പയർ വിളകൾ : മണ്ണിനും മനുഷ്യനും പിന്നെ കന്നുകാലികൾക്കും

ഭക്ഷ്യവിളകളിൽ അന്നധാന്യങ്ങൾ കഴിഞ്ഞാൽ അടുത്ത സ്ഥാനം പയർ വർഗ്ഗങ്ങൾക്കാണ്. അന്നജ പ്രധാനമായ നമ്മുടെ ദൈനംദിനാ ഹാരത്തിൽ അത്യാവശ്യമായ പ്രോട്ടീൻ ലഭിക്കുന്നത് പയർ വർഗ്ഗങ്ങളിൽ നിന്നാണ്. വിലകൂടിയ മറ്റു പോഷകപ്രദമായ ആഹാര പദാർത്ഥങ്ങൾ വാങ്ങി ഉപയോഗിക്കാൻ കഴിയാത്ത നിർദ്ധന ജനതക്ക് പോലും അവരെ അപര്യാപ്തമായ പോഷണത്തിൽ നിന്ന് കൈപിടിച്ചു കയറ്റുന്നത് മാംസ്യ സ്രോതസ്സുകളായ പയർ വർഗ്ഗ ചെകളാണ്.
മിക്ക പയർ ഇനങ്ങളിലും പതിനേഴ് മുതൽ ഇരുപത്തിയഞ്ച് ശതമാനം വരെ പ്രോട്ടീനും സാമാന്യം നല്ല തോതിൽ അവശ്യ അമിനോ ആസിഡുകളും അടങ്ങിയിരിക്കുന്നു. ഇത് സാധാരണ അന്നധാന്യങ്ങളിൽ അടങ്ങിയിരിക്കുന്ന പ്രോട്ടീന്റെ ഇരട്ടിയോ അതിൽ കൂടുതലോ ആണ്.പോഷക സമ്പന്നമെന്നതിനു പുറമേ ഔഷധ ഗുണവും പയറിനങ്ങൾക്കുണ്ട്. പ്രമേഹം, ഹൃദയ സംബന്ധമായ അസുഖങ്ങൾ എന്നിവയെ പ്രതിരോധിക്കുന്നതിനും പയറിലെ പോഷക മൂല്യത്തിന് കഴിയും. കൊഴുപ്പ് കുറഞ്ഞതും നാര് കൂടിയതുമായ ഭക്ഷണമെന്ന നിലയിലും ഇത് ആരോഗ്യ രക്ഷക്കനുഗ്രഹമാണ്.
പയറിലടങ്ങിയ നാരുകൾ കൊളസ്ട്രോൾ, രക്തത്തിലെ പ്രമേഹം എന്നിവയെ നിയന്തിക്കും. പൊട്ടാസ്യം, മഗ്നീഷ്യം, സിങ്ക്, വിറ്റാമിനുകൾ തുടങ്ങിയവ പയറിനങ്ങളിലെ പോഷക ബഹുമതി വർദ്ധിപ്പിക്കുന്നു. മുളപ്പിച്ച് ഉപയോഗിക്കുമ്പോൾ പയർ മണികളിലെ പോഷകങ്ങൾ എളുപ്പം നേരിട്ട് ലഭ്യമാകുന്നു. ഇതൊക്കെ കൊണ്ടാവാം പാവപ്പെട്ടവന്റെ മാംസം എന്ന പേരിൽ കൂടി ഇതറിയപ്പെടുന്നത്. എന്നാൽ മാംസത്തിലേതു പോലുള്ള കൊളസ്ട്രോൾ പയർ വർഗ്ഗങ്ങളിൽ ഇല്ലെന്നത് എടുത്ത് പറയാവുന്ന മഹിമയാണ് .

നമ്മുടെ രാജ്യത്തിലെ സാഹചര്യങ്ങൾ കണക്കിലെടുത്തു കൊണ്ട് പ്രായപൂർത്തിയായ ഒരാളുടെ ദിവസ ഭക്ഷണത്തിൽ അടങ്ങിയിരിക്കേണ്ട ഭക്ഷ്യധാന്യങ്ങളുടെ അളവിൽ 85 ഗ്രാം പയർ ഉണ്ടായിരിക്കണ മെന്ന് പോഷകാഹാര വിദഗ്ധർ അഭിപ്രായപ്പെടുന്നു. എന്നാൽ ഈ അളവിന് പകരം ഇന്ത്യയിലെ ആഭ്യന്തര ലഭ്യത 55 ഗ്രാം മാത്രമാണ്. പയറിന്റെ ആളോഹരി ലഭ്യത ഏറ്റവും കൂടുതൽ രാജസ്ഥാൻ, പഞ്ചാബ്, മധ്യപ്രദേശ്, ഉത്തർപ്രദേശ് എന്നിവിടങ്ങളിലും ഏറ്റവും കുറഞ്ഞത് കേരളത്തിലുമാണെന്ന് കണക്കുകൾ സൂചിപ്പിക്കുന്നു.

മനുഷ്യരുടെ ആരോഗ്യ സംരക്ഷണത്തിൽ സഹായകമായ പയർ വർഗ്ഗ ചെടികൾ മണ്ണിന്റേയും ഉറ്റചങ്ങാതിമാരാണ്. അതിനാൽ സുസ്ഥിര കൃഷി രീതികളിലെല്ലാം പയർ വർഗ്ഗച്ചെടികളുടെ സാന്നിദ്ധ്യം നാം സഹർഷം സ്വാഗതം ചെയ്യേണ്ടതുണ്ട്. മണ്ണിനെ സസ്യജീവിതത്തിന് പര്യാപ്തമായ ഒരു മാധ്യമമാക്കി മാറ്റിയെടുക്കുന്നതിൽ പയർ വർഗ്ഗങ്ങൾക്കാണ് മുഖ്യ പങ്ക്. പയറിനം ഏതുമാകട്ടെ അവയുടെ വേരുകളിൽ വസിക്കുന്ന റൈസോബിയം ഇനത്തിൽപ്പെട്ട ബാക്ടീരിയ അന്തരീക്ഷത്തിലെ വാതക രൂപത്തിലുള്ള സ്വതന്ത്ര നൈട്രജനെ മണ്ണിലേക്കാവാഹിച്ച് ലവണരൂപത്തിലുള്ള സംയുക്ത നൈട്ര ജനാക്കി മാറ്റുന്നു. ഈ പ്രക്രിയക്ക് നൈട്രജൻ യൗഗീകരണം എന്നു പറയും. ഇതു മൂലം പയർ വർഗ്ഗച്ചെടികൾ വളരുന്ന മണ്ണ് കൂടുതൽ ഫലപുഷ്ടിയുള്ളതായിത്തീരുന്നു. ഭാരതത്തിൽ ഏകദേശം 4000 ദശലക്ഷം ടൺ രൂപ വില വരുന്ന 20 ലക്ഷം ടൺ അന്തരീക്ഷ നൈട്രജനെ പയർ വർഗ്ഗങ്ങൾ യൗഗീകരണം വഴി ഉപയോഗപ്പെടുത്തുന്നതായി കണക്കാക്കിയിരിക്കുന്നു. വിവിധ പയർ വർഗ്ഗങ്ങളുടെ നൈട്രജൻ യൗഗീകരണ കഴിവ് വിഭിന്നമാണെങ്കിലും ഒരു ഹെക്ടറിന് ശരാശരി 50 മുതൽ 100 കി.ഗ്രാം വരെ നൈട്രജൻ മിക്ക പയറിനങ്ങളും ഈ മാർഗ്ഗത്തിലൂടെ മണ്ണിന് ലഭ്യമാക്കുന്നുണ്ട്.
കൂടാതെ ഇവയുടെ ഇലകൾ പൊഴിഞ്ഞും ജൈവാംശം മണ്ണിന് ലഭ്യമാകുന്നുണ്ട്. ആഴത്തിൽ പോകുന്ന ഇവയുടെ വേരുകൾ കൂടുതൽ വായു സമ്പർക്കമുണ്ടാക്കുകയും നീർവാർച്ചയും മണ്ണിന് കൂടുതൽ ജലസംഭരണശേഷിയും ഉണ്ടാക്കുന്നു.
പച്ചില വള വിള എന്ന നിലയിലും പയർ വർഗ്ഗങ്ങൾക്ക് മുന്തിയ പരിഗണനയുണ്ട്. ഈ സസ്യങ്ങളിൽ പൊതുവെ സസ്യ മൂലകങ്ങൾ കൂടുതലാണ്. ഇവയിലെ ജൈവാംശം മണ്ണിൽ ചേർത്താൽ ഈർപ്പവും ചൂടും അനുകൂലമായിരിക്കുമ്പോൾ ആറ് മുതൽ എട്ട് ആഴ്ചകൾക്കകം ഇവ ചെടികൾക്ക് വലിച്ചെടുക്കുവാനുള്ള വളമായി അഥവാ ഹ്യൂമസായി മാറുന്നു. പയർ വർഗ്ഗച്ചെടികൾ വിളപരിക്രമണത്തിനും മിശ്ര കൃഷിക്കും ഇടവിള കൃഷിക്കും വളരെ യോജിച്ചതാണ്. മിശ്ര കൃഷിയിലെ പയർ വർഗ്ഗമല്ലാത്ത വിള പയർ വർഗ്ഗത്തിന്റെ സാന്നിദ്ധ്യം കൊണ്ട് സാധാരണയിലും കൂടുതൽ വിളവ് നൽകുന്നതായി കണ്ടിട്ടുണ്ട്. കുറഞ്ഞ വളർച്ചാ ക്കാലം, വെള്ളത്തിന്റെ കുറഞ്ഞ തോതിലുള്ള ആവശ്യകത , മിക്ക തരം മണ്ണിലും നന്നായി വളരുവാനുള്ള കഴിവ് എന്നിവ കൊണ്ട് ഏത് വിളപരിക്രമത്തിലും മിശ്ര കൃഷിയിലും പയർ വർഗ്ഗങ്ങൾ ആദായകരമായി ഉൾപ്പെടുത്താം.

മണ്ണിനും മനുഷ്യനും നന്മകൾ നൽകും പോലെ കന്നുകാലികൾക്കും ഉത്തമ ആഹാരമായി പയർ വർഗ്ഗ വിളകൾ പരിഗണിക്കുന്നു. വൈക്കാൽ , പച്ചപ്പുല്ല് തുടങ്ങിയവയേക്കാൾ മാംസ്യം കൂടിയ തോതിൽ അടങ്ങിയിരിക്കുന്നത് പയറിനങ്ങളിലാണ്. മാത്രമല്ല ഇവയിലെ മാംസ്യം ഗുണത്തിലും മെച്ചപ്പെട്ടതാണ്. കാലികളുടെ ആരോഗ്യത്തിന് അതീവ ഗുണകരമായ കാൽസ്യം, ഫോസ്ഫറസ്, വിറ്റാമിനുകൾ എന്നിവയും പയർ വർഗ്ഗച്ചെടികളിൽ താരതമ്യേന കൂടുതലാണ്. അതിനാൽ കന്നുകാലി തീറ്റയിൽ ഇതിന് ഉന്നത സ്ഥാനമാണുള്ളത്. വിളവെടുത്ത ശേഷം മിക്ക പയറിനങ്ങളുടേയും തണ്ടും ഇലയും പച്ചയായോ ഉണക്കി യോ കന്നുകാലികൾക്ക് തീറ്റയാക്കാം. മുതിര തുടങ്ങിയ ചില പയർ വർഗ്ഗവിളകളുടെ ഉണങ്ങിയ തണ്ടുകളും ഇലകളും മൃഗങ്ങൾ വളരെയധികം ഇഷ്ടപ്പെടുന്ന തീറ്റകളാണ്. പൊടിച്ചും വെള്ളത്തിൽ കുതിർത്തും പാകം ചെയ്തും ഇത് കന്നുകാലികൾക്ക് നൽകാം.

ചെറുപയർ, ഉഴുന്ന്, വൻപയർ, സോയാബീൻ, ഗ്രീൻ പീസ്, മുതിര, പച്ചക്കറി പയറുകൾ, തുവര, കടല എന്നിവയാണ് പ്രധാന ഭക്ഷ്യയോഗ്യമായ പയർ വർഗ്ഗങ്ങൾ.
ചണമ്പ്, ഡയഞ്ച, കൊഴിഞ്ഞിൽ, സസ്ബേനിയ, ശീമക്കൊന്ന എന്നിവയാണ് പച്ചില വളച്ചെടികളായി കൃഷി ചെയ്യാവുന്ന പ്രധാന പയർ വർഗ്ഗച്ചെടികൾ.

മൃഗാധിഷ്ഠിതമായ പ്രോട്ടീൻ ലഭ്യതക്ക് പകരമായി പയർ വർഗ്ഗ ആഹാരത്തിൽ നിന്നുള്ള പ്രോട്ടീൻ ലഭ്യത ജനങ്ങളുടെ ആരോഗ്യ സംവിധാനത്തിൽ പ്രധാന പങ്ക് വഹിക്കുമെന്ന് മാത്രമല്ല, ദാരിദ്ര്യം, ഭക്ഷ്യ സുരക്ഷ, പോഷകാഹാരം, പരിസ്ഥിതി പ്രശ്നങ്ങൾ എന്നിവ പരിഹരിക്കുന്നതിൽ സുപ്രധാന പങ്ക് വഹിക്കുവാൻ പയർ കൃഷി വ്യാപനം തീർച്ചയായും സഹായിക്കും.