എം കെ പി മാവിലായി
ശരീരത്തിന് ശക്തിയും ആരോഗ്യവും നൽകുന്നതിൽ മാതളപ്പഴത്തിനുള്ള കഴിവ് നമ്മുടെ പൂർവികർ കണ്ടെത്തിയിരുന്നു. പഴവർഗ്ഗ വിള എന്നതിലുപരി ഇതിനെ ഒരു ഔഷധ വിളയായിട്ടാണ് ആയുർവേദത്തിലും മറ്റും ഇതിനെ പരിഗണിച്ചിരിക്കുന്നത്.
പ്യൂണിക്കേസിയേ (Punicacaceae) കുടുംബാംഗമായ ഈ ചെടിയുടെ ശാസ്ത്രനാമം പ്യൂണിക്ക ഗ്രാനേറ്റം (Punica granatum) എന്നാണ്.
ലോകത്ത് പല രാജ്യങ്ങളിലും മാതളം വളരുന്നുണ്ടെങ്കിലും പശ്ചിമേഷ്യയിലും ഇന്ത്യയിലും ചൈനയിലുമാണ് ഇത് വാണിജ്യാടിസ്ഥാനത്തിൽ കൃഷി ചെയ്തു വരുന്നത്. ഇന്ത്യയിൽ തോട്ടമടിസ്ഥാനത്തിൽ ഏറ്റവും കൂടുതൽ മാതളം വളർത്തുന്നത് മഹാരാഷ്ട്രയിലാണ് .
മാതള മരത്തിന് ആയുസ്സ് ഏറെയുണ്ടെങ്കിലും 15 വർഷങ്ങൾക്ക് ശേഷം കായ്ക്കൽ നാമമാത്രമാകും.
മാതളപ്പൂവിനും പഴത്തിനും അതീവ ഭംഗിയുളളതിനാൽ പൂന്തോട്ടങ്ങളിൽ അലങ്കാര വൃക്ഷമായി വളർത്തുന്നവരുമുണ്ട്.
വിത്തുകൾ ഉപയോഗിച്ചും പതിവെച്ചും തൈകൾ ഉൽപ്പാദിപ്പിക്കാം. വിത്ത് തൈകൾ കായ്ക്കാൻ കൂടുതൽ കാലമെടുക്കും. പതിവെച്ച് (Air layering) തയ്യാറാക്കിയ തൈകൾ നട്ട് മൂന്നാം വർഷം തന്നെ കായ്ച്ചു തുടങ്ങും.
ഇന്ന് ഉൽപ്പാദന ശേഷി കൂടിയ സങ്കരയിനങ്ങളും വികസിപ്പിച്ചെടുത്തിട്ടുണ്ട്. ഗണേഷ്, ഐശ്വര്യ,ഭാഗ്യ, മൃദുലഎന്നിവയാണ് മികച്ച സങ്കര ഇനങ്ങൾ . എല്ലാവർഷവും നല്ല രീതിയിൽ ജൈവ വളങ്ങൾ നൽകുന്നതോടൊപ്പം കേട് വന്നതും ശോഷിച്ചു വളരുന്നതുമായ ശാഖകൾ മുറിച്ചു മാറ്റാനും ശ്രദ്ധിച്ചാൽ ചെടി സമൃദ്ധമായി കായ്ക്കും.
മാതളപ്പഴം ആരോഗ്യത്തിന് ഏറെ നല്ലതാണ്. ഇത് ശരീരത്തിലെ ടെസ്റ്റോസ്റ്റിറോൺ എന്ന ഹോർമോണിന്റെ ഉൽപ്പാദനം വർധിപ്പിക്കുന്നു. ഇത് വഴി ശരീരത്തിന്റെ ഊർജ്ജസ്വലതയും ഓർമ്മശക്തിയും പതിന്മടങ്ങ് വർധിക്കും. വിറ്റാമിൻ ബി വർഗ്ഗത്തിലെ ഫോളിക് ആസിഡ്,
വിറ്റാമിൻ സി എന്നിവയും ധാതുലവണങ്ങളായ കാൽസ്യം, മനീഷ്യം, സൾഫർ എന്നിവയും പഴത്തിൽ ധാരാളമായി അടങ്ങിയിട്ടുണ്ട്.
മാതളത്തിൽ അടങ്ങിയിട്ടുളള ആന്റി ഓക്സിഡന്റ് പദാർത്ഥങ്ങൾ ശരീരത്തിൽ രക്തചംക്രമണം വർധിപ്പിച്ച് ഹോർമോണുകളുടെ സമതുലനാവസ്ഥ നില നിർത്തുന്നു. ഈ ഫലത്തിൽ കാണപ്പെടുന്ന കൊളാജെൻ , എലാസ്റ്റിൻ എന്നീ ഘടകങ്ങൾ ചർമ്മത്തിലെ മുറിവുകൾ മാറാൻ സഹായിക്കുന്നു.
കുട്ടികൾക്കുണ്ടാകുന്നവയറു വേദനക്കും , വയറിളക്കത്തിനും മാതളത്തിന്റെ മൂക്കാത്ത കായ അരച്ചു തേനിൽ ചേർത്ത് നാവിൽ തേച്ച് കൊടുക്കുന്നത് നാട്ട് ചികിത്സയാണ്. മാതള തോടിട്ട് തിളപ്പിച്ച വെളളം കുടിക്കുന്നത് ശരീരക്ഷീണമകറ്റാൻ ഉപകരിക്കും. വിഷജന്തുക്കൾ കടിച്ചാൽ കടിയേറ്റ ഭാഗത്ത് മാതളത്തിന്റെ പച്ചയില അരച്ച് പുരട്ടുന്ന പതിവും ഉണ്ട്. ഇത് വിഷശമനത്തിന് ഏറെ ഗുണം ചെയ്യുമത്രേ.
മാതളത്തിന്റെ വേരിന്റെ തൊലി, മാതളപ്പൂവ്, മാതളത്തോട് എന്നിവ വിവിധ തരത്തിലുള്ള രോഗങ്ങൾക്കും ശാരീരികാസ്വാസ്ഥ്യങ്ങൾക്കും വളരെ ഫലപ്രദമാണ്. മാതള വേരിന്റെ തൊലി കഷായം വെച്ച് കഴിച്ചാൽ വയറ്റിന്നകത്തുള്ള നാടവിര , കൃമി എന്നിവയെല്ലാം പുറത്തു പോകും.
ഒരു മാതള നാരങ്ങയുടെ മുകൾഭാഗത്ത് ദ്വാരമുണ്ടാക്കി ശുദ്ധമായ ബദാമിന്റെ എണ്ണ അതിൽ നിറച്ച് അടച്ച് വെക്കുക. ഒരു മണിക്കൂർ കഴിഞ്ഞാൽ എണ്ണ ഫലത്തിൽ അലിഞ്ഞ് ചേരും. ആ പഴത്തിന്റെ അല്ലി പതിവായി കഴിച്ചാൽ പഴക്കം ചെന്ന ചുമയും ശ്വാസംമുട്ടലും മാറുമെന്ന് പാരമ്പര്യ ചികിൽസാ രീതികളിൽ പറയുന്നുണ്ട്.
ദാഡി മാദി ചൂർണ്ണം, ദാ ഡി മാദി ഘൃതം, ദാഡിമാദി കഷായം എന്നിവയിലെയെല്ലാം പ്രധാന ചേരുവയാണിത്.
ദേവഭാഷയായ സംസ്കൃതത്തിൽ മാതളത്തിന് ദാഡിമാഫലമെന്നാണ് പറയുന്നത്…
