മുളളൻ ചക്ക : കറിക്കും ഔഷധത്തിനും

എം കെ പി മാവിലായി

അടുത്ത കാലങ്ങളിലായി പ്രശസ്തിയിലേക്കുയർന്ന ഫലമാണ് മുള്ളാത്ത അഥവാ മുള്ളൻ ചക്ക.
മുൻ കാലങ്ങളിൽ അവഗണിച്ചിരുന്ന മുള്ളാത്തക്ക് വിപണിയിൽ വൻ ഡിമാന്റാണിപ്പോൾ.
അനോനേസിയേ (Annonaceae) കുടുംബത്തിൽപ്പെട്ട ഈ ചെടിയുടെ ശാസ്ത്രനാമം അനോന മ്യൂറിക്കേറ്റ (Annona muricata ) എന്നാണ്.
അമേരിക്കൻ സ്വദേശിയാണ്. പോർച്ചുഗീസുകാർ വഴിയാണ് ഇവിടെ കുടിയേറിയത്. ശാഖകളും ഉപശാഖകളുമായി ഇടത്തരം ഉയരത്തിൽ വളരുന്ന ഈ ചെടിയുടെ ഇലകൾ കടും പച്ചനിറത്തോട് കൂടിയതും പുറംഭാഗം മിനുത്തതുമാണ്.
വിത്ത് വഴിയാണ് ഇതിന്റെ സ്വാഭാവിക പ്രജനനം. വിത്തുകൾ കായയിൽ നിന്നും ശേഖരിച്ച ശേഷം അധിക നാൾ കഴിയും മുമ്പേ നടണം. പഴകുന്തോറും വിത്തിന്റെ കിളിർപ്പ് ശേഷി കുറഞ്ഞു പോകും.

ചെടികൾ നട്ട് അനുകൂല സാഹചര്യങ്ങളിൽ നാല് – അഞ്ച് വർഷങ്ങൾ കൊണ്ടു തന്നെ പൂക്കുകയും കായ്ക്കുകയും ചെയ്യും.
സാമാന്യം വലുപ്പമുള്ള പൂക്കൾ ഒറ്റയ്ക്കും രണ്ട് മൂന്ന് എണ്ണത്തിന്റെ കൂട്ടമായും ഉണ്ടാകും. കാലഭേദമന്യേ എല്ലായ്പ്പാഴും കായ്കൾ ഉണ്ടാകുമെങ്കിലും വേനൽ മാസങ്ങളിലാണ് കൂടുതലായും കായ്കൾ ഉണ്ടാവുന്നത്. കായ്കൾക്ക് 400 ഗ്രാം വരെ തൂക്കം കാണും . പച്ചനിറമുളള കായ്കൾക്ക് മഞ്ഞ നിറം പകരുന്നതോടെ
പഴം ഭക്ഷ്യയോഗ്യമായി എന്നു കണക്കാക്കാം.
ഇളം ക്രീം നിറത്തിലുള്ള ഉൾഭാഗത്തിന് മധുരവും പുളിയും ചേർന്ന രുചിയാണു ഇത്. പഴുക്കും മുമ്പെ ഇത് കറി വെച്ചും കഴിക്കാം. കായ്കളിൽ കറുപ്പ് നിറത്തിലുളള നിരവധി വിത്തുകളുണ്ടാവും.

ഇതിന്റെ ഔഷധ ഗുണങ്ങൾ ശാസ്ത്രീയമായി തിരിച്ചറിഞ്ഞതോടെയാണ് മുള്ളാത്തക്ക് നിരവധി ആരാധകരുണ്ടായത്.
മുള്ളൻ ആത്തയിൽ നിന്നും വേർതിരിച്ചെടുത്തിട്ടു
ളള അസെറ്റോ ജെനിൻ കാൻസർ ചികിത്സയിൽ വളരെയധികം ഉപയോഗമുളളതായി പഠനങ്ങൾ തെളിയിക്കുന്നു. അമേരിക്കയിലെ പർഡ്യൂസർവ്വകലാശാല, സൗത്ത് കൊറിയയിലെ കാത്തലിക് സർവകലാശാല, അമേരിക്കയിലെ കാൻസർ റിസർച്ച് സെന്റർ ഇവിടെയെല്ലാം നടത്തിയ വിവിധ ഗവേഷണങ്ങളിൽ നിന്നും ഗുരുതര കാൻസറിന് കാരണമാകുന്ന കോശങ്ങളെ നശിപ്പിക്കുവാൻ മുള്ളൻ ആത്തയുടെ സത്തിന് സാധിക്കുമെന്ന് കണ്ടെത്തിയിട്ടുണ്ട്. ഇതിന് പുറമെ ട്യൂമർ, ബാക്ടീരിയ രോഗങ്ങൾക്കും പഴത്തിന്റെ സത്ത് മികച്ച ഔഷധമാണത്രേ.
ഇതിന്റെ ഫലത്തിന് പുറമെ ഇല, വിത്ത്, തണ്ട് ഇവയിലും അസറ്റോജെനിൻ അടങ്ങിയിട്ടുണ്ട്.
മുൻ കാലങ്ങളിൽ നമ്മുടെ പാരമ്പര്യ വൈദ്യന്മാർ കുഞ്ഞുങ്ങൾക്കുണ്ടാകുന്ന വയറുവേദന, കഫക്കെട്ട്, വാതം എന്നീ രോഗങ്ങൾക്ക് പ്രതിവിധിയായി മുളളഞ്ചക്ക സത്ത് ഉപയോഗിച്ചിരുന്നു.

ഔഷധ ഗുണത്തിലെന്നപോലെ പോഷക നിലയിലും ആത്തച്ചക്കക്ക് മഹനീയ സ്ഥാനമുണ്ട്. പഴത്തിലെ പുളിരസം നൽകുന്നത് അസ്കോർബിക് അമ്ളമാണ്. 100 ഗ്രാം പൾപ്പിൽ 48 മില്ലിഗ്രാം വരെ ഇത് അടങ്ങിയിട്ടുണ്ട്. കൂടാതെ ഈ പഴത്തിൽ കാത്സ്യം, ഫോസ്ഫറസ്, പൊട്ടാസ്യം, സിങ്ക്, കോപ്പർ, മാംഗനീസ്, ഇരുമ്പ് എന്നീ ലവണങ്ങളും ഉണ്ട്.