മൃഗസംരക്ഷണ – ക്ഷീരവികസന മേഖലകളിൽ നൂതന പദ്ധതികൾ; ത്രിദിന ശില്പശാലയ്ക്ക് സമാപനമായി

14-ാം പഞ്ചവത്സര പദ്ധതി ആസൂത്രണത്തിന്റെ ഭാഗമായി മൃഗസംരക്ഷണ – ക്ഷീരവികസന മേഖലകളിൽ നൂതന പദ്ധതികൾ ആവിഷ്ക്കരിച്ച് നടപ്പിലാക്കുക എന്ന ലക്ഷ്യത്തോടെ മൃഗസംരക്ഷണ വകുപ്പ്, ക്ഷീരവികസന വകുപ്പ്, കേരളം ലൈവ്സ്റ്റോക്ക് ഡവലപ്മെന്റ്റ് ബോർഡ്, കേരളം മിൽക്ക് മാർക്കറ്റിംഗ് ഫെഡറേഷൻ, കേരള സ്റ്റേറ്റ് പൗൾട്രി ഡവലപ്മെന്റ് കോര്പറേഷൻ, മീറ്റ് പ്രോഡക്റ്റ്സ് ഓഫ് ഇന്ത്യ, കേരള ഫീഡ്‌സ്, വെറ്ററിനറി സർവകലാശാല എന്നിവയുടെ ആഭിമുഖ്യത്തിൽ “സമേതി” യിൽ സംഘടിപ്പിച്ച ത്രിദിന ശില്പശാലയ്ക്ക് സമാപനമായി. ബഹു. മൃഗസംരക്ഷണ-ക്ഷീരവികസന വകുപ്പ് മന്ത്രി ജെ.ചിഞ്ചുറാണി ഉദ്ഘാടനം ചെയ്ത ശില്പശാലയിൽ വിവിധ മേഖലകളിലെ വിദഗ്ദ്ധർ പങ്കെടുത്തു. ശില്പശാലയുടെ ആദ്യദിനം മൃഗസംരക്ഷണ-ക്ഷീരവികസന മേഖലകളിലെ ‘തല്‍സ്ഥിതിയും നേട്ടങ്ങളും’ എന്ന വിഷയത്തിൽ വിവിധ വകുപ്പുമേധാവികളുടെ അവതരണം നടന്നു. തുടർന്ന് ശില്പശാലാംഗങ്ങൾ 4 ഗ്രൂപ്പുകളായി തിരിഞ്ഞ് പദ്ധതി രൂപീകരണവുമായി ബന്ധപ്പെട്ട വിവിധ വിഷയങ്ങളിൽ പ്രാരംഭതല ചർച്ചകൾ നടത്തി. പാൽ, മുട്ട, മാംസം എന്നിവയുടെ ഉല്പാദനത്തിൽ സ്വയംപര്യാപ്തത കൈവരിക്കൽ, മൃഗസംരക്ഷണ ക്ഷീരവികസന മേഖലകളിലെ ഉല്പാദനക്ഷമതയും ലാഭസാധ്യതയും വർദ്ധിപ്പിക്കൽ, പ്രസ്തുത മേഖലകളിലെ സംരംഭകത്വം, ആധുനികവൽക്കരണം, യന്ത്രവൽക്കരണം, പ്രസ്തുത മേഖലകളിൽ ഇ-ഗവേർണൻസ്, ഐ.സി.റ്റി, നൂതനസാങ്കേതിക വിദ്യകൾ എന്നിവയുടെ പ്രായോഗികതല സാധ്യതകൾ എന്നീ വിഷയങ്ങളിലൂന്നിയായി-രുന്നു ശില്പശാലാചർച്ചകൾ നടന്നത്.

ശില്പശാലയുടെ രണ്ടാംദിനം ‘സംസ്ഥാനതലത്തിൽ ഫോഡർ പ്ലാനിന്റെ ആവശ്യകതയും പഞ്ചവത്സരപദ്ധതിയുടെ ഭാഗമായി സംസ്ഥാനതലത്തിൽ കർഷകക്ഷേമം ഉറപ്പാക്കുന്നതിനുളള നയരൂപീകരണവും’, ‘മൃഗാരോഗ്യം- ഏകാരോഗ്യം’ എന്നീ വിഷയങ്ങളിൽ ക്ഷീരവികസന വകുപ്പിലെയും മൃഗസംരക്ഷണ വകുപ്പിലെയും ജോയിന്റ് ഡയറക്ടർമാരായ ശ്രീ.കെ.ശശികുമാർ, ഡോ.പ്രേം ജെയിൻ എന്നിവർ അവതരണം നടത്തി.
ശില്പശാലയുടെ മൂന്നാംദിനം 4 ഗ്രൂപ്പുകളും ചർച്ചകളുടെ അടിസ്ഥാനത്തിൽ ഉരുത്തിരിഞ്ഞ നൂതനാശയങ്ങൾ ക്രോഡീകരിച്ച് അവതരിപ്പിക്കുകയും പ്രൊ.ആർ.രാമകുമാർ (മെമ്പർ, സംസ്ഥാന ആസൂത്രണ ബോർഡ്), ശ്രീ.എസ്.എസ്. നാഗേഷ് (ചീഫ് ഓഫ് അഗ്രിക്കൾച്ചർ ഡിവിഷൻ) എന്നിവർ ഉൾപ്പെട്ട വിദഗ്ദ്ധപാനൽ ചർച്ചാസംഗ്രഹത്തിൽ അഭിപ്രായങ്ങൾ രേഖപ്പെടുത്തുകയും ചെയ്തു.

ബഹു. മൃഗസംരക്ഷണ-ക്ഷീരവികസന വകുപ്പ് മന്ത്രി ശ്രീമതി. ജെ.ചിഞ്ചുറാണി സമാപനസമ്മേളനം ഉദ്ഘാടനം ചെയ്യുകയും പദ്ധതി രൂപീകരണ നിർദ്ദേശങ്ങളുടെ സംഗ്രഹം സ്വീകരിക്കുകയും ചെയ്തു. വിവിധ മേഖലകളിലെ പുരോഗതിയ്ക്ക് വഴിതെളിച്ച പഞ്ചവത്സര പദ്ധതികളുടെ ആവർത്തന സ്വഭാവം ഒഴിവാക്കി ജനോപകാരപ്രദമായ വ്യത്യസ്തങ്ങളായ പദ്ധതികൾ ആവിഷ്ക്കരിച്ച് നടപ്പിലാക്കുന്നതിന് ശില്പശാല സഹായകമാകും എന്ന് മന്ത്രി പ്രത്യാശിച്ചു. പ്രവാസികൾ ഉൾപ്പെടെയുള്ള പുതിയ സംരംഭകർ കടന്നുവരുന്ന സാഹചര്യത്തിൽ ക്ഷീരവികസന-മൃഗസംരക്ഷണ മേഖലകൾ കൂടുതൽ മുന്നൊരുക്കത്തോടെ പ്രവർത്തിക്കേണ്ടതുണ്ട്. പാലുല്പാദനം വർദ്ധിക്കുന്ന സാഹചര്യത്തിൽ മൂല്യവർദ്ധിത ഉല്പന്നങ്ങളുടെ ഉല്പാദനം പ്രോത്സാഹിപ്പിക്കുകയും മെച്ചമായ വിപണി കണ്ടെത്തുന്നതിന് ക്ഷീരകർഷകരെ സഹായിക്കുകയും ചെയ്യേണ്ടതുണ്ട്. പശുക്കളുടെ ഉല്പാദന ശരാശരി വർദ്ധിപ്പിക്കുന്നതുൾപ്പെടെയുള്ള രംഗങ്ങളിൽ നാം മുന്നോട്ട് പോകേണ്ടതുണ്ട്. പാൽ, മുട്ട, മാംസം എന്നീ മൂന്ന് ഉല്പാദന മേഖലകളിലും കർഷക താല്പര്യം സംരക്ഷിച്ചുകൊണ്ടുള്ള പുരോഗതി കൈവരിക്കുന്നതിന് ശില്പശാലയിൽ ക്രോഡീകരിച്ച പദ്ധതി രൂപീകരണ സംഗ്രഹം സഹായകമാകട്ടേയെന്ന് മന്ത്രി ആശംസിച്ചു.
മൃഗസംരക്ഷണ വകുപ്പ് ഡയറക്ടർ ഡോ.എ. കൗശിഗൻ ഐ.എ.എസ്, ക്ഷീരവികസന വകുപ്പ് ഡയറക്ടർ ശ്രീ. വി.പി. സുരേഷ്‍കുമാർ എന്നിവർ പദ്ധതി രൂപീകരണ ചർച്ചാസംഗ്രഹം അവതരിപ്പിച്ചു. ക്ഷീരവികസന വകുപ്പ് ജോയിന്റ് ഡയറക്ടർ ശ്രീ. സി. സുജയ്‍കുമാർ സമാപന സമ്മേളനത്തിന് സ്വാഗതവും മൃഗസംരക്ഷണ വകുപ്പ് അഡീഷണൽ ഡയറക്ടർ ഡോ.ജിജിമോൻ ജോസഫ് നന്ദിയും പറഞ്ഞു.