നമുക്ക് തയ്യാറാക്കാവുന്നഅമിനോ അമ്ലങ്ങൾ

ജൈവകർഷകർ മാത്രമല്ല രാസവളങ്ങൾ ഉപയോഗിക്കുന്ന കർഷകരും ഇന്ന് പ്രകൃതിദത്തമായി തയ്യാറാക്കി ഉപയോഗിക്കാവുന്ന അമിനോ അമ്ലങ്ങളുടെ ആരാധകരാണ്.

നമ്മുടെ നാട്ടിൽ കൂടുതലായും പച്ചക്കറി കൃഷിയിൽ ഉപയോഗപ്പെടുത്തുന്ന ഇവ, സൂഷ്മ ജീവികളുടെ വംശവർദ്ധനവിനും ചെടികളുടെ സമൃദ്ധമായ വളർച്ചക്കും കായ് പിടിത്തത്തിനും മാത്രമല്ല ഗുണമേന്മ വർദ്ധിക്കുന്നതിനും സഹായകരമാണെന്നാണ് ഇന്ത്യയിലെങ്ങുമുള്ള കൃഷിക്കാരുടെ അനുഭവം .

വീടുകളിലും കൃഷിയിടങ്ങളിലും എളുപ്പം തയ്യാറാക്കാവുന്ന അമിനോ അമ്ലങ്ങളാണ് മീൻ അമിനോ അമ്ലവും മുട്ട അമിനോ അമ്ലവും .

മത്തിക്കഷായം

നമ്മുടെ നാട്ടിൽ സുലഭവും വിലകുറഞ്ഞതുമായ മത്തിയാണ് മീൻ അമിനോ ആസിഡ് ഉണ്ടാക്കാനായി കൂടുതലും ഉപയോഗിക്കുന്നതു്. എങ്കിലും നീലയും കറുപ്പും നിറത്തിലുള്ള മത്സ്യങ്ങളിലാണ് അമിനോ അമ്ലങ്ങൾ കൂടുതലുള്ളതു് എന്ന് പഠനങ്ങൾ തെളിയിക്കുന്നുണ്ട്.
മത്തി ഉപയോഗിച്ചാണ് ഇത് തയ്യാറാക്കുന്നതെങ്കിൽ മത്തിയും ശർക്കരയും സമമായി എടുക്കണം . ഉദാഹരണത്തിന് അരകിലോ മത്തിയും അരക്കിലോ ശർക്കരയും . മത്തി ചെറുതായി അരിഞ്ഞിടുക. ശർക്കര പൂർണ്ണമായും പൊടിക്കണം . ഇവ രണ്ടും നന്നായി യോജിപ്പിച്ച് ഭദ്രമായി മൂടി വെയിൽ കൊള്ളാത്ത ഒരു സ്ഥലത്ത് വെക്കുക . ഇടക്കിടെ നന്നായി കുലുക്കി യോജിപ്പിക്കുന്നത് നല്ലതാണ് . 20 – 25 ദിവസങ്ങൾക്ക് ശേഷം പാത്രത്തിലുള്ളത് ഒരു നേരിയ തുണി ഉപയോഗിച്ച് അരിച്ച് പിഴിഞ്ഞെടുക്കാവുന്നതാണ്.

ഇത് 2 മുതൽ 5 മില്ലി ലിറ്റർ വരെ ഒരു ലിറ്റർ വെള്ളത്തിൽ കലക്കി ചെടികളിൽ ഒരാഴ്ച ഇടവേളകളിൽ തളിക്കാവുന്നതാണ്.


മുട്ടക്കഷായം

തമിഴ്നാട്ടിലെ തേനി ജില്ലയിലുള്ള വീര്യചിന്നമ്മാൾ എന്ന നാട്ടുവൈദ്യ ആസ്തമ രോഗത്തിന് നൽകി വന്ന ഒററമൂലി ചില മാറ്റങ്ങളോടെ ഇന്ന് ജൈവകർഷകരുടെ കൺകണ്ട വളർച്ചാ ത്വരകമാണ് . വിളകൾ പുഷ്ടിയോടെ വളരാനും നിറയെ പൂക്കളും കായ്കളുമുണ്ടാകാനും ഇത് സഹായകരമാണെന്നാണ് കൃഷിക്കാരുടെ വിലയിരുത്തൽ .
മുട്ടയും ചെറുനാരങ്ങനീരും ഉപയോഗിച്ചാണീ മുട്ടക്കഷായം ( മുട്ട അമിനോ ആസിഡ്) തയ്യാറാക്കുന്നത്. കോഴിയുടേയോ താറാവിന്റെയോ മുട്ടകൾ ഇതിനായി ഉപയോഗിക്കാമെങ്കിലും കോഴിമുട്ടകളാണ് അമിനോ അമ്ലങ്ങളിൽ മുൻപന്തിയിൽ . അഞ്ച് മുട്ടകൾ പൂർണ്ണമായും മുങ്ങി നിൽക്കത്തക്കവണ്ണം പത്തോ പതിനഞ്ചോ ചെറുനാരങ്ങയുടെ നീരും തയ്യാറാക്കി വെക്കണം. വായ് വിസ്തൃതിയുള്ള ഒരു പാത്രത്തിൽ മുട്ടകൾ പൊട്ടാതെ ഇറക്കി വെക്കുക. മുട്ടകൾ പൂർണ്ണമായും മൂടത്തക്കവിധം ചെറുനാരങ്ങനീര് ഇതിലേക്ക് ഒഴിക്കണം . പാത്രത്തിന്റെ വായ ഭദ്രമായി അടച്ചു വെച്ച ശേഷം വെയിലടിക്കാത്ത ഒരു സ്ഥലത്ത് ഇളക്കാതെ വെക്കുക . പത്ത് ദിവസങ്ങൾക്ക് ശേഷം മൂടി തുറന്ന് 250 ഗ്രാം ശർക്കര ഉരുക്കി ഇതിലേക്ക് ഒഴിക്കുക . ഇവ നന്നായി യോജിപ്പിച്ച് ചേർക്കുക.
പാത്രം വീണ്ടും ഭദ്രമായി മൂടി വെക്കുക. പത്ത് ദിവസം കൂടിക്കഴിഞ്ഞ ശേഷമെടുത്ത് നന്നായി ഇളക്കുക. പിന്നീട് നേരിയ തുണി ഉപയോഗിച്ച് അരിച്ച് പിഴിഞ്ഞെടുത്താൽ മുട്ടക്കഷായമായി .

ഇത് ഒന്നോ രണ്ടോ മില്ലി ഒരു ലിറ്റർ വെള്ളത്തിൽ കലക്കി ചെടികളിൽ ഒരാഴ്ച ഇടവിട്ട് തളിക്കാനുപയോഗിക്കാം.

കെ. പി. ജയരാജൻ, മാഹി
9446347813