആനാട് ഗ്രാമത്തിലെ കർഷകരാണ് അവർ വിളയിച്ച പച്ചക്കറിയുമായെത്തുന്നത്.

വരിക്കചക്ക, കോട്ടുർകോണം മാങ്ങ, തേങ്ങ, പയർ, പാവയ്ക്ക, വെള്ളരി, പടവലം, സലാഡ് വെള്ളരി, ഇഞ്ചി, പച്ചഏത്തയ്ക്ക, കൂമ്പ്, വാഴപിണ്ടി, ഏത്തപ്പഴം, കപ്പപഴം, മരച്ചീനി, തേൻ, മുട്ട, കാടമുട്ട, അമ്മച്ചി ചക്ക വറ്റൽ എന്നിവ എത്തിക്കുമെന്നാണ് അറിയിച്ചിരിക്കുന്നത്. മാധ്യമ സുഹൃത്തുക്കളും ജീവനക്കാരും ഈ സംരംഭത്തോട് സഹകരിക്കണമെന്ന് അഭ്യർത്ഥിക്കുന്നു.

കേരളത്തിലെ തെരുവോരങ്ങളിലും പറമ്പുകളില്‍ ആര്‍ക്കും വേണ്ടാതെ കിടന്നിരുന്ന ഞ്ഞൊട്ടാഞ്ഞൊടിയന്‍ പഴം, ഇന്ന് വിദേശ വിപണിയിലെ താരമാണ്. നാം അവഗണിച്ച ഒരു കാട്ടുചെടി പഴത്തിന്റെ പോഷക മൂല്യവും ഔഷധ മൂല്യവും തിരിച്ചറിഞ്ഞ വിദേശികള്‍ വന്‍വില നല്‍കിയാണ് ഇവ കൈവശമാക്കുന്നത്. കേരളത്തില്‍ ഞൊട്ടാഞൊടിയന്‍ എന്ന് വിളിക്കുന്ന കാട്ട് ചെടി പഴത്തിന് തന്നെ വിവിധ പേരുകളാണ്. മൊട്ടാബ്ലി, മുട്ടാംബ്ലിങ്ങ,ഞൊറിഞ്ചൊട്ട, മുട്ടമ്പുളി, ഞൊട്ടയ്ക്ക എന്നിങ്ങനെ വിവിധ പേരുകളില്‍ അറിയപ്പെടുന്ന ഈ പഴത്തിന്റെ ശാസ്ത്രീയ നാമം ഫൈസിലിസ് മിനിമ എന്നാണ്. ഇംഗ്ലീഷില്‍ ഗോള്‍ഡന്‍ബെറി എന്നാണറിയപ്പെടുന്നത്.

നാട്ടിന്‍പുറങ്ങളിലെ തൊടികളിലെ സാന്നിദ്ധ്യമായിരുന്ന ഈ ചെടിയിലെ കായ് അടര്‍ത്തിയെടുത്ത് നെറ്റിയില്‍ ഇടിച്ച് പൊട്ടിച്ച് ശബ്ദമുണ്ടാക്കുന്നത് ഒരു തലമുറയുടെ ഗൃഹാതുരമായ ഓര്‍മ്മയാണ്. പാഴ്‌ചെടികളുടെ പട്ടികയില്‍ മലയാളി പെടുത്തിയ ഈ ചെടിയുടെ പഴത്തിന് ഒന്നിന് 17 രൂപയാണ് വില. യു.എ.ഇയില്‍ 10 എണ്ണത്തിന്റെ ഒരു പാക്കറ്റിന് ഒമ്പത് ദിര്‍ഹമാണ് വില. എന്നാല്‍, ശരീരവളര്‍ച്ചയ്ക്കും ബുദ്ധിവികാസത്തിനും മുതല്‍ വൃക്കരോഗത്തിനും മൂത്രതടസത്തിനും വരെ ഈ പഴം ഉത്തമമാണെന്ന വിശ്വാസത്തില്‍ ആവശ്യക്കാര്‍ ഏറി വരികയാണ് യു.എ.ഇയില്‍ അതിനാല്‍ തന്നെ കായികതാരങ്ങള്‍ ആരോഗ്യ ഊര്‍ജ്ജ സ്വലതക്കായി ഇത് ഉപയോഗിക്കുന്നു.

മഴക്കാലത്താണ് ഈ ചെടി മുളയ്ക്കുന്നതും പൂക്കുന്നതും കായ്ക്കുന്നതും. പച്ച കായ്ക്ക് ചവര്‍പ്പ് രുചിയാണെങ്കില്‍, പഴുത്താല്‍ പുളി കലര്‍ന്ന മധുരമുള്ള രുചിയായിരിക്കും. വേനലില്‍ ചെടി കരിഞ്ഞ് പോകും. ഇതിന്റെ സാമ്പത്തിക ഔഷധ പ്രധാന്യം ഇപ്പോഴും നമുക്ക് അജ്ഞാതമാണ്. എന്നാല്‍ വിദേശങ്ങളില്‍ ആവശ്യക്കാര്‍ കൂടിയത് പുതിയ സാധ്യതകളാണ് കര്‍ഷകര്‍ക്കും മറ്റും മുന്നില്‍ തുറന്നിടുന്നത്.

പുരാതന കാലം മുതല്‍ ഔഷധ നിര്‍മിതികള്‍ക്ക് ഈ ചെടി ഉപയോഗിച്ചിരുന്നതായി രേഖപ്പെടുത്തിയിട്ടുണ്ട്. കര്‍ക്കടക മാസത്തിലെ ഔഷധ കഞ്ഞിയിലും ഇത് ഉപയോഗിച്ചിരുന്നു. കുട്ടികളിലെ ത്വക്ക് രോഗങ്ങള്‍ക്ക് ഏറ്റവും ഫലപ്രദമായ ഔഷധമാണിതെന്നാണ് ആയുര്‍വേദ ചികിത്സാ ഗ്രന്ഥങ്ങളില്‍ രേഖപ്പെടുത്തിയിരിക്കുന്നത്. ലിവറും കിഡ്‌നിയും സംരംക്ഷിക്കുന്നതോടൊപ്പം ആസ്തമ ,കണ്ണിന്റെ കാഴ്ച ശക്തി കൂട്ടാനും ഈ ഫലം ഫലപ്രദമാണ്.

MKP മാവിലായി

നമ്മുടെ വീട്ടുവളപ്പില്‍ എളുപ്പത്തില്‍ കൃഷി ചെയ്യാന്‍ കഴിയുന്ന കോവയ്ക്കയില്‍ രുചിയും ഗുണവും ഒരുപോലെ അടങ്ങിയിട്ടുണ്ട്. അയണ്‍, വിറ്റാമിന്‍ സി, ബി, ബി2, ബി3, കാല്‍സ്യം, പ്രോട്ടീന്‍, കാര്‍ബോഹൈഡ്രേറ്റുകള്‍, പൊട്ടാസ്യം എന്നിവയാല്‍ സമൃദ്ധമാണ് കോവയ്ക്ക.

ശരീരത്തിലെ മാലിന്യത്തെ ഇല്ലാതാക്കി ശരീരം സംരക്ഷിക്കാനുള്ള കഴിവ് കോവയ്ക്കക്കുണ്ട്. പ്രകൃതിദത്തമായ ഇന്‍സുലിന്‍ എന്ന വിശേഷണമുള്ള കോവയ്ക്ക പാന്‍ക്രിയാസിലെ ബീറ്റാ കോശങ്ങളെ ഉത്തേജിപ്പിച്ച്‌ ഇന്‍സുലിന്‍ ഉത്പാദനം കൂട്ടുന്നു. അതിനാല്‍ പ്രമേഹ രോഗികള്‍ക്ക് ഇവ ശീലമാക്കാം.രക്തസമ്മര്‍ദ്ദം, ഹൃദയസംബന്ധമായ അസുഖങ്ങള്‍, വൃക്കാരോഗ്യം എന്നിവ നിയന്ത്രിക്കാനും കോവയ്ക്ക ഉത്തമമാണ്.
കോവയ്ക്കയില്‍ അടങ്ങിയിട്ടുള്ള നാരുകള്‍ ദഹനം എളുപ്പമാക്കുകയും ആന്റി ഓക്സിഡന്റുകള്‍ രോഗപ്രതിരോധ ശേഷി വര്‍ദ്ധിപ്പിക്കുകയും ചെയ്യുന്നു. കോവയ്ക്കയുടെ ഇലയ്ക്കും ഔഷധഗുണം ഏറെയാണ്.

വെള്ളരിയിനത്തില്‍ പെട്ട, അടുക്കളതോട്ടത്തില്‍ സാധാരണയായി വളരുന്ന ഒരു പച്ചക്കറിയാണ് ചുരയ്ക്ക.പാടത്തൊക്കെ പയറിനും കപ്പയ്ക്കുമൊക്കെ ഇടവിളയായി കൃഷി ചെയ്യാറുണ്ട്. ഔഷധ ഗുണം ഏറെയുള്ള ചുരയ്ക്ക ജീവകം ബിയുടെ കലവറയാണ്.ജനേരിയ സൈസറേറിയ എന്ന ശാസ്ത്രനാമത്തില്‍ അറിയപ്പെടുന്ന ചുരയ്ക്ക ഇന്ത്യയിലും , മൊളുക്കാസ്, എതോപ്യ എന്നിവിടങ്ങളില്‍ ധാരാളമായി കൃഷി ചെയ്യുന്നുണ്ട്.

ജനുവരി-മാർച്ച്, സെപ്റ്റംബർ – ഡിസംബർ മാസങ്ങളാണ് ചുരയ്ക്ക കൃഷി ചെയ്യാൻ ഏറ്റവും നല്ല സമയം. മഴയെ മാത്രം ആശ്രയിച്ച് കൃഷി ചെയ്യുകയാണെങ്കിൽ മെയ് – ജൂൺ മാസങ്ങളിൽ നടാം.പൂസ സമ്മർ പ്രൊലിഫിക് ലോംഗ്, അർക്ക ബഹാർ എന്നിവയാണ് പ്രധാന ഇനങ്ങൾ.ചുരക്ക തണ്ട് ആയുർവേദ ഔഷധ നിർമാണത്തിലെ ഔഷധിയാണ്. ചുരക്കയെക്കുറിച്ച് പല ആയുർവേദ ഗ്രന്ഥങ്ങളിൽ പറയുന്നു

വിത്ത്‌ നേരിട്ട് പാകിയാണ് ചുരയ്ക്ക കൃഷിചെയ്യുന്നത്.ഒരു സെന്റിന് 12 മുതൽ 16 ഗ്രാം വരെ വിത്ത് വേണ്ടിവരും. 60 സെന്റീമീറ്റർ വ്യാസവും 30 മുതൽ 45 മീറ്റർ ആഴവുമുള്ള കുഴികളിലാണ് ചുരയ്ക്ക നടേണ്ടത്. പന്തലിൽ പടർത്തി വളർത്തുമ്പോൾ ചെടികൾ തമ്മിലും വരികൾ തമ്മിലും മൂന്നു മീറ്റർ അകലം പാലിക്കണം. നിലത്ത് പടർന്നു വളരുന്നതിന് വരികൾ തമ്മിൽ 3-4 മീറ്ററും ചെടികൾ തമ്മിൽ രണ്ട് മീറ്ററും അകലം പാലിക്കാം.കമ്പോസ്റ്റും ജൈവവളങ്ങളും ചാണകവും മേൽമണ്ണുമായി ചേർത്ത് നിറച്ച കുഴികളിൽ നാലഞ്ച് വിത്തുകൾ പാകാം. വിത്ത് പാകുന്നതിന് രണ്ടാഴ്ച മുൻപ് മണ്ണിൽ കുമ്മായം ചേർത്ത് ഇളക്കാൻ മറക്കരുത്.ഒരു തടത്തിന് അഞ്ച് കിലോഗ്രാം ചാണകം, 100 ഗ്രാം എല്ലുപൊടി എന്നിവ ചേർക്കുന്നത് വളരെ നല്ലതാണ്. നാലഞ്ച് ദിവസത്തിനുള്ളിൽ വിത്തുകൾ മുളക്കും. മുളച്ചുവന്ന തൈകളിൽ ഏറ്റവും ആരോഗ്യമുള്ള മൂന്നെണ്ണം നിലനിർത്തി ബാക്കിയുള്ളവ പിഴുതുമാറ്റാം.

കൃത്യമായി നനയ്ക്കാൻ ശ്രദ്ധിക്കണം. രണ്ടാഴ്ച ഇടവിട്ട് ജൈവവളങ്ങൾ നൽകുന്നത് നല്ലതാണ്. ഫിഷ് അമിനോ ആസിഡ്, എഗ്ഗ് അമിനോആസിഡ്, പിണ്ണാക്ക് ലായനി തുടങ്ങിയവ പത്ര പോഷണം വഴി നൽകാം.നട്ട് രണ്ടുമാസത്തിനുള്ളിൽ കായകൾ വിളവെടുക്കാം. മൂപ്പെത്താത്ത ഇളം കായകളാണ് വിളവെടുക്കേണ്ടത്.

കറിവേപ്പ് എല്ലാ വീട്ടുപറമ്പിലും നിര്‍ബന്ധമായി നടേണ്ട ഒന്നാണ്. ഇന്ത്യയില്‍ പലയിനം കറിവേപ്പ് നിലവിലുണ്ട്. വലുതും ചെറുതുമായ ഇലകള്‍ തരുന്ന ഇനങ്ങള്‍ പ്രചാരത്തിലുണ്ട്. നാടന്‍ ഇനങ്ങള്‍ക്കുപുറമേ, തമിഴ്‌നാട്, കര്‍ണാടകം, മഹാരാഷ്ട്ര എന്നിവിടങ്ങളില്‍ ചില ഉയരംകുറഞ്ഞ ഇനങ്ങള്‍ വലിയതോതില്‍ കൃഷിയിറക്കിവരുന്നുണ്ട്. ‘സുവാസിനി’ നല്ല മണമുള്ള മികച്ച കറിവേപ്പാണ്. കറിവേപ്പില നല്ല മരുന്നാണ്. ഇതിന്റെ ഇലയും വേരും തൊലിയുമെല്ലാം ഔഷധമാണ്. ഇലക്കറിയാക്കിയും വേപ്പിലക്കട്ടിയാക്കിയും വേപ്പിലച്ചമ്മന്തിയും നല്ലതാണ്.

കറിവേപ്പില നാട്ടുവൈദ്യത്തിലും മുന്നിലാണ്. ഓരോ വീട്ടിലും ഒരു കറിവേപ്പ്’ എന്ന രീതി നാം ശീലിക്കണം. നീര്‍വാര്‍ച്ചയുള്ള എല്ലാ മണ്ണിലും കറിവേപ്പ് നടാം. വിത്ത് പാകി, കിളിര്‍പ്പിച്ചും വേരില്‍നിന്ന് അടര്‍ത്തിയ തൈ നട്ടും കറിവേപ്പ് വളര്‍ത്താം.
30 മുതല്‍ 45 സെന്റീമീറ്റര്‍ നീളം, വീതി, ആഴമുള്ള കുഴിയുണ്ടാക്കി മണ്ണും കാലിവളവും മണ്ണിരക്കമ്പോസ്റ്റും ചേര്‍ത്തിളക്കി തൈകള്‍ നടണം. കുഴിയില്‍ ആവശ്യത്തിന് നീര്‍വാര്‍ച്ചകിട്ടാന്‍, മണലും ചേര്‍ക്കാം. വൈകിട്ട് തൈനടുന്നതാണ് നല്ലത്. കറിവേപ്പിന് നല്ലത്, ഉണങ്ങിയ കാലിവളപ്പൊടി, ആട്ടിന്‍കാഷ്ഠം, വേപ്പിന്‍പിണ്ണാക്ക്, മണ്ണിരവളം ഇവയാണ്.
കൂടുതലായി കറിവേപ്പുതൈ വെക്കുന്ന അവസരത്തില്‍ തൈകള്‍ തമ്മില്‍ ഒന്നരമീറ്റര്‍ മുതല്‍ രണ്ടുമീറ്റര്‍വരെ അകലം നല്‍കാം. ഒരു ചെടിക്ക് വര്‍ഷത്തില്‍ 10 കി.ഗ്രാം കാലിവളം, 130 ഗ്രാം യൂറിയ, 400 ഗ്രാം മസൂറിഫോസ് 70 ഗ്രാം മ്യൂറിയേറ്റ് ഓഫ് പൊട്ടാഷ് എന്നിവ ചുവട്ടില്‍ ചേര്‍ക്കണം. വേനലില്‍ നന്നായി നനയ്ക്കണം. ഒരു മീറ്റര്‍ പൊക്കമായാല്‍ ചിലര്‍ മുകളറ്റം വെട്ടി നിര്‍ത്താറുണ്ട്. ഇതുവഴി നിറയെ ഉപശാഖകള്‍ വളരും.
ഒന്നരവര്‍ഷം പ്രായമുള്ള മരത്തില്‍നിന്ന് ഇല നുള്ളാം. ശരാശരി നാല് വര്‍ഷം പ്രായമായ ചെടിയില്‍നിന്ന് 100 കിലോഗ്രാംവരെ ഇലകിട്ടും. ചെടിച്ചുവട്ടില്‍ വേനലില്‍ പുതയിട്ട് നന്നായി നനച്ചാല്‍ നല്ലവണ്ണം ഇലകിളിര്‍ക്കും.

ചീരയും തക്കാളിയും ഒഴികെ ഒട്ടുമിക്ക പച്ചക്കറിവിളകളും മഴക്കാലത്ത് കൃഷി ചെയ്യാവുന്നതാണ്.മഴക്കാലത്ത് കൃഷിചെയ്യാൻ ഏറ്റവും അനുയോജ്യമായ ഒരു വിളയാണ് വെണ്ട. മഴക്കാല സമയങ്ങളിൽ വെണ്ടയ്ക്കു കേടുവളരെ കുറവായിരിക്കും മാത്രമല്ല നല്ല വിളവും ലഭിക്കുന്നതാണ്. ഉയർന്ന തടങ്ങളിലോ വാരങ്ങളിലോ വിത്തു പാകി മുളപ്പിക്കാവുന്നതാണ്. കൂടാതെ മുളക്, വഴുതന, ഇവയുടെ തൈകളും മഴക്കാലത്ത് കൃഷിക്കനുയോജ്യമാണ്.വെണ്ടകൃഷി മഴക്കാലത്ത് വളരെ നല്ലതാണ് കാരണം വെണ്ട കൃഷിയുടെ പ്രധാന ഭീക്ഷണിയായ മഞ്ഞളിപ്പ് രോഗം പരത്തുന്ന വെള്ളീച്ചകൾ മഴക്കാലത്ത് വളരെ കുറവായിരിക്കും
രണ്ടാമതായി കൃഷി ചെയ്യാൻ ഏറ്റവും അനുയോജ്യം മുളകാണ് നമ്മുടെ വീടുകളിൽ ഒഴിവാക്കാനാവാത്ത പച്ചക്കറി വിളയാണ് മുളക്. പച്ചമുളകായും ഉണക്കിയുമെല്ലാം നാം ഉപയോഗിക്കുന്നുണ്ട്. ഏതു സമയത്തും മുളക് കൃഷി ചെയ്യാമെങ്കിലും മഴക്കാലം തീർത്തും അനുയോജ്യമായ കാലമാണ്. വെള്ളം കെട്ടി നിൽക്കാതെ കൃഷി ചെയ്യാനായാൽ മുളക് നല്ല വിളവു നൽകും. നീരുറ്റിക്കുടിക്കുന്ന പ്രാണികളുടെ എണ്ണത്തിൽ കാണുന്ന കുറവാണ് ഇതിനു കാരണം. കാന്താരിയും മെയ്‌ മാസം കൃഷിക്ക് വളരെ അനുയോജ്യമാണ്. മൂന്നാമതായി കൃഷിക്ക് അനുയോജ്യം വഴുതനയാണ് മെയ്‌, ജൂൺ മാസമാണ് തൈകൾ പറിച്ചുനടാൻ ഉചിതം. നല്ല ഇനങ്ങൾ നടാൻ പ്രത്യേകം ശ്രദ്ധിക്കണം. പാവൽ, പടവലം കുമ്പളം, മത്തൻ എന്നിവ മഴക്കാല കൃഷിക്കുപറ്റിയ വെള്ളരി വർഗ്ഗമാണ്, പാവലിനും പടവലത്തിനും ചാണകം അടി വളമായി നൽകുന്നത് ഉത്തമമാണ്.
പച്ചചീരയും കൃഷി ചെയ്യാൻ ഉൾപെടുത്താവുന്നതാണ്, കോവൽ തണ്ടുകളും നട്ടുകൊടുക്കാം. ജൈവജീവാണുകുമിൾ നാശിനിയുടെ ഉപയോഗം തുടക്കത്തിലെ ഉള്ള കൃഷിയിലെ രോഗ ബാധകളെ ഒഴിവാക്കാൻ സഹായിക്കുന്ന ഒന്നാണ്. അങ്ങനെ മഴക്കാലത്തും നമ്മുടെ തോട്ടങ്ങളിലും നമുക്കാവശ്യമായ നിത്യോപയോഗ പച്ചക്കറികൾ കൃഷി ചെയ്ത് വിളവെടുക്കാൻ നമുക്ക് സാധിക്കും.