തെങ്ങിലെ കുറിയ ഇനങ്ങളും സങ്കര ഇനങ്ങളും

എ കെ പി മാവിലായി

തെങ്ങിലെ കുറിയ ഇനങ്ങൾക്ക് ഇപ്പോൾ വലിയ പ്രചരണമാണ് നടക്കുന്നത്. വലിയ വില നൽകിയാണ് പലരും ഇത് വാങ്ങി നട്ട് പരിപാലിക്കുന്നത്.ഇവയുടെ ഗുണങ്ങളായി കാണുന്നത് നേരത്തെയുള്ള കായ് പിടുത്തം, വർദ്ധിച്ച ഉൽപ്പാദന ശേഷി, വിളവെടുപ്പിനുളള സൗകര്യം എന്നിവയൊക്കെയാണ്.എന്നാൽ തെങ്ങിലെ കുറിയ ഇനങ്ങളുടെ പൊതുവെയുള്ള പ്രത്യേകതകൾ എന്തൊക്കെയാണെന്ന് നോക്കാം.കുറിയ ഇനങ്ങളിൽ ഉയരം സാധാരണ ആറ് മീറ്ററിൽ കവിയാറില്ല. അതിനാൽ വിളവെടുക്കൽ എളുപ്പമാണ്.
അനുകൂല സാഹചര്യങ്ങളിൽ നട്ടു പരിപാലിച്ചാൽ മൂന്നാം വർഷം തന്നെ കായ്ച്ച് തുടങ്ങും.തേങ്ങ ചെറുതോ ഇടത്തരം വലുപ്പമുളള തോ ആയിരിക്കും.ആകർഷകമായ പച്ച, ഓറഞ്ച്, മഞ്ഞ, ചുവപ്പ് എന്നീ നിറങ്ങളിൽ കാണുന്നതു കൊണ്ട് അലങ്കാരത്തിനും ഉപകരിക്കും.നെടിയ ഇനങ്ങൾ 100 വർഷം വരെ ജീവിക്കുമ്പോൾ കുറിയവയുടെ ആയുസ്സ് 50 വർഷത്തിൽ താഴെയായിരിക്കും.
പൊതുവെ വിളവ് കൂടുതലാണ്.ചില കുറിയ ഇനങ്ങളിൽ കരിക്കിൻ വെളളം നല്ല മധുരമുള്ളതാണ്.കുറിയവയുടെ ഓലയും മട്ടലുകളും ചെറുതാണ്. ഓലയുടെ നീളം നാലു മീറ്ററിൽ കുറവായിരിക്കും.കുറിയവക്ക് പൊതുവെ ഒന്നിടവിട്ട് കായ്ക്കുന്ന സ്വഭാവമുണ്ട്.
കൊപ്രയുടെ ഗുണം മോശമാകയാൽ എണ്ണ ഉൽപ്പാദനത്തിന് അനുയോജ്യമല്ല. ഇളനീർ ആവശ്യങ്ങൾക്കാണ് മെച്ചം’ .
കുറിയ ഇനങ്ങൾ സങ്കരയിനങ്ങൾ ഉണ്ടാക്കുന്നതിന് അനുയോജ്യ സ്വഭാവ ഗുണങ്ങൾ ഉളളതാണ്.ചാവക്കാട് ഗ്രീൻ ഡ്വാർഫ്,ചാവക്കാട് ഓറഞ്ച് ഡ്വാർഫ്, യെല്ലോ സ്വാർഫ് ,മലയൻ ഡ്വാർഫ്,ഗംഗാ ബോന്ദം,ആയിരം കാച്ചി എന്നിവയാണ് കുറിയ തെങ്ങിനങ്ങൾ.
സങ്കര ഇനങ്ങൾ

ഉയരം കൂടിയതെങ്ങുകൾ എല്ലാ വർഷവും ഒരേ പോലെ കായ്ക്കുകയും ഗുണനിലവാരമുള്ള തേങ്ങ തരുകയും ചെയ്യുന്നു. പക്ഷെ വിളവ് കുറവാണ്. കുറിയ ഇനങ്ങൾക്ക് ചില നല്ല സ്വഭാവ വിശേഷങ്ങൾ ഉണ്ട്. നേരത്തെ കായ്ക്കുക, കൂടുതൽ പെൺപൂക്കൾ ഉണ്ടാകു ക, കൂടുതൽ തേങ്ങയുണ്ടാകുക, പെൺപുക്കൾ തേങ്ങയായി മാറുന്ന ശതമാനം കൂടുതൽ, ഉയരക്കുറവ് എന്നിവയാണവ. കൃത്രിമ പരാഗണം നടത്തി രണ്ടിനങ്ങളുടേയും നല്ല സ്വഭാവ ഗുണങ്ങൾ ഒരു തെങ്ങിൽ സ്വരൂപിക്കാനുള്ള ശ്രമമാണ് സങ്കരയിനം തെങ്ങുകളുണ്ടാക്കുന്നതിൽ പ്രേരണയായത്.
ലക്ഷഗംഗ, അനന്ത ഗംഗ,കേരഗംഗ, കേര സങ്കര, ചന്ദ്ര സങ്കര, കേരശ്രീ , കേര സൗഭാഗ്യ, ചന്ദ്രലക്ഷ എന്നിവയാണ് ഇപ്പോൾ ഉൽപ്പാദിപ്പിക്കുന്ന പ്രധാന സങ്കര ഇനങ്ങൾ.

സങ്കര ഇനങ്ങൾ പൊതുവെ ഓരോ പ്രദേശത്തേക്കും അനുയോജ്യമായത് തെരഞ്ഞെടുത്ത് നടാൻ ശ്രദ്ധിക്കണം.
അനന്ത ഗംഗ, കേരഗംഗ, കേര സങ്കര എന്നീ ഇനങ്ങൾ മഴയെ ആശ്രയിച്ചുള്ള കൃഷിക്കും, ജലസേചിത കൃഷിക്കും പൊതുവായി ശുപാർശ ചെയ്യപ്പെട്ടിട്ടുള്ളവയാണ്.
മറ്റു സങ്കര ഇനങ്ങൾ പ്രത്യേകിച്ചും ചന്ദ്ര സങ്കര നല്ല പരിപാലനം ലഭിക്കുന്ന ഇടങ്ങളിലേക്ക് പറ്റിയതാണ്.
കുറിയ ഇനങ്ങൾ സങ്കര ഇനങ്ങളാണെന്ന ധാരാണയാൽ നട്ടുപിടിപ്പിക്കുന്നവരുണ്ട്. ഇത് ശരിയല്ല. എന്നാൽ ഇളനീർ ആവശ്യങ്ങൾക്കായി മാത്രം നട്ടുപിടിപ്പിക്കുന്നതാവും ഉചിതം.

സങ്കര ഇനങ്ങളധികവും ഇടത്തരം ഉയരത്തിൽ വളരുന്നവയാണ്.