എം കെ പി മാവിലായി
ഈയടുത്തകാലത്ത് നമ്മുടെ മാർക്കറ്റിൽ ധാരാളമായി വിറ്റഴിയുന്ന രുചികരമായ പഴമാണ് ലിച്ചി .
സാപ്പിൻഡേസി (sapindaceae) കുലത്തിൽപ്പെട്ട ഇതിന്റ ശാസ്ത്രനാമം നെഫ് ലിയം ലിച്ചി (Nephelium litchi) എന്നാണ്. ചെെനയാണ് സ്വദേശം. ഇത് ഇന്ത്യയിലെത്തിച്ചതും ചൈനക്കാരാണ്.
ഉത്തരേന്ത്യൻ സംസ്ഥാനങ്ങളിലെ തണുപ്പുള്ള സ്ഥലങ്ങളിൽ ലിച്ചി ഇപ്പോൾ വിപുലമായി വളർത്തുന്നുണ്ട്. നമ്മുടെ സംസ്ഥാനത്ത് പൊതുവെ എല്ലായിടത്തും ലിച്ചി സമൃദ്ധമായി വളരുമെങ്കിലും പൂക്കലും കായ്ക്കലും വിരളമാണ്. രാത്രികാലത്തെ ദീർഘമേറിയ തണുപ്പ് ഇതിന്റെ കായ് പിടുത്തത്തെ സ്വാധീനിക്കുന്ന മുഖ്യ ഘടകമാണ്.
കേരളത്തിലെ മൂന്നാർ . ഇടുക്കി ഹൈ റേഞ്ച് മേഖലകളിൽ ഇവ നന്നായി ഫലം നൽകുന്നതായി കണ്ടിട്ടുണ്ട്.
വയനാട് ജില്ലയിലെ അമ്പല വയൽ പ്രാദേശിക കാർഷിക ഗവേഷണ കേന്ദ്രത്തിൽ ബ്രിട്ടീഷ്കാരുടെ കാലത്ത് നട്ട മുത്തശ്ശി ലിച്ചി മരങ്ങൾ ഇന്നും യൗവന പ്രസരിപ്പോടെ നിലനിൽക്കുന്നുണ്ട്. നിറയെ കായ്ക്കുന്ന നിരവധി മരങ്ങൾ ഇന്ന് വയനാട്ടിൽ പലയിടങ്ങളിലും കാണാം.
ഇവയുടെ തൈകൾ വിത്ത് ഉപയോഗിച്ചും പതിവെച്ചും തയ്യാറാക്കാം. വിത്ത് തൈകൾ അമ്മ മരത്തിന്റെ അതേ സ്വഭാവം കാണിച്ചെന്ന് വരില്ല. കായ്ക്കാനും കൂടുതൽ കാലതാമസമെടുക്കും. നട്ട് പത്ത് വർഷമെങ്കിലും എടുക്കും കായ്ക്കാൻ . എന്നാൽ പതിവെച്ച തൈകൾ നട്ട് മൂന്ന് – നാല്‌ വർഷം മുതൽ കായ്ച്ച് തുടങ്ങും.പച്ചകലർന്ന വെളുപ്പും മഞ്ഞയുമായ ചെറിയ പൂക്കൾ ശിഖരാഗ്രങ്ങളിൽ കലകളായാണ് കാണുക.ലിച്ചിയുടെ വിത്ത് ശേഖരിച്ച് ഒരാഴ്ചക്കകം നടണം. അധിക നാൾ കഴിയുമ്പോൾ വിത്തിന്റെ കിളിർക്കാനുള്ള കഴിവ് നഷ്ടപ്പെടും.
കായ്കൾക്ക് പൂർണ്ണ നിറമാകുമ്പോൾ വിളവെടുക്കാം. ദൂരസ്ഥലങ്ങളിലേക്കയക്കാൻ പാതി നിറമെത്തിയ കായ്കളാണ് നല്ലത്.പതിവെച്ച തൈകൾ അഞ്ച് വർഷം പ്രായമെത്തിയാൽ അഞ്ഞൂറ് വരെ പഴങ്ങൾ നൽകും . ഇത് ക്രമേണ വർധിച്ചു പ്രായം ഇരുപതാകുമ്പോൾ 4000 മുതൽ 5000 വരെ ഫലം പ്രതീക്ഷിക്കാം.ലിച്ചിപ്പഴത്തിന്റെ പരുപരുത്ത പുറന്തോട് നീക്കം ചെയ്യണം. ഉൾഭാഗത്തിൽ ബട്ടർ നിറത്തിലുള്ള തൊലി നീക്കിയ മുന്തിരിപ്പഴത്തിനോട് സാമ്യമുളള പൾപ്പ്
അതീവ രുചികരമാണ്.
ലിച്ചിപ്പഴത്തിന് മികച്ച പോഷക ഗുണവും ഔഷധ ഗുണവുമുണ്ട്.പഴത്തിൽ കാർബോ ഹൈഡ്രേറ്റ്, വിറ്റാമിനുകൾ, ധാതുലവണങ്ങൾ എന്നിവ നല്ല തോതിൽ അടങ്ങിയിരിക്കുന്നു.ചുമ, ഗ്രന്ഥിവീക്കം, അൾസർ എന്നീ രോഗ നിയന്ത്രണത്തിന് ലിച്ചിപ്പഴം ഗുണകരമാകുമത്രേ.ഐസ് ക്രീം, ജാം, ജ്യൂസ്, ജെല്ലി എന്നീ രൂപങ്ങളിലും ലിച്ചി ഇന്ന് വിപണിയിലെത്തുന്നുണ്ട്.
ഡെഹറ റോസ്, മാക്സിൻ . റോസ് സെന്റഡ്, പർബി, പ്യാസി, ബഡാന എന്നിവ ലിച്ചിയിലെ മികച്ച സങ്കര ഇനങ്ങളാണ്.
