എം കെ പി മാവിലായി

ഹരിത വിപ്ലവം ആർത്തി വിപ്ലവമായതോടെ നമ്മുടെ മണ്ണും വിണ്ണും വിഷലിപ്തമായി. വളമായും ഉത്തേജക വസ്തുവായും രോഗകീട നാശിനിയായും ഉരുത്തിരിഞ്ഞ രാസ സംയുക്തങ്ങളുടെ പാർശ്വഫലത്തേക്കുറിച്ചോ വരുംതലമുറയുടെ ഭാവിയെ കുറിച്ചോ ചിന്തിക്കാൻ ആരും തയ്യാറായില്ല. ഹരിത വിപ്ലവം ഭാരത മണ്ണിലേക്കിറങ്ങി വന്നത് സർവ സംഹാരിയും കൊണ്ടാണ്. ഏതാനും ശത്രുകീടങ്ങളെ തുരത്താൻ എത്രയോ മിത്ര ജീവികളെയാണ് നാം കൊന്നൊടുക്കിയത്. ഹരിത വിപ്ലവത്തിന്റെ പേരിൽ 72000 ടൺ കീടനാശിനികളാണ് ഇന്ത്യൻ കർഷകർക്കിടയിൽ വിതരണം ചെയ്യപ്പെട്ടത്. വിദഗ്ദ്ധർ നിർദ്ദേശിക്കപ്പെട്ടതിന്റേയും പതിന്മടങ്ങ് കീടനാശിനികളാണ് നമ്മുടെ പാടത്തും പറമ്പത്തും പ്രയോഗിച്ച് വന്നത്.
പച്ചക്കറിയിലെ വിഷാംശത്തിന്റെ തോത് കണ്ടുപിടിക്കാനുളള പദ്ധതി കാർഷിക സർവ്വകലാശാല ഏതാനും വർഷം മുമ്പ് ആരംഭിച്ചിരുന്നു. ഞെട്ടിക്കുന്നതാണ് പരിശോധനാ ഫലങ്ങൾ. അനുവദനീയമായതിന്റെ എത്രയോ മടങ്ങിലാണ് കീടനാശിനി പ്രയോഗം. പച്ചക്കറിയിലും പഴവർഗ്ഗങ്ങളിലും കിഴങ്ങ് വർഗ്ഗങ്ങളിലുമെല്ലാം നിരോധിച്ച കീടനാശിനികളുടെ അശമുള്ളതായി ഫുഡ് സേഫ്റ്റി ആന്റ് സ്റ്റാൻഡേർഡ്സ് അതോറിറ്റി ഓഫ് ഇന്ത്യയുടെ പഠനത്തിലും തെളിഞ്ഞിട്ടുണ്ട്. കൃഷിയിടങ്ങളെ വിഷലിപ്തമാക്കുന്ന രാസ കീടനാശിനി പ്രയോഗം മരുന്നു തളി നടത്തുന്നവർക്കും അത്തരം കൃഷിയിടങ്ങളിൽ ജോലി ചെയ്യുന്ന തൊഴിലാളികളുടെ ആരോഗ്യത്തിനും കടുത്ത ഭീഷണിയാണ്. തത്വദീക്ഷയില്ലാത്ത രാസകീടനാശിനി പ്രയോഗം പരിസ്ഥിതി ക്കേൽപ്പിച്ച പ്രത്യാഘാതങ്ങളും ദുരിതപൂർണ്ണമാണ്.

പാരിസ്ഥിതിക ആരോഗ്യ പ്രശ്നങ്ങളൊന്നും സൃഷ്ടിക്കാതെ കാർഷിക വിളകളെ സംരക്ഷിക്കുവാനുള്ള വഴികൾ നമ്മുടെ നാട്ടറിവുകളിലുണ്ട്. ഇത്തരം അറിവുകളിലൂടെ ഒട്ടേറെ പ്രകൃതിദത്ത ജൈവ കീട- കുമിൾനാശിനികളും ഇന്ന് ഉരുത്തിരിച്ചെടുത്തിട്ടുണ്ട്.മണ്ണിന്റെ വളക്കൂറ് സ്ഥായിയായി നിലനിർത്താനും മണ്ണിലെ അണുജീവികളുടെ പ്രവർത്തനം ത്വരിതപ്പെടുത്താനും മണ്ണിന്റെ ജലസംഭരണശേഷി വർദ്ധിപ്പിക്കുന്നതിനും , മണ്ണിലെ താപനില ക്രമീകരിക്കാനും , മണ്ണിലെവായു പ്രവേശം സുഗമമാക്കാനും സസ്യങ്ങൾക്കാവശ്യമായ സൂക്ഷ്മ മൂലങ്ങൾ ഉൾപ്പെടെയുള്ള എല്ലാ സസ്യ മൂലകങ്ങളും ലഭ്യമാക്കാനും മണ്ണിന്റെ ഭൗതിക ഗുണങ്ങൾ നിലനിർത്താനും പ്രകൃതിയിൽ നിന്നും ലൂമാകുന്ന ജന്തുസസ്യാദികളുടെ അവശിഷ്ടങ്ങളായിരുന്നു ഉപയോഗപ്പെടുത്തിയിരുന്നത്. ചപ്പും ചവറും ചാണകവും ചാരവും ചണ്ടിയും എല്ലാം ഇതിൽ ഉൾപ്പെടും.കീടരോഗബാധകളെ അകറ്റാൻ അഷ്ട വിദ്യകളാണ് ഉപയോഗപ്പെടുത്തിയിരുന്നത്.
താപം, ദീപം, ധൂപം, ലേപം, മൂത്രം, മിത്രം, കുസുമം, ഭസ്മം എന്നിവയായിരുന്നു അഷ്ട വിദ്യകൾ.കീടരോഗബാധയുളള ചെടികളെ നിയന്ത്രിത ചൂടേൽപ്പിച്ച് രോഗകീട നിയന്ത്രണം വരുത്തുകയാണ് ‘താപം ‘ എന്ന രീതിയിൽ . ഉദാഹരണത്തിന് കറിവേപ്പിലക്ക് കീട ബാധയുളളപ്പോൾ രാത്രി കാലത്ത് ചൂട്ട് കത്തിച്ച് ചെറുതായി പുഴു ബാധയുളള ഇടങ്ങളിൽ ചൂടാക്കുന്ന തോടെ മൃദുല ശരീരികളായ കീടങ്ങൾ ചൂടേറ്റ് നശിക്കുന്നു.

‘ദീപം’ എന്ന രീതി കൊണ്ടുദ്ദേശിക്കുന്നത് കൃഷിയിടങ്ങളിൽ ചിലയിടത്ത് കരിയിലകളും ചപ്പുചവറുകളും കൂട്ടിയിട്ട് സന്ധ്യാവേളകളിൽ തീയിടുന്ന രീതിയാണ്. വെളിച്ച ക്കെണി വെക്കുന്നതും മറ്റൊരു മാർഗ്ഗമാണ്. പ്രാണികളെ ക്ഷണിച്ചു വരുത്തി നശിപ്പിക്കുന്നതിനും കൃഷിയിടം വൃത്തിയായി സൂക്ഷിക്കുന്നതിനും ഈ രീതി കൊണ്ട് സാധിച്ചിരുന്നു.
‘ധൂപ’മാണ് . മറ്റൊരു മാർഗ്ഗം. അതായത് പുകയിടൽ. രൂക്ഷ ഗന്ധമുള്ള കമ്യൂണിസ്റ്റ് പച്ച, കൈനാറിപ്പച്ച എന്നീ കളകൾ പറിച്ചെടുത്ത് ഒരു ദിവസം വെയിലത്തിട്ട് വാട്ടിയെടുത്ത് പുകയ്ക്കുന്നതിലൂടെ കളകളുടെ വിനാശവും വിളകളുടെ പരിരക്ഷയും ഉറപ്പാക്കിയിരുന്നു. കുന്തിരിക്കം , അഷ്ടഗന്ധം, ഗന്ധകം , ചകിരിത്തൊണ്ട് തുടങ്ങിയവ കൊണ്ടുള്ള ധൂപവും നിലവിലുണ്ടായിരുന്നു.’ ലേപം ‘ എന്ന രീതി കൊണ്ടുദ്ദേശിക്കുന്നത് സസ്യങ്ങൾക്ക് ഏതെങ്കിലും ഭാഗത്ത് കേട് വന്നാൽ ആഭാഗം ചെത്തി മാറ്റി പ്രസ്തുത ഭാഗത്ത് പ്രത്യേക രീതിയിൽ തയ്യാറാക്കുന്ന ഇലച്ചാറുകളോ , ആവണക്കെണ്ണ, വേപ്പെണ്ണ, താർ, കരിഓയിൽ എന്നിവയിൽ ഒന്ന് പുരട്ടുന്നതും അല്ലെങ്കിൽ ഇവയിലൊന്ന് ചേർത്ത് കുഴച്ച കളിമണ്ണ് പുരട്ടുന്നതും ഈ രീതിയുടെ ഭാഗമായിരുന്നു.

‘മൂത്രം’ എന്നത് പ്രധാനമായും ഗോമൂത്രമാണ്. ശത്രു പ്രാണികളെ അകറ്റാനും , ചെടികളുടെ രോഗപ്രതിരോധ ശേഷിക്കും മൂത്രത്തിന്റെ ശക്തി പരീക്ഷിച്ചറിഞ്ഞതാണ്. ഗോമൂത്രം നേർപ്പിച്ചും വിവിധ ഔഷധച്ചെടികളുമായി ചേർത്തും തയ്യാറാക്കുന്ന ജൈവ കീടനാശിനിയുടെ ശക്തി ഇന്ന് പലരും തിരിച്ചറിഞ്ഞിട്ടുള്ളതാണ്. ഗോമൂത്രം മുഖ്യ ചേരുവയായിട്ടുള്ള പഞ്ചഗവ്യവും ദശഗവ്യവുമെല്ലാം കൃഷിശാസ്‌ത്രം ഇന്ന് വാഴ്ത്തപ്പെടുന്നു.ശതു കീടങ്ങൾക്കെതിരെ അവയുടെ ശത്രുകീടങ്ങളെ അഥവാ നമ്മുടെ മിത്രകീടങ്ങളെ ഉപയോഗപ്പെടുത്തി കീട നിവാരണം നടത്തുന്നതിനേയാണ് ” മിത്രം’ എന്ന വിദ്യ കൊണ്ട് അർത്ഥമാക്കുന്നത്. മണ്ണിര, തവള, കട്ടുകാലി, .ചോനലെറുമ്പ്, ചേരപാമ്പ്, കുരുവി എന്നിങ്ങനെ നീളുന്നതാണ് പ്രകൃതിയിലെ മിത്ര വംശങ്ങൾ.

ചില കീടങ്ങൾക്ക് ചില പൂക്കളുടെ ഗന്ധം തീരെ വർജ്ജ്യമാണ്. അത്തരം ചെടികളെ അറിഞ്ഞു വിളകശക്കടുത്ത് നട്ടുപിടിപ്പിച്ച് കീടങ്ങളെ അകറ്റി നിർത്തുന്ന രീതിക്കാണ് ‘കുസുമം’
എന്നു പറയുന്നത്. കൊങ്ങിണി അഥവാ അരിപ്പൂവ്, ചെണ്ടുമല്ലി അഥവാ മല്ലിക, കാട്ടുമല്ലി, ചെമ്പകം തുടങ്ങിയവ ഇത്തരത്തിൽപ്പെട്ട പൂച്ചെടികളാണ്.വൈറസ് രോഗങ്ങൾ പലപ്പോഴും ചികിത്സിച്ച് ഭേദമാക്കാൻ കഴിയാത്തവയാണ്. അത്തരം ചെടികൾ തോട്ടത്തിൽ നിർത്തുന്നത് രോഗപകർച്ചക്ക് കാരണമാകും. ഇത്തരം വൈറസ് ബാധിത ചെടികളും
മറ്റു കീട ബാധകളോ, അസുഖങ്ങളോ ചെടികളുടെ ഭാഗങ്ങൾ ശേഖരിച്ചു കത്തിച്ചു ചാമ്പലാക്കുന്ന രീതിയാണ് ‘ ഭസ്മം ‘ എന്ന വിദ്യ കൊണ്ടുദ്ദേശിക്കുന്നത്.
ഇതോടൊപ്പം സസ്യജന്യവും ജീവ ജന്യവുമായ വസ്തുക്കളിൽ നിന്നും മറ്റും ഉൽപ്പാദിപ്പിക്കുന്ന നിരവധി ജൈവ കീടനാശിനികളെ കുറിച്ച് പുരാണ ഗ്രന്ഥങ്ങളിൽ വിശദീകരിക്കുന്നുണ്ട്. വേപ്പ്, തുളസി, ഉങ്ങ്, വയമ്പ്, കരിനൊച്ചി, പപ്പായ, കാന്താരി മുളക്, കായം, വെളുത്തുള്ളി, മഞ്ഞൾ, പുകയില, നാറ്റപ്പൂച്ചെടി, കറുകപ്പുല്ല്, കിരിയാത്ത്, കൂവളം, പനിക്കൂർക്ക, ഉമ്മം, ആത്ത, വയമ്പ്, കാഞ്ഞിരം, ഇലക്കള്ളി , തഴുതാമ തുടങ്ങി നീണ്ട നിരകൾ ഇതിലുണ്ട്.വേപ്പിൽ അടങ്ങിയിരിക്കുന്ന അസാഡിറാക്ടിൻ എന്ന രാസപദാർത്ഥം അടിസ്ഥാനമാക്കി പല വ്യാപാര നാമങ്ങളിൽ ഇന്ന് ജൈവ കീടനാശിനികൾ മാർക്കറ്റിൽ ലഭ്യമാണ്.എന്നാൽ പല ജൈവ കീടനാശികളും നമുക്ക് സ്വന്തമായി തയ്യാറാക്കാവുന്നതാണ്.പുരാണങ്ങളിൽ പരാമർശിക്കപ്പെടുന്ന
മുട്ട ഉപയോഗിച്ചുള്ള മുട്ടാമൃതവും മത്സ്യം ഉപയോഗിച്ചുള്ള മ ത്സ്വാമൃതവും ചെടികളുടെ ആരോഗ്യകരമായ വളർച്ചർക്കും രോഗ പ്രതിരോധത്തിനും ഉതകുന്ന ഒന്നാന്തരം പ്രകൃതി സൗഹൃദ വളർച്ച ത്വരങ്ങങ്ങളാണ്. പഞ്ചഗവ്യം, ദശഗവ്യം എന്നിവയും ഇന്ന് ഏറെ പ്രചാരത്തിൽ വന്നു കഴിഞ്ഞു.ഗ്രഹണം ചെയ്യപ്പെട്ട അരികു സത്യങ്ങളാണ് നാട്ടറിവുകൾ . ഈ നീരുറവുകളെ സമൂഹത്തിലേക്ക് തിരിച്ച് വിട്ട് നന്മയുടെ പ്രകൃതി കാരുണ്യ സങ്കൽപ്പങ്ങൾ വീണ്ടെടുക്കുവാനുളള ശ്രമങ്ങളാണ് നമുക്കാവശ്യം. ഭക്ഷ്യ ജന്യമായ രോഗങ്ങളെ ഒരു നിലക്കും പിടിച്ചു കെട്ടാനാവാത്തവിധം നമ്മുടെ നാട് വലിയൊരു വിപത്തിനെയാണിപ്പോൾ നേരിട്ട് കൊണ്ടിരിക്കുന്നത്. ഇവിടെ ഏറ്റവും അടിസ്ഥാനപരമായി തിരുത്തേണ്ടത് മണ്ണിനോടും കൃഷിയോടും ഭക്ഷണത്തോടുമുള്ള കാഴ്ചപ്പാടാണ്. അതിന് വിഷമുക്തമായ ജൈവ കൃഷിയെ തിരിച്ചു പിടിക്കാൻ നമുക്ക് കൈകോർക്കാം

കാര്‍ഷിക യന്ത്രവല്‍ക്കരണം പ്രോല്‍ത്സാഹിപ്പിക്കുന്നതിനായി കേന്ദ്ര സംസ്ഥാന സര്‍ക്കാരുകള്‍ സംയുക്തമായി നടപ്പിലാക്കുന്ന സ്മാം പദ്ധതിയില്‍ സബ്സിഡിനിരക്കില്‍ കാര്‍ഷിക യന്ത്രങ്ങള്‍ സ്വന്തമാക്കുന്നതിന് അപേക്ഷിക്കാം . കാര്‍ഷിക ഉല്പ്പന്ന സംസ്‌ക്കരണ മൂല്യ വര്‍ദ്ധന യന്ത്രങ്ങള്‍ , കൊയ്ത്തുമെതി യന്ത്രം, ട്രാക്ടറുകള്‍, പവര്‍ ടില്ലര്‍, ഗാര്‍ഡന്‍ ടില്ലര്‍, സ്പ്രെയറുകള്‍, ഏണികള്‍, വീല്‍ബാരോ, കൊയ്ത്ത് യന്ത്രം, ഞാറുനടീല്‍ യന്ത്രം, നെല്ലുകുത്ത് മില്‍, ഓയില്‍ മില്‍, ഡ്രയറുകള്‍, വാട്ടര്‍ പമ്പ് എന്നിവ സബ്സിഡിയോടു കൂടി ലഭിക്കും. കാര്‍ഷിക യന്ത്രങ്ങള്‍ക്ക്/ ഉപകരണങ്ങള്‍ക്ക് 50 ശതമാനം വരെയും കാര്‍ഷിക ഉല്‍പ്പന്ന സംസ്‌ക്കരണ മൂല്യവര്‍ദ്ധന യന്ത്രങ്ങള്‍ക്ക്/ ഉപകരണങ്ങള്‍ക്ക് 60 ശതമാനം വരെയും സാമ്പത്തിക സഹായം ലഭിക്കും. അംഗീകൃത കര്‍ഷക കൂട്ടായ്മകള്‍ക്ക് ഫാം മെഷിനറി ബാങ്ക് സ്ഥാപിക്കുന്നതിന് പദ്ധതി തുകയുടെ 80 ശതമാനം സബ്സിഡി നിരക്കില്‍ പരമാവധി 8 ലക്ഷം രൂപ വരെയും, കാര്‍ഷിക യന്ത്രങ്ങളുടെ വാടക കേന്ദ്രങ്ങള്‍ സ്ഥാപിക്കുന്നതിന് പദ്ധതി തുകയുടെ 40 ശതമാനം സബ്സിഡി നിരക്കിലും കാര്‍ഷിക യന്ത്രങ്ങള്‍ വാങ്ങാം. https://agrimachinery.nic.in എന്ന വെബ്സൈറ്റിലൂടെയാണ് അപേക്ഷ സമര്‍പ്പിക്കേണ്ടത്. സംശയ നിവാരണത്തിനും സാങ്കേതിക സഹായങ്ങള്‍ക്കും ഏറ്റവും അടുത്തുള്ള കൃഷി ഭവനിലോ, കണിയാമ്പറ്റ മില്ലുമുക്കിലുള്ള ജില്ലാ കൃഷി അസിസ്റ്റന്റ് എക്സിക്യൂട്ടീവ് എഞ്ചിനീയറുടെ കാര്യാലയവുമായോ ബന്ധപ്പെടാം. ഫോണ്‍ 9446307887, 9562936756, 9207156837, 9383471925.

എം കെ പി മാവിലായി

ആഗോള സുഗന്ധവ്യജ്ഞന വിപണിയിൽ പ്രകൃതിദത്ത വാനിലയുടെ അനുപമമായ വാണിജ്യമൂല്യത്തിന് മങ്ങലേൽക്കുമോ? ശാസ്ത്രഞ്‌ജരുടെ ചില കണ്ടെത്തലുകൾ ഈ ദിശയിലേക്ക് വിരൽ ചൂണ്ടുന്നു. പാശ്ചാത്യ ലോകത്ത് കൃത്രിമ വാനിലിൻ ഉപയോഗിക്കുന്ന ഉൽപ്പന്നങ്ങളിൽ നിർബ്ബന്ധിത ലേബലിങ് കടന്നുവന്നതോടെയാണ് വാനില സത്തായ വനിലിന് വാനോളം വിലയുയർന്നത്. അമേരിക്കയും യൂറോപ്പുമാണ് ലോക വാനില കമ്പോളത്തിലെ നിർണായക ശക്തി. ആഗോള കാർഷിക മേഖലയിൽ വളരെയധികം മാറ്റങ്ങൾ വന്നുകൊണ്ടിരിക്കുന്ന ഈ കാലഘട്ടത്തിൽ കയറ്റുമതിയെ ലാക്കാക്കി വിലപിടിപ്പുള്ള നാണ്യവിള എന്ന നിലയിൽ വാനില കൃഷി നാടാകെ പ്രചരിച്ചു. ഭക്ഷ്യവസ്തുക്കളിലെ ചേരുവകളിൽ കടുത്ത ആരോഗ്യ സുരക്ഷാ നിയമങ്ങൾ മിക്ക രാജ്യങ്ങളിലും നടപ്പിലാക്കി തുടങ്ങിയതോടെ പ്രകൃതിദത്ത വാനില വിപണി കീഴടക്കി. വരുംകാലങ്ങളിൽ വാനില കൃഷിക്കാരുടെ ഭാവി ശോഭനമായിരിക്കുമെന്നു തന്നെയായിരുന്നു എല്ലാവരുടേയും കണക്ക് കൂട്ടൽ.

ആഗോള വാനില ഉപയോഗം കൃതിമവാനിലയിൽ നിന്ന് ജൈവ വാനിലയിലേക്ക് മാറുന്നുവെന്നത് ആർക്കും തടയാനാകാത്ത ഒരു മാറ്റമായി ഈ രംഗത്തെ വിദഗ്ദരും വിധിയെഴുതി. ഇപ്പോൾ പ്രതിവർഷം പതിനഞ്ചായിത്തിലേറെ ടൺ കൃത്രിമ വാനിലിൻ ലോക വിപണിയിൽ ഉപയോഗിക്കുന്നുണ്ടെന്നാണ് ഏകദേശ കണക്ക്. ഇതിന്റെ ഒരു ശതമാനം അതായത് നൂറ്റി അമ്പത് ടൺ വീതം ജൈവ ഉൽപ്പന്നങ്ങളിലേക്ക് മാറിയാൽ തന്നെ അത്രയും വനിലിൻ തയ്യാറാക്കുന്നതിന് അയ്യായിരം ടൺ വരെ സംസ്ക്കരിച്ച വാനില ക്കായ് അധികമായി ഉൽപ്പാദിപ്പിക്കേണ്ടിവരും. ഒന്നാം തരം ശുഭ പ്രതീക്ഷയായിരുന്ന കണക്ക് കൂട്ടലായിരുന്നു അത്.വാനില വിളയുടെ യഥാർത്ഥ ഉൽപ്പന്നം വനിലിൻ എന്ന സത്താണ്. വാനില ബീൻസിൽ വാനില സത്ത് അഥവാ വനിലിൻ വെറും രണ്ടോ മൂന്നോ ശതമാനമാണ്. മധുരോദാരമായ പരിമളമാണ് അതുല്യമായ സുഗന്ധദ്രവ്യമായി വാനിലിനെ ഉയർത്തുന്നത്.ദൗർഭാഗ്യമെന്ന് പറയട്ടെ, പ്രകൃതിദത്ത വാനിലിന്റെ ഏക ഉറവിടം വാനിലച്ചെടിക്കെന്ന ബഹുമതി നഷ്ടപ്പെടുന്നു.

നോർവിച്ചിലെ ഫുഡ് റിസർച്ച് ഇൻസ്റ്റിറ്റ്യൂട്ടിലെ ശാസ്ത്രജ്ഞരുടെ കണ്ടുപിടിത്തമാണ് ഈയൊരു ദിശയിലേക്ക് വിരൽ ചൂണ്ടുന്നത്.പ്രകൃതിദത്ത വാനില വില പിടിയിലൊതുങ്ങാത്ത ഘട്ടത്തിൽ പ്രകൃതിദത്തം എന്നു വിശേഷിപ്പിക്കാവുന്നതും വില കുറഞ്ഞതുമായ വാനിലിന് വേണ്ടിയുള്ള പരീക്ഷണവും ഗവേഷണവുമായിരുന്നു തകൃതിയിൽ നടന്നത്. ഏറെ പ്രയാസപ്പെടാതെ തന്നെ ജൈവ പാഴ് വസ്തുക്കളിൽ നിന്നും ‘വാനിലിൻ ‘ ഉൽപ്പാദിപ്പിക്കുവാൻ കഴിവുള്ള ഒരു തരം സൂക്ഷ്മ ബാക്ടീരിയകളെ ശാസ്ത്രജ്ഞർ കണ്ടെത്തുകയും ചെയ്തു. കൃഷിയിടങ്ങളിൽ നിന്നും മറ്റും പുറംതള്ളപ്പെടുന്ന പാഴ് വസ്തുക്കളിൽ നിന്നും ഫെറുലിക് ആസിഡ് ഉൽപ്പാദിപ്പിച്ച് അത് വനിലിൻ ആക്കി മാറ്റുകയാണ് ഈ ബാക്ടീരിയകൾ ചെയ്യുന്നത്. ഇങ്ങിനെ വനിലിൻ ഉൽപ്പാദിപ്പിക്കുന്നതിന് ചെലവ് വളരെ കുറവാണെന്ന് മാത്രമല്ല, ഒറിജിനൽ വനിലിനൊപ്പം നിൽക്കാനുള്ള ഗുണവും ഏതാണ്ടി തിന് ഉണ്ടത്രെ. ജനിതിക എഞ്ചിനിയറിംഗ് വഴി ഇത്തരം ബാക്ടീരിയയിൽ നിന്നും വനിലിൻ ജീനിനെ വേർതിരിച്ചെടുത്ത് ഇപ്പോൾ വ്യാപകമായിത്തന്നെ വനിലിൻ ഉൽപ്പാദിപ്പിച്ച് തുടങ്ങിയിട്ടുണ്ട്. ഏറെ പ്രതീക്ഷകളുമായി വാനില കൃഷിയിലേർപ്പെട്ടിട്ടുള്ളവർക്ക് എന്തായാലും ഇതൊരു നല്ല വാർത്തയല്ല.

കർഷക അവാർഡ് ക്ഷണിച്ചു.കേരളാ സർക്കാർ നിയന്ത്രണത്തിലുള്ള സഹകരണ സംരഭമായ എൻ എം ഡി സി സംസ്ഥാനതലത്തിൽ കർഷകർക്കായി കർഷകമിത്രയെന്ന പേരിൽ ഏർപ്പെടുത്താൻ തീരുമാനിച്ച അവാർഡിനായി കർഷകരിൽ നിന്നും അപേക്ഷ ക്ഷണിച്ചു. കർഷകനും കൃഷിയും എന്ന വിഷയത്തെ ആസ്പദമാക്കിയുള്ള വിഡിയോ എന്‍ട്രികളാണ് വേണ്ടതു്. സ്വന്തം കൃഷിയിടത്തില്‍ നിന്നും തയ്യാറാക്കിയ മൂന്നു മിനിട്ടു ദൈര്‍ഘ്യമുള്ള വ്യക്തതയും മികവാര്‍ന്നതുമായ വിഡിയോ ചിത്രങ്ങളാണ് അവാര്‍ഡിനായി പരിഗണിക്കുക. പഴയ തലമുറയുടെ കൃഷി രീതികള്‍ പുതു തലമുറയുടെ മനസ്സില്‍ പകുത്തു നല്‍കുക എന്ന ഉദ്ദേശത്തോടെയാണ് ഈ മത്സരം സംഘടിപ്പിക്കുന്നത്. 18 വയസ്സിനു മുകളില്‍ പ്രയമുള്ളവര്‍ക്ക് ഈ അവാര്‍ഡിനായി അപേക്ഷിക്കാം. കുടുംബ കൃഷിക്ക് ഏറെ പ്രധാന്യം നല്‍കിയുള്ള ലഘു ചിത്രങ്ങളായിരിക്കണം മത്സരത്തിനായി അയക്കേണ്ടത്. സ്വന്തം പുരയിടത്തിലെ ദൈനംദിന പ്രവര്‍ത്തനങ്ങള്‍ മുതല്‍ മൃഗ പിരപാലനം, മിശ്രവിള കൃഷിരീതികള്‍ തുടങ്ങി പുതു തലമുറയുടെ മനസ്സില്‍ കൃഷിയെ പരിപോഷിപ്പിക്കാന്‍ ഉതകുന്ന രിീതിയിലുള്ള എഡിറ്റ് ചെയിത വിഡിയോകളാകണം അയക്കേണ്ടത് . ഒന്നാം സമ്മാനം 10001 രൂപയും, രണ്ടാം സമ്മാനം 5001, മൂന്നാം സമ്മാനം 3001 രൂപയും പ്രശസ്തി പത്രവും ഫലകവുമാണ് അവാര്‍ഡായി നല്‍കുന്നത്. അവാര്‍ഡിനായുള്ള മൂന്നു മിനിട്ടു ദൈര്‍ഘ്യമുള്ള ചിത്രങ്ങള്‍ nmdcchairman@gmail.com എന്ന ഈ വിലാസത്തില്‍ ഒക്ടോബർ 15 നു മുമ്പായി അയക്കണം. തിരഞ്ഞെടുക്കുന്ന ചിത്രങ്ങള്‍ എന്‍എംഡിസിയുടെ യൂടൂബ് ചാനലില്‍ അപ്ലോഡ് ചെയ്യും. ചിത്രങ്ങളില്‍ ഏറ്റവും കൂടുതല്‍ ലൈക്കും ഷെയറും ലഭിക്കുന്നവർക്ക് പ്രത്യേക പരിഗണയും നല്‍കും. ചിത്രങ്ങളുടെ തിരഞ്ഞെടുപ്പും ഫല പ്രഖ്യാപനവും എന്‍എംഡിസിയിയില്‍ നിക്ഷിപ്തമായിരിക്കും. കൂടുതൽ വിവരങ്ങൾ 7306118230എന്ന നമ്പരിൽ ലഭിക്കും. കേരള പിറവി ദിനമായ നവംബർ ഒന്നിന് ഔദ്യോഗിക ഫലപ്രഖ്യാപനം നടത്തുന്നതായിരിക്കും. കർഷകർ ഇതുമായി സഹകരിക്കണമെന്ന് ചെയർമാൻ പി.സൈനുദ്ദീൻ അറിയിച്ചു.

ജില്ലയിലെ മുതിര്‍ന്ന ഉദ്യോഗസ്ഥരുമായി മന്ത്രി ആശയ വിനിമയം നടത്തി

സംസ്ഥാനത്തെ മുഴുവന്‍ കൃഷി ഭവനുകളിലും പരിശോധനകള്‍ നടത്തി പ്രവര്‍ത്തന മികവിന്റെ അടിസ്ഥാനത്തില്‍ റാങ്കിംഗിന് വിധേയമാക്കുമെന്ന് കൃഷി വകുപ്പ് മന്ത്രി പി പ്രസാദ്. കൃത്യമായ സ്ഥിതിവിവരക്കണക്കുകളുടെ അടിസ്ഥാനത്തില്‍ വിശദമായ അവലോകനത്തിന് ശേഷമായിരിക്കും റാങ്കിംഗ്. ജില്ലാ, ബ്ലോക്ക് ഓഫീസുകളുടെയും ഫാമുകള്‍ ഉള്‍പ്പെടെയുള്ള അനുബന്ധ സ്ഥാപനങ്ങളുടെയും പ്രവര്‍ത്തനങ്ങളും അവലോകനത്തിന് വിധേയമാക്കുമെന്നും മന്ത്രി അറിയിച്ചു. തൃശൂര്‍ രാമനിലയത്തില്‍ ജില്ലയിലെ മുതിര്‍ന്ന കൃഷി വകുപ്പ് ഉദ്യോഗസ്ഥരുടെ യോഗത്തില്‍ സംസാരിക്കുകയായിരുന്നു മന്ത്രി. റാങ്കിംഗിന്റെ അടിസ്ഥാനത്തില്‍ മികച്ച രീതിയില്‍ പ്രവര്‍ത്തിക്കുന്നവയും അല്ലാത്തവയുമായ ഓഫീസുകളെയും ഉദ്യോഗസ്ഥരെയും കണ്ടെത്തി ആവശ്യമായ നടപടികള്‍ സ്വീകരിക്കുമെന്നും മന്ത്രി വ്യക്തമാക്കി.

പേര് പോലെ കര്‍ഷര്‍കര്‍ക്ക് സ്വന്തം വീടുകളായി തോന്നുന്ന ഇടങ്ങളായി കൃഷി ഭവനുകള്‍ മാറണം. കൃഷിക്കാരുമായി ജൈവികമായ നാഭീനാള ബന്ധം നിലനിര്‍ത്താന്‍ അവയ്ക്ക് സാധിക്കണം. എവിടെയെങ്കിലും പോരായ്മകളുണ്ടെങ്കില്‍ അവ കണ്ടെത്തി പരിഹരിക്കാന്‍ ഉദ്യോഗസ്ഥര്‍ മുന്നിട്ടിറങ്ങണമെന്നും മന്ത്രി പറഞ്ഞു.
കര്‍ഷകരെ ആദരവോടെ കാണുകയും അവരോട് നല്ല രീതിയില്‍ പെരുമാറുകയും ചെയ്യുന്ന സ്ഥിതിയുണ്ടാവണം. വകുപ്പിന്റെ പരിപാടികളില്‍ കര്‍ഷകര്‍ക്ക് മുന്‍നിരയില്‍ തന്നെ ഇരിപ്പിടങ്ങള്‍ അനുവദിക്കണമെന്നു പറഞ്ഞത് ഭംഗിവാക്കായിട്ടല്ലെന്നും അര്‍ഹിക്കുന്ന സ്ഥാനം സമൂഹം അവര്‍ക്കു നല്‍കേണ്ടതുണ്ട് എന്നതിനാലാണെന്നും മന്ത്രി പറഞ്ഞു. ഉദ്യോഗസ്ഥരുടെ പ്രവര്‍ത്തനങ്ങള്‍ കര്‍ഷകരുടെയും കൃഷിയുടെയും സംരക്ഷണത്തിനും വളര്‍ച്ചയ്ക്കും വേണ്ടിയാവണം. യോഗങ്ങളും മറ്റ് ഔദ്യോഗിക പരിപാടികളും പരമാവധി കുറച്ച് കര്‍ഷകര്‍ക്കു വേണ്ടിയുള്ള പ്രവര്‍ത്തനങ്ങളില്‍ നിരതരാവാന്‍ മന്ത്രി ഉദ്യോഗസ്ഥര്‍ക്ക് നിര്‍ദ്ദേശം നല്‍കി. വകുപ്പുമായി ബന്ധപ്പെട്ട റിപ്പോര്‍ട്ടുകള്‍ മാന്വലായി തയ്യാറാക്കുന്നതിന് പകരം കൃത്യമായ ഡാറ്റാ ബേസിന്റെ അടിസ്ഥാനത്തില്‍ വിവര സാങ്കേതിക വിദ്യയുടെ സഹായത്തോടെ ലഭ്യമാക്കുന്നതിന് സംവിധാനം ഒരുക്കും.

നെല്ലുല്‍പ്പാദനത്തിന്റെ കാര്യത്തില്‍ സ്വയം പര്യാപ്തത കൈവരിക്കുകയെന്നത് അത്ര എളുപ്പമല്ലെങ്കിലും പച്ചക്കറിയുടെ കാര്യത്തില്‍ കേരളത്തിന് അത് എളുപ്പത്തില്‍ സാധിക്കുമെന്നതിന് സമീപകാലത്തെ അനുഭവങ്ങള്‍ തെളിവാണെന്നും മന്ത്രി പറഞ്ഞു. മികച്ച പങ്കാളിത്തമാണ് പച്ചക്കറി ഉല്‍പ്പാദനത്തിന്റെ കാര്യത്തില്‍ കര്‍ഷകരുടെയും ഉദ്യോഗസ്ഥരുടെയും ഭാഗത്തുനിന്നുണ്ടായത്. കൃഷിഭവനുകള്‍ സ്മാര്‍ട്ടാക്കുന്നതിനുള്ള നടപടികള്‍ ഇതിനകം ആരംഭിച്ചതായും മന്ത്രി അറിയിച്ചു. കാര്‍ഷിക മേഖലയുമായി ബന്ധപ്പെട്ട ജില്ലയിലെ പ്രശ്‌നങ്ങള്‍ ഉദ്യോഗസ്ഥരുമായി മന്ത്രി യോഗത്തില്‍ ചര്‍ച്ച ചെയ്തു.
അവലോകന യോഗത്തില്‍ കേരള സീഡ് ഡെവലപ്‌മെന്റ് അതോറിറ്റി അഡീഷനല്‍ ഡയരക്ടര്‍ ഉമ്മന്‍ തോമസ്, പ്രിന്‍സിപ്പല്‍ കൃഷി ഓഫീസര്‍ ടി വി ജയശ്രീ, കൃഷി വകുപ്പ് ഡെപ്യൂട്ടി ഡയരക്ടര്‍മാര്‍, കൃഷി അസിസ്റ്റന്റ് ഡയരക്ടര്‍മാര്‍, ഫാം ഓഫീസര്‍മാര്‍, കൃഷി അനുബന്ധ സ്ഥാപന മേധാവികള്‍ തുടങ്ങിയവര്‍ പങ്കെടുത്തു.

എംകെപി മാവിലായി

സസ്യലോകത്തിൽ ഹരിതക രഹിത സസ്യങ്ങളുടെ കൂട്ടത്തിൽ പെടുന്നവയാണ് കൂണുകൾ.
ഭൂമുഖത്ത് രണ്ടായിരത്തോളം ഇനം കൂണുകൾ ഉണ്ടെങ്കിലും അവയിൽ ഭക്ഷ്യയോഗ്യമായവ തുലോം വിരളമാണ്. ഭക്ഷ്യയോഗ്യമായ പലതരം കൂണുകൾ നമ്മുടെ നാട്ടിൽ വന്യമായി വളരുന്നുണ്ടെങ്കിലും അവ തിരിച്ചറിയാനുള്ള പ്രായോഗിക ബുദ്ധിമുട്ടു കാരണം വിപുലമായ തോതിൽ ഉപയോഗയോഗ്യമാക്കുന്നതിന് സാധിക്കുന്നില്ല. മത്രമല്ല, വർഷകാലങ്ങളിൽ മാത്രമേ അവ സ്വയം മുളച്ച് പൊന്തുകയുള്ളൂ. എന്നാൽ ശാസ്ത്രം പുരോഗമിച്ചതോടുകൂടി കൂണുകൾ ധാരാളമായി കൃഷി ചെയ്തു ഉൽപ്പാദിപ്പിക്കുവാൻ തുടങ്ങി. ഇന്ന് കൂൺ കൃഷി വികസിത രാജ്യങ്ങളിലെ ഒരു പ്രധാന വ്യവസായമായി മാറിയിരിക്കുകയാണ്. ഏഷ്യയിൽ തൈവാനാണ് ഏറ്റവും കൂടുതൽ കൂൺ ഉൽപ്പാദിപ്പിക്കുന്ന രാജ്യം എന്ന ബഹുമതി കരസ്ഥമാക്കിയിരിക്കുന്നത്.

ഇന്ത്യയിൽ ഹിമാചൽ പ്രദേശത്ത് സോളൻ എന്ന സ്ഥലത്താണ് കൂണുകൾ വൻ തോതിൽ ഉൽപ്പാദിപ്പിക്കുന്നത്.
മറ്റു കാർഷിക വിളകളിൽ നിന്നും തികച്ചും വ്യത്യസ്ഥമായി ഏത് കാലത്തും ഏത് കാലാവസ്ഥയിലും എവിടേയും അനായസേന കൃഷി ചെയ്തെടുക്കുവാൻ കഴിയുന്നു എന്നത് കൂണിന്റെ മാത്രമായ സവിശേഷതയാണ്.

കേരളത്തിന്റെ തനതായ കാലാവസ്ഥയ്ക്ക് അനുയോജ്യമായതും എല്ലായ്പോഴും കൃഷി ചെയ്ത് വിളവെടുക്കാൻ പറ്റുന്നതുമായ രണ്ട് ജീനസ്സുകളിൽപ്പെട്ട ഇനങ്ങളാണ് പ്ലൂറോട്ടസ് സാജോർകാജു എന്ന ചിപ്പിക്കൂണും വൊൾ വേറിയല്ലാവൊൾ വേഷ്യ എന്ന വയ്ക്കോൽ കൂണും.ഇവയുടെ കൃഷിക്ക് ഏറ്റവും പറ്റിയ മാധ്യമം നമ്മുടെ നാട്ടിൽ സുലഭമായി ലഭിക്കുന്ന വയ്ക്കോൽ തന്നെയാണ്. കൃഷി ചെയ്യാൻ എളുപ്പം ഉള്ളതു കൊണ്ടും ഉദ്ദേശിക്കുന്ന വിളവ് ലഭിക്കുന്നതു കൊണ്ടും പ്ലൂറോട്ടസ് ജീനസ്സിൽപ്പെട്ട (ചിപ്പിക്കൂൺ) ഇനങ്ങളാണ് ഇന്ന് കേരളത്തിൽ പ്രചാരം നേടിയിട്ടുള്ളത്.

ചിപ്പിക്കൂണുകൾ (ഓയിസ്റ്റർ)

ഗാർഹികാവശ്യത്തിനു മാത്രം കൂൺ കൃഷി നടത്തുകയാണെങ്കിൽ ബെഡ്ഡുകൾ തയ്യാറാക്കി വീടിന്റെ നേരിട്ട് സൂര്യ പ്രകാശം പതിക്കാത്ത വരാന്തയിലോ, ബാത്ത്റൂമിലോ,മരത്തണലുകളിലോ സൂക്ഷിക്കാവുന്നതാണ്. എന്നാൽ വ്യാവസായികാടിസ്ഥാനത്തിൽ കൂൺ കൃഷി ചെയ്യുമ്പോൾ അതിന് പ്രത്യേക സ്ഥല സൗകര്യം ആവശ്യമാണ്. ഓല മേഞ്ഞ ഷെസ്സുകളോ ഒരു മുറി തന്നെയോ ഇതിനായി നിർമ്മിക്കേണ്ടതാണ്.നമ്മുടെ വീട്ടിലെ സൗകര്യങ്ങൾ ഉപയോഗപ്പെടുത്തി വരാന്തയിലോ മറ്റു സൗകര്യമുളളയിടങ്ങളിലോ കൂൺ കൃഷി എങ്ങിനെ വിജയകരമാക്കാമെന്ന് നോക്കാം.സ്പോൺ (കൂൺ വിത്ത് ) , വൈക്കോൽ , പോളിത്തീൻ കവർ എന്നിവയാണ്
ഇതിന് ആവശ്യമുളള പ്രധാന സാധനങ്ങൾ .

കൃഷി ചെയ്യുന്ന വിധം

ബഡ്ഡ് തയ്യാറാക്കുന്നതിന് ഉപയോഗിക്കുന്ന വയ്ക്കോൽ അധികം പഴക്കമില്ലാത്തതും ബലമുള്ളതും നന്നായി ഉണങ്ങിയതുമായിരിക്കണം. ഉദ്ദേശം രണ്ടു കി.ഗ്രാം വൈക്കോൽ ഏതാണ്ട് അഞ്ച് സെ.മീറ്റർ നീളത്തിൽ ചെറുതായി മുറിക്കുക. അല്ലെങ്കിൽ 15 സെ.മീറ്റർ വ്യാസമുളള ചെറിയ ചുമ്മാടുകളാക്കി വയ്ക്കുക. ചുമ്മാടുകൾ പോളിത്തീൻ കവറിന്റെ വായ് വട്ടത്തിനനുസരിച്ച് വലിപ്പമുള്ളവയായിരിക്കണം. അതിനു ശേഷം ഇവ ആറ് മണിക്കൂർ മുതൽ പന്ത്രണ്ട് മണിക്കൂർ വരെ ശുദ്ധ വെള്ളത്തിൽ താഴ്ത്തി വെച്ച് കുതിരാനായി അനുവദിക്കുക. കുതിർത്ത വയ്ക്കോലിൽ ഏകദേശം 75 ശതമാനം ഈർപ്പം ഉണ്ടായിരിക്കണം. ഇവ വീണ്ടും അണുനശീകരണത്തിനായി അര മണിക്കൂർ നേരം നല്ലതുപോലെ തിളച്ച വെള്ളത്തിൽ താഴ്ത്തി വെക്കുക. തുടർന്ന് ഇത് പുറത്തെടുത്ത് അധികജലം വാർന്നു പോകുന്നതിനും തണുക്കുന്നതിനുമായി അര മണിക്കൂർ വൃത്തിയുള്ള സ്ഥലത്ത് നിരത്തി വെക്കുകയോ, കുട്ടകളിൽ നിറച്ചുവയ്ക്കുകയോ ചെയ്യുക. വയ്ക്കോലിലെ ഈർപ്പം അധികം കൂടാനും കുറയാനും പാടില്ല. തണുത്ത വൈക്കോൽ കൈയിൽ എടുത്ത് പിഴിഞ്ഞാൽ അൽപ്പ വും ജലാംശം ഊറി വരാത്ത സ്ഥിതിയാണ് ഏറ്റവും ഉത്തമം.

തയ്യാറാക്കിയ വയ്ക്കോൽ നിറയ്ക്കുവാൻ 60 സെ.മീറ്റർ നീളവും 35 സെ.മീറ്റർ വീതിയും 200 ഗേജ് കട്ടിയുമുളള പോളിത്തീൻ കവറുകളോ രണ്ടു വശവും തുറന്ന ട്യൂബുകളോ ഉപയോഗിക്കാം. ട്യൂബുകളാണ് ഉപയോഗിക്കുന്നതെങ്കിൽ രണ്ടു ഭാഗവും മൂടി കെട്ടേണ്ടതിനാൽ 75 സെ.മീറ്റർ നീളമുള്ള ട്യൂബുകളായിരിക്കും നല്ലത്. ഈ കവറുകളിൽ അങ്ങിങ്ങായി 5 മില്ലിമീറ്റർ വ്യാസമുള്ള ആറോ ഏഴോ ദ്വാരങ്ങൾ ഇടണം. വെള്ളം കൂടുതൽ ഉണ്ടെങ്കിൽ വാർന്നു പോകാനായി കവറിന്റെ അടിഭാഗത്തായി രണ്ടു ദ്വാരങ്ങൾ തീർച്ചയായും ഇട്ടിരിക്കണം.

കുപ്പിയിലോ പാക്കറ്റുകളിലോ കിട്ടുന്ന വിത്ത് പുറത്തെടുത്ത് വയ്ക്കാനായി വൃത്തിയുള്ള കടലാസോ പ്ലാസ്റ്റിക്ക് ട്രേയോ ആവശ്യമാണ്. പാക്കറ്റിലെ വിത്ത് എടുക്കുന്നതിന് മുമ്പ് കൈകളും അത് എടുക്കുന്നതിനുളള കനം കുറഞ്ഞ കമ്പിയും ഡെറ്റോൾ കലർത്തിയ വെള്ളത്തിൽ കഴുകിയെടുക്കുകയോ തുടയ്ക്കുകയോ ചെയ്യണം. പായ്ക്കറ്റിന്റെ പഞ്ഞി അടപ്പ് മാറ്റി കമ്പി കൊണ്ട് കുത്തിയിളക്കി ആവശ്യമുള്ള വിത്ത് ട്രേയിലിടുക. ഒരു കി.ഗ്രാം വൈക്കോൽ നായ്ക്കുന്ന കവറുകളിലേക്ക് 250-300 ഗ്രാം വിത്ത് മതിയാകും. ആദ്യമായി വയ്ക്കോൽ ചുമ്മാട് സാവധാനത്തിൽ കവറിൽ ഇറക്കി വെച്ച ശേഷം കൈ കൊണ്ട് അമർത്തി ശരിയാക്കണം. പാക്കറ്റിൽ നിന്നും പുറത്തെടുത്തു വച്ച സ്പോൺ കുറച്ചെടുത്ത് വയ്ക്കാലിന്റെ മുകളിൽ നടുഭാഗം വിട്ട് അരികിലായി വിതറുക. വീണ്ടും അടുത്ത വൈക്കോൽ അട്ടി ഇറക്കി വെച്ച ശേഷം വിത്ത് വിതറുക. കവർ നിറയുന്നതുവരെ ഈ രീതി അനുവർത്തിക്കുക. അവസാനത്തെ അട്ടിക്ക് മുകളിലും വിത്ത് വിതയ്ക്കാവുന്നതാണ്.

മുറിച്ച വൈക്കോൽ കഷണങ്ങളാണ് ഉപയോഗിക്കുന്നതെങ്കിൽ അഞ്ച് സെ.മീറ്റർ പൊക്കത്തിൽ വൈക്കോൽ ഇട്ടശേഷം വിത്തിടുക. വീണ്ടും വൈക്കോൽ നിറക്കുകയും വിത്തിടുകയും ചെയ്യുക. വൈക്കോൽ നിറക്കുമ്പോൾ ഇടയ്ക്ക് വിടവില്ലാതെ കൈ കൊണ്ട് നല്ലതുപോലെ അമർത്തിയതിനു ശേഷമേ അടുത്ത അട്ടി നിറക്കാവൂ. അവസാനത്തെ അട്ടി നിറച്ച ശേഷം പോളിത്തീൻ കവറിന്റെ തുറന്ന ഭാഗം നൂൽകൊണ്ട് നന്നായി മൂടിക്കെട്ടി ഉദ്ദേശിക്കുന്ന സ്ഥലത്ത് അനക്കാതെ വയ്ക്കുക.
കൂണിന്റെ വെളുത്ത തന്തുക്കൾ സാവധാനത്തിൽ വളർന്ന് വൈക്കോലിൽ നിറയുന്നു. പതിനഞ്ചു ദിവസം കഴിയുമ്പോൾ കവർ മുറിച്ചു മാറ്റിയ ശേഷം ഒന്നോടെ പുറത്തെടുത്ത് വയ്ക്കണം. രണ്ടു വശവും കെട്ടിയ ട്യൂബുകൾ ആണെങ്കിൽ അതു തുറന്ന് ഒരു ഭാഗത്ത് നിന്നും കൈ കൊണ്ട് അമർത്തി സാവധാനത്തിൽ പുറത്തേക്കെടുക്കുക. ഇപ്രകാരം രണ്ടു വശവും കെട്ടിയ പോളിത്തീൻ ട്യൂബുകൾ വീണ്ടും വൈക്കോൽ നിറയ്ക്കാനായി ഉപയോഗിക്കാം. പുറത്തെടുത്ത ബെഡ്ഡുകൾ ഷെൽഫുകളിൽ അടുക്കുകയോ കെട്ടിതൂക്കിയിടുകയോ ചെയ്യാം.
തുടർന്ന് ഒന്ന് രണ്ട് ദിവസം കഴിയുമ്പോൾ വളരെ നേരിയ തോതിൽ ബെഡ്ഡുകൾ നനയ്ക്കേണ്ടതാണ്. ഈ സമയം മുറിക്കുള്ളിൽ നല്ല വായു സഞ്ചാരം ഉണ്ടായിരിക്കണം. രണ്ടു മൂന്നു ദിവസത്തിനുളളിൽ നാല് വശങ്ങളിൽ നിന്നും കുണിന്റെ മുകുളങ്ങൾ പ്രത്യക്ഷപ്പെടുന്നു. ഈ ഘട്ടത്തിൽ നനച്ചു കൊടുക്കുന്നത് നന്നല്ല.കാരണം അധികം ഈർപ്പം ഉണ്ടായാൽ ബാക്ടീരിയ വളരാൻ ഇടയാകുകയും മൊട്ടുകൾക്ക് മഞ്ഞനിറം വന്ന് അവ കരിഞ്ഞു പോകുകയും ചെയ്യും. വീണ്ടും രണ്ടു ദിവസത്തിനുളളിൽ മൊട്ടുകൾ വളർന്നു വലുതാകുന്നു. അപ്പോൾ വിളവെടുക്കാം.
വിളവെടുക്കുമ്പോൾ തണ്ടിന്റെ അടിഭാഗം ശരിയായി മുറിച്ചെടുക്കാൻ ശ്രദ്ധിക്കണം. ചിപ്പിക്കൂണുകൾ വിടർന്ന ശേഷമാണ് വിളവെടുപ്പ് നടത്തേണ്ടത്.
ഒരു കിലോ ഗ്രാം വൈക്കോലിൽ നിന്നും ഏകദേശം 400 ഗ്രാം മുതൽ 500 ഗ്രാം വരെ കൂൺ ലഭിക്കും. വീണ്ടും വെള്ളം സ്പ്രേ ചെയ്ത് ബെഡ്ഡുകൾ സൂക്ഷിക്കുകയാണെങ്കിൽ ചെറിയ ഒന്നോ രണ്ടോ വിളവെടുപ്പ് കൂടി നടത്താവുന്നതാണ്. അതിനു ശേഷം വൈക്കോൽ ഉണക്കി കന്നുകാലികൾക്ക് തീറ്റയായി കൊടുക്കാം.

കൂണിന്റെ പോഷക മൂല്യങ്ങൾ

മനുഷ്യ ശരീരത്തിലെ കോശങ്ങളുടെ വളർച്ചക്ക് അനിവാര്യമായ പ്രോട്ടീന്റെ ഒരു അപൂർവ്വ കലവറയായി കൂൺകരുതപ്പെടുന്നു. ദഹനത്തെ സഹായിക്കുന്നതിനാൽ അവ മറ്റുള്ള മാംസ്യാഹാരങ്ങളേക്കാൾ മികച്ചതാണ്. ഇതിൽ തയാമിൻ, റൈബോഫ്ളേവിൻ, നിയാസിൻ, അസ്ക്കോർബിക്കാസിഡ് എന്നിവ നല്ല രീതിയിൽ അടങ്ങിയിരിക്കുന്നു.
കൂണുകളിൽ കൊഴുപ്പ്, അന്നജം തുടങ്ങിയവയുടെ തോത് താരതമ്യേന കുറവായതിനാൽ ഹൃദ്രോഹികൾക്കും പ്രമേഹ രോഗികൾക്കും എല്ലാം ഇതൊരു ഇഷ്ടാഹാരമാക്കാം.

പാചകം

കൂണുകൾ വിളവെടുപ്പിനു ശേഷം വളരെ വേഗം കേടുവരുന്നതിനാൽ എത്രയും വേഗം പുതുമയോടെ ഉപയോഗിക്കണം. കൂണുകളിൽ തൊണ്ണൂറ് ശതമാനവും ജലാംശം ആയതിനാൽ വേവിക്കുവാനായി പ്രത്യേകം വെളളം ഒഴിക്കരുത്. കൂണുകൾ അധികനേരം വേവിക്കുന്നത് നല്ലതല്ല. രണ്ടോ മൂന്നോ മിനുട്ടുകൾക്കുള്ളിൽ തന്നെ പാചകം ചെയ്യണം. കൂണുകൾക്ക് തനതായ രുചി ഉള്ളതിനാൽ മുളക്, മാസാല, പുളി തുടങ്ങിയ ചേരുവകൾ അധികം ചേർക്കാതിരിക്കുന്നതായിരിക്കും കൂടുതൽ രുചികരം.
പുലാവ്, ഓംലറ്റ്, കട്ലറ്റ് , സൂപ്പ് , മസാല കൂൺ, കുറുമ, സ്റ്റൂ എന്നിവയാണ് കൂൺ ഉപയോഗിച്ച് സാധാരണയായി പാചകം ചെയ്യുന്ന വിഭവങ്ങൾ