പരിമിതമായ വെള്ളത്തെ പരമാവധി പ്രയോജനപ്പെടുത്താൻ കാർഷിക മേഖലയിൽ ഏറ്റവും ഫലപ്രദമായ മാർഗ്ഗങ്ങളിലൊന്നാണ് കണിക ജലസേചനം അഥവാ ഡ്രിപ് ഇറിഗ്രേഷൻ സിസ്റ്റം.
സസ്യങ്ങളുടെ വേരുപടലങ്ങൾ വിന്യസിച്ചിരിക്കുന്ന ഭാഗത്ത് അവയുടെ ജല ആവശ്യത്തെ മനസ്സിലാക്കി, ജലത്തെ വ്യത്യസ്ഥ വ്യാസങ്ങളിലുള്ള പൈപ്പുകളിലൂടെ കൊണ്ട് വന്ന് , കുറഞ്ഞ മർദ്ദത്തിൽ ഡ്രിപ്പറുകൾ അഥവാ എമിറ്ററുകളുടെ സഹായത്താൽ തുള്ളി തുള്ളിയായോ, നേർത്ത ധാരയായോ ചെടികളുടെ ചുവട്ടിൽ ജലം എത്തിക്കുന്ന രീതിയാണിത്.
സസ്യങ്ങളുടെ വേരു പടലങ്ങൾക്ക് വെള്ളം വലിച്ചെടുക്കാവുന്ന പരിധിക്കുള്ളിൽ മാത്രം കൃത്യമായി വെള്ളം നൽകുന്നതിനാൽ ജലനഷ്ടം കുറയുന്നു. കണിക ജലസേചനം വഴി വിളകളുടെ വേഗത്തിലുള്ള വളർച്ചയും പാകമെത്തലും സാധ്യമാകുന്നു. വിളവിൽ ഗണ്യമായ വർദ്ധനയുമുണ്ടാകുന്നു.
തടങ്ങളിൽ സ്ഥിരമായ ഈർപ്പ സാന്നിദ്ധ്യമുണ്ടാകുന്നതു കൊണ്ട് ജലലഭ്യത കുറവായ സ്ഥലങ്ങളിൽ പോലും വരൾച്ചയെ പ്രതിരോധിക്കാൻ ഈ രീതി സഹായിക്കുന്നു. അമിത ജലസേചനത്തിന്റെ പ്രശ്നങ്ങളായ വെള്ളക്കെട്ട്, ലവണാംശങ്ങളുടെ കേന്ദ്രീകരണം തുടങ്ങിയവയിൽ നിന്നും ചെടികളെ സംരക്ഷിക്കാനും കണിക ജലസേചനത്തിന് കഴിയുന്നു.
സസ്യവളർച്ചയുടെ പ്രധാനപ്പെട്ട ഘട്ടങ്ങളിലെല്ലാം വളപ്രയോഗം സാധ്യമാക്കുകയും വളങ്ങൾ മണ്ണിൽ നഷ്ടപ്പെടുന്നത് തടയാനും കഴിയുന്നു. സുരക്ഷിതവും ലളിതവുമായ ഈ രീതിയിൽ വളപ്രയോഗത്തിനുള്ള സമയവും ചിലവും കുറക്കാനാവും.
സൂക്ഷ്മ കൃഷി രീതികളിൽ കണിക ജലസേചനത്തിന് വളരെ പ്രാധാന്യമുണ്ട്. തെങ്ങിൻ തോട്ടങ്ങളിൽ കണിക ജലസേചന രീതി നടപ്പിലാക്കുന്നത് വഴി തെങ്ങിന്റെ ഉൽപ്പാദന ക്ഷമത വിസ്മയിക്കും വിധം വർദ്ധിച്ചതായി നിരവധി അനുഭവങ്ങളുണ്ട്. വേനൽക്കാലത്ത് ഈർപ്പക്കമ്മിക്ക് വിധേയമാകാത്തതെങ്ങ് വേഗം വളരുകയും പുഷ്പിക്കുകയും ചെയ്യുന്നു. കണിക ജലസേചന രീതിയിൽ വളർത്തുന്ന തെങ്ങ് നട്ട് നാലുവർഷം കൊണ്ട് പുഷ്പിക്കുമ്പോൾ വരൾച്ചക്ക് വിധേയമായി വളരുന്ന തെങ്ങ് പത്തു വർഷം കൊണ്ടാണ് പുഷ്പിക്കുക. വളർച്ചയിൽ വരുന്ന കാലതാമസം കൊണ്ടാണ് തെങ്ങ് പുഷ്പ്പിക്കുവാൻ വൈകുന്നത്.
ആവശ്യാനുസരണം നന നൽകി വളർത്തുന്നതെങ്ങിലെ ഓരോ പൂങ്കുലയിലും താരതമ്യേന കൂടുതൽ പെൺപൂക്കൾ (മച്ചിങ്ങ) ഉണ്ടാകുന്നു. വരൾച്ചക്ക് വിധേയമാകാത്ത
തെങ്ങിൽ മച്ചിങ്ങ പൊഴിച്ചിൽ വളരെ കുറവാണെന്നും കാണാവുന്നതാണ്. കണിക ജലസേചനം ഏതു തരം ചെടികളിലായാലും അതിനു ചുറ്റുമായി പരിമിതപ്പെടുത്തുന്നതു കൊണ്ട് കളകൾക്ക് വളരാനുള്ള സാഹചര്യം കുറയുന്നു. വെള്ളവും വളവും നാം വളർത്തുന്ന ചെടികൾക്ക് മാത്രമായി പരിമിതപ്പെടുത്തുന്നതു കൊണ്ട് കളകൾക്ക് വളരാനുള്ള സാഹചര്യം ഇല്ലാതാവുന്നു.
അതിനാൽ വെള്ളവും വളവും വളർത്തു ചെടികൾക്ക് പൂർണ്ണ പ്രയോജനത്തിലായിത്തീരുന്നു. ബാഷ്പീകരണം മൂലമുള്ള ജലനഷ്ടവും ഈ രീതിയിൽ നന്നായി കുറയുന്നു. ചരിവുകളിലും നിരപ്പില്ലാത്ത സ്ഥലങ്ങളിലുമെല്ലാം കണിക ജലസേചന രീതി പ്രായോഗികമാണ്. വിളകൾക്കാവശ്യമായ വളവും ജലത്തിനൊപ്പം നൽകാൻ കഴിയുമെന്നതും ഈ രീതിയുടെ എടുത്തു പറയത്തക്ക നേട്ടമാണ്.
കണിക ജലസേചന പദ്ധതി ഡിസൈൻ ചെയ്യുന്നതിനും സ്ഥാപിക്കുന്നതിനും സാങ്കേതികജ്ഞാനം ആവശ്യമാണ്. പമ്പ് സെറ്റ് , സൂക്ഷ്മമമായ മാലിന്യങ്ങളെപ്പോലും അരിച്ചെടുക്കുന്നതിനുള്ള ഫിൽറ്റർ, ജലം തുള്ളി തുള്ളിയായി ചെടികളുടെ വേരുപടലങ്ങളിൽ എത്തിക്കുന്നതിനുള്ള ഡ്രിപ്പറുകൾ അഥവാ എമിറ്ററുകൾ, എമിറ്ററുകളെ വഹിക്കുന്ന ലാറ്ററൽ സ് , പ്രധാന പൈപ്പുകളും ഉപ പൈപ്പുകളും , വെൻ ച്യുറി എന്നിവയാണ് ഒന്ന കണിക ജലസേചന സിസ്റ്റത്തിന്റെ പ്രധാന ഭാഗങ്ങൾ.
കണിക ജലസേചന രീതിയുടെ പ്രാധാന്യം കണക്കിലെടുത്ത് അത് പ്രോത്സാഹിപ്പിക്കുന്നതിന് കൃഷി വകുപ്പിലൂടെ ധനസഹായവും ബാങ്ക് വായ്പാ സൗകര്യങ്ങളും ഏർപ്പെടുത്തിയിട്ടുണ്ട്. കർഷകർ ഈ കണിക ജലസേചന രീതി നടപ്പിലാക്കുന്നതിന് മുന്നോട്ട് വരുന്നുണ്ടെങ്കിലും പലരും ഈ രീതി ഉദ്ദേശിക്കുന്ന വിധത്തിൽ തുടർന്നങ്ങോട്ട് ഫലപ്രദമായി ഉപയോഗപ്പെടുത്തുന്നതായി കാണുന്നില്ല. മിക്ക തെങ്ങിൻ തോപ്പുകളിലും കണിക ജലസേചന യൂണിറ്റുകളിൽ നിർദ്ദേശിച്ചിട്ടുള്ളതിനേക്കാൾ കുറഞ്ഞ ഡ്രിപ്പിങ്ങ് പോയിന്റുകൾ മാത്രമാണ് സ്ഥാപിച്ചതായി കാണുന്നത്. അതുപോലെ തെങ്ങിൻ തടിയിൽ നിന്ന് ഒരു മീറ്റർ അകലത്തിലാണ് ഡ്രിപ്പിങ്ങ് പോയിന്റുകൾ സ്ഥാപിക്കേണ്ടത്. എന്നാൽ ബഹുഭൂരിഭാഗം തെങ്ങിൻ തോപ്പുകളിലും നിർദ്ദേശിച്ചിട്ടുള്ളതിനേക്കാൾ കുറഞ്ഞ അകലത്തിലാണ് ഇവ ക്രമീകരിച്ച് കാണുന്നത്.
ഡിപ്പറുകൾ അടഞ്ഞു പോകുന്നത് മിക്ക തോട്ടങ്ങളിലും പ്രശ്നമായി കണ്ടിട്ടുണ്ട്. നല്ല രീതിയിലുള്ള ഫിൽറ്ററുകൾ ഉപയോഗിക്കാത്തതാണ് ഇതിന് മുഖ്യ കാരണം. കൃഷിയിടങ്ങളിൽ ബാഷ്പീകരണം മൂലമുള്ള ജലനഷ്ടം ഒഴിവാക്കുന്നതിന് കണിക ജലസേചന രീതിയിൽ വെള്ളം മണ്ണിന്നടിയിൽ നൽകുന്നതിനുള്ള സംവിധാനം അപൂർവ്വം ചില തോട്ടങ്ങളിൽ മാത്രമാണ് കാണുന്നത്.ചിലയിടങ്ങളിൽ മർദ്ദം ക്രമീകരിക്കാൻ സഹായിക്കുന്ന എമിറ്ററുകൾ ഉപയോഗപ്പെടുത്താത്തതും കാര്യ ക്ഷമത കുറയ്ക്കാൻ കാരണമാകുന്നു.
കാർഷിക രംഗത്തെ ഉൽപ്പാദന ക്ഷമത വർദ്ധിപ്പിക്കുവാനും അതോടൊപ്പം സ്ഥല പരിമിതിയെ മറി കടന്ന് എല്ലാ കാലാവസ്ഥയിലും ഉൽപ്പാദനം കൈവരിക്കുവാനും സഹായിക്കുന്ന സാങ്കേതിക വിദ്യയാണ് പ്രിസിഷൻ ഫാമിങ് അഥവാ സംരക്ഷിത കൃഷി. വിളകളുടെ ഉൽപ്പാദന ശേഷി ഉയർത്തുന്നതിനായി വെള്ളത്തിൽ ലയിക്കുന്ന വളങ്ങൾ ജലത്തിലൂടെ നൽകുന്ന രീതി ഈ കൃഷിരീതിയുടെ പ്രത്യേകതയാണ്. ഫെർട്ടിഗേഷൻ എന്നാണ് ഈ രീതിക്ക് നൽകിയ പേര്. ഫെർട്ടിഗേഷൻ വിളകളുടെ വേരിൽ നേരിട്ട് നൽകുന്നതിനേക്കാൾ പ്ലാസ്റ്റിക്ക് പുത ഉപയോഗിക്കുന്നത് വളരെ ഫലപ്രദമായി കാണുന്നുണ്ട്.പോഷകങ്ങൾ നഷ്ടപ്പെടുന്നത് കുറക്കാനും വിളകളുടെ ഉൽപ്പാദനം ഉയർത്തുവാനും കൃത്യമായ ഫെർട്ടിഗേഷൻ അത്യാവശ്യമാണ്. ഇത് ഡ്രിപ്പ് ഇറിഗേഷൻ സിസ്റ്റത്തിലൂടെ അനായസേന നിർവ്വഹിക്കാവുന്നതാണ്. ഫെർട്ടിഗേഷനു വേണ്ടി ഉപയോഗിക്കുന്ന വളങ്ങളിൽ ജീവാമൃതം, പഞ്ചഗവ്യം തുടങ്ങിയവ കൂടി ഉപയോഗപ്പെടുത്താവുന്നതാണ്. ഫെർട്ടിഗേഷന് വേണ്ടി ഉപയോഗിക്കുന്ന വളങ്ങളിൽ നൈട്രജൻ സ്രോതസ്സുകൾ അമോണിയം നൈട്രേറ്റ് കാൽസ്യം നൈട്രേറ്റ്, യൂറിയ , പൊട്ടാസ്യം നൈട്രേറ്റ് എന്നിവയും , പൊട്ടാഷിന്റെ പ്രധാന സ്രോതസ്സുകൾ പൊട്ടാസ്യം ക്ലോറൈഡ്, പൊട്ടാസ്യം നൈട്രേറ്റ്, പൊട്ടാസ്യം സൾഫേറ്റ് എന്നിവയുമാണ്. ഫെർട്ടിഗേഷന് വേണ്ട ഫോസ്ഫറസ് നേർപ്പിച്ച ഫോസ്ഫോറിക് ആസിഡ് ആയോ, മോണോ അമോണിയം സൾഫേറ്റ് ആയോ നൽകാം. പൊതുവെ പറഞ്ഞാൽ വെള്ളത്തിൽ ലയിക്കാവുന്ന വളങ്ങൾ 50 മുതൽ 100 പി.പി.എം എന്ന അളവിൽ ലയിപ്പിച്ച് ഡ്രിപ്പ് സിസ്റ്റം വഴി ചെടികൾക്ക് നൽകാവുന്നതാണ് .
കണിക ജലസേചന സമ്പ്രദായങ്ങളിലെ കാര്യക്ഷമമായ ഉപയോഗത്തിനായി കർഷകർ ഇത് സ്ഥാപിക്കുമ്പോൾ അതിന്റെ സാങ്കേതിക വശങ്ങളെക്കുറിച്ച് മുഴുവൻ വിവരങ്ങളും മനസ്സിലാക്കി വെക്കണം. ജലസേചന സംവിധാനത്തിൽ മെയിൻ പൈപ്പിൽ ഒരു ഫെർട്ടിലൈസർ ടാങ്കോ , ഫെർട്ടിലൈസർ ഇൻജക്ടറോ, വെഞ്ചുറി യോ ഘടിപ്പിച്ചിട്ടുണ്ടാകും. വളം പല തവണകളായി ആവശ്യാധിഷ്ഠിതമായി നൽകുന്നതിനാൽ വേര് മണ്ഡലത്തിന് താഴേക്ക് ഊർന്നൊലിച്ച് പോകാൻ കഴിയുമെന്ന് മാത്രമല്ല വളം ചെടികൾക്ക് എളുപ്പത്തിൽ വലിച്ചെടുക്കാൻ കഴിയുന്ന രൂപത്തിൽ വേരു മണ്ഡലത്തിൽ ശരിയായ ഈർപ്പത്തോടൊപ്പം നൽകുന്നതിനാൽ ചെടികളുടെ വളർച്ചയും ഉൽപ്പാദന ക്ഷമതയും ഗണ്യമായി വർദ്ധിപ്പിക്കുവാനും സാധിക്കും.
സങ്കീർണ്ണമായ സാങ്കേതിക വിദ്യയും , പ്രാരംഭത്തിൽ വലിയ മുതൽ മുടക്കും കണിക ജലസേചന രീതി നടപ്പിലാക്കുവാൻ ആവശ്യമാണ്. എന്നാൽ ഇത് നടപ്പിലാക്കുന്നതുവഴി ഉണ്ടാകുന്ന നേട്ടങ്ങൾ പരിഗണിച്ച് സാമ്പത്തികവും സാങ്കേതികവുമായ സഹായങ്ങൾ കേന്ദ്ര-സംസ്ഥാന സർക്കാരുകളുടെ ഭാഗത്തു നിന്നും എല്ലാ കാലത്തും ലഭ്യമാകേണ്ടതുണ്ട്.
