അഗ്രോറ്റീൻ കേരള സ്റ്റാർട്ടപ്പ് കമ്പനിയാണ് അഗ്രോ ട്രാക്ക് എന്ന ഉത്പന്നം പുറത്തിറക്കിയത്. കൂൺ കൃഷി, മത്സ്യകൃഷി, ഹൈഡ്രോ പോണിക്‌സ്, ഗ്രീൻഹൗസ് തുടങ്ങിയ നിയന്ത്രിത കാർഷിക മേഖലയിൽ ഈ സംവിധാനം ഉപയോഗിക്കാം. കൃഷിയിടത്തിലെ താപനില, ഈർപ്പം തുടങ്ങിയ ഘടകങ്ങൾ മുൻകൂട്ടി നിശ്ചയിച്ച പരിധിക്കപ്പുറം പോയാൽ തത്സമയം അറിയിപ്പുനൽകും. നിയന്ത്രിക്കുകയും ചെയ്യാം.

കൂൺകൃഷി മേഖലയിൽ അഗ്രോ ട്രാക്ക് വിജയകരമാക്കിയിട്ടുണ്ട്. 1000 ചതുരശ്ര മീറ്ററിന് 25,000 രൂപയാണ് സ്ഥാപിക്കാനുള്ള ചെലവ്. ഇന്റർനെറ്റിനും മറ്റ് ചെലവുകൾക്കുമായി മാസം 250 രൂപയും ചെലവാകും. 2022-ൽ അമൽജ്യോതി എൻജിനിയറിങ് കോളേജിലെ പൂർവവിദ്യാർഥികൾ ചേർന്ന് സ്ഥാപിച്ച കമ്പനിയാണ് ഈ ഉത്പന്നം കണ്ടുപിടിച്ചത്.

കട്ടപ്പന സ്വദേശികളായ പ്രവീൺ അലോഷ്യസ്, അലോഷ് ജോണി, ക്രിസ്റ്റീൻ ജോസ് കുരുവിള, മാത്യു ജെയ്‌സ്, ആലപ്പുഴ സ്വദേശി കെ.കെ. ഓനെസിമോസ്, ചെങ്ങന്നൂർ സ്വദേശി ജൂബിൻ രാജ്, കോഴിക്കോട് സ്വദേശി അഭിനവ് ബാവോസ് എന്നിവർ ചേർന്നാണ് ഉത്പന്നം പുറത്തിറക്കിയത്.