കാർഷിക വിജയഗാഥകൾ

പാവൽ ഔഷധ ഗുണമേറിയ പച്ചക്കറി

 

എം കെ പി മാവിലായി

ഔഷധ ഗുണമുള്ള ഒരു വേനൽക്കാല പച്ചക്കറിയാണ് പാവൽ അഥവാ കയ്പ.
വീട്ടാവശ്യത്തിന് ചെറിയ തോതിലും വിൽപ്പനക്കായി വിപുലമായ തോതിലും ധാരാളം പേർ പാവൽ അഥവാ കയ്പ്പ കൃഷിചെയ്തു വരുന്നുണ്ട്. കായ്കൾ പല രീതിയിലും പാകപ്പെടുത്തി ഉപയോഗിച്ചു വരുന്നു. പാവക്ക അരിഞ്ഞ് മഞ്ഞളും മുളകും ഉപ്പും അരച്ച് ചേർത്ത് വെയിലത്ത് ഉണക്കി ശേഖരിച്ച് പൊരിക്കാൻ ഉപയാഗിക്കുന്നു. പാവക്ക അരിഞ്ഞ് തേങ്ങാപ്പീരയും പച്ചമുളകും ഉപ്പും ചേർത്ത് ചെറുതായി ചതച്ച് വാരി ഇലയിൽ പൊതിഞ്ഞ് തീയിലിട്ട് ചുട്ട് ചമ്മന്തിയാക്കി ഉപയോഗിക്കുന്നവരുണ്ട്. ഉണക്കി അച്ചാറിടാനും ഉപയോഗിക്കുന്നു. കൊണ്ടാട്ടം ഉണ്ടാക്കാനും യോജിച്ചതാണ്.കൂടാതെ വിവിധ തരം സ്വാദിഷ്ട കറികളും പാവയ്ക്ക ഉപയാഗിച്ച് തയ്യാറാക്കാം.
ധാരാളം ധാതുലവണങ്ങളും , ജീവകം എ, ബി, സിയും കൂടാതെ കാത്സ്യം , ഇരുമ്പ് എന്നിവയും ഇതിൽ അടങ്ങിയിരിക്കുന്നു. ആസ്ത്മ, വാതം, രക്തസംബന്ധമായ രോഗങ്ങൾക്ക് ഒരു ഔഷധം കൂടിയാണ് പാവയ്ക്ക .
പാവലിന്റെ ജന്മദേശം ഏഷ്യയിലേയും ആഫ്രിക്കയിലേയും ഉഷ്ണമേഖലാ പ്രദേശങ്ങളാണ്.

മണ്ണും കാലാവസ്ഥയും

കരളത്തിൽ ഇത് എല്ലാക്കാലത്തും കൃഷി ചെയ്യാറുണ്ടെങ്കിലും വിപണനത്തിനു വേണ്ടി കൂടുതലായി കൃഷിയിറക്കുന്നത് വേനൽക്കാലത്താണ്.

20 മുതൽ 30 ഡിഗ്രി സെൽഷ്യസ് വരെയുള്ള താപനിലയാണ് പാവലിന്റെ വളർച്ചക്ക് അനുയോജ്യമായത് . കുറഞ്ഞ താപനിലയിൽ ചെടിയുടെ വളർച്ച കുറയുകയും പുഷ്പിക്കാൻ വൈകുകയും ചെയ്യും. താപനില അധികമായാൽ പെൺപൂക്കളുടെ ഉല്ലാദനം കുറയുക വഴി വിളവ് വളരെ മോശമാകുകയും ചെയ്യും.
വെള്ളം കെട്ടി നില്ക്കാത്തതും നല്ല വളക്കൂറുള്ള മണ്ണും പാവലിന്റെ വളർച്ചക്ക് അനുകൂലമാണ്. മണ്ണിന്റെ അമ്ലക്ഷാര നില അഥവാ പി.എച്ച്. 6 നും 7.5 നും ഇടയിലാവുന്നതാണ് ഉത്തമം.
വേനൽക്കാല വിള ഫെബ്രവരി-മാർച്ച് മാസങ്ങളിലും വർഷ കാല വിള മെയ് – ജൂൺ മാസങ്ങളിലും കൃഷിയിറക്കാം.

ഇനങ്ങൾ

നിരവധി നാടൻ ഇനങ്ങൾക്ക് പുറമെ വിവിധ കാർഷിക ഗവേഷണ സ്ഥാപനങ്ങൾ വഴി ഉല്പാദന ശേഷി കൂടുതലുള്ള ഏതാനും ഇനങ്ങൾ ഉരുത്തിരിച്ചെടുത്തിട്ടുണ്ട്.
അവയിൽ ചില ഇനങ്ങളെ പരിചയപ്പെടാം.
പ്രിയ :
വെള്ളാനിക്കര ഹോർട്ടികൾച്ചർ കോളേജ് വികസിപ്പിച്ചെടുത്തതാണിത്. നട്ട് രണ്ട് മാസത്തോടെ ആദ്യ വിളവെടുപ്പ് നടത്താം. ഓരോ ചെടിയിലും ശരാശരി 235 ഗ്രാം തൂക്കം വരുന്ന 40-50 കായ്കൾ ലഭിക്കും. കായ്കൾക്ക് 40 സെ.മീറ്ററോളം നീളം വരും.പ്രതലത്തിൽ മുള്ളുണ്ട്.

കോ- വൺ :
തമിഴ്നാട് കാർഷിക സർവ്വകലാശാല , കോയമ്പത്തൂർ വികസിപ്പിച്ചെടുത്തതാണിത്. നട്ട് രണ്ടു മാസത്തോടെ ആദ്യ വിളവെടുപ്പ് നടത്താം. വിളവ് കാലം 115 ദിവസം . കായ്കൾ നല്ല പച്ചനിറത്തോട് കൂടിയത്. ഇടത്തരം വലുപ്പം. 20-25 സെ.മീറ്റർ നീളം. 100-120 ഗ്രാം തൂക്കം. ഒരു ഏക്കറിൽ നിന്നും 5 .6 ടൺ വിളവ് ലഭിക്കും.

എം.ഡി.യു. വൺ :
തമിഴ് നാട് കാർഷിക സർവ്വകലാശാല , മധുര വികസിപ്പിച്ചെടുത്തത്. നട്ട് 65 ദിവസം കൊണ്ട് ആദ്യ വിളവെടുപ്പ് നടത്താം. വിളവ് കാലം 120-130 ദിവസം. കായ്കൾക്ക് 30 – 40 സെ.മീറ്റർ നീളം. നേരിയ ഹരിതാഭ കലർന്ന വെള്ളനിറം. ഒരേക്കറിൽ 12 മുതൽ 14 ടൺ വരെ വിളവ് ലഭിക്കും.

അർക്ക ഹരിത് :
ഇന്ത്യൻ ഹോർട്ടികൾച്ചർ ഗവേഷണ കേന്ദ്രം, ഹസർഗട്ട, ബാംഗളൂർ വികസിപ്പിച്ചെടുത്ത ഇനമാണിത്. നട്ട് 50 ദിവസം കൊണ്ട് ആദ്യ വിളവെടുപ്പ് നടത്താം. 90-100 ദിവസമാണ് വിളവെടുപ്പ് കാലം. ഒരേക്കറിൽ നിന്നും 3.6 മുതൽ 4.8 ടൺ വരെ വിളവ് ലഭിക്കും. നീളം കുറഞ്ഞ് വണ്ണം കൂടുതലുള്ളതാണ് കായ്കൾ. പച്ചനിറമുളള കായ്കളുടെ പ്രതലം മിനുസമുള്ളതാണ്.

പൂസദോമ സമി :
ഇന്ത്യൻ കാർഷിക ഗവേഷണ കേന്ദ്രം, പൂസ, ന്യൂഡൽഹി വികസിപ്പിച്ചെടുത്ത ഇനമാണിത്. നട്ട് 50-55 ദിവസം കൊണ്ട് ആദ്യ വിളവെടുപ്പ് നടത്താം. വിളവ് കാലം 120 ദിവസമാണ്. ഒരേക്കറിൽ നിന്നും 4.8 ടൺ മുതൽ 6 ടൺ വരെ വിളവ് ലഭിക്കും. കായ്കൾക്ക് നല്ല പച്ചനിറം. മിനുസമായ തലത്തിൽ മുള്ളില്ല. 100-120 ഗ്രാം വരെ ഒരു കായ്ക്ക് തൂക്കമുണ്ടാകും.

കൃഷി രീതി

മണ്ണ് കിളച്ചൊരുക്കി 60 സെ.മീറ്റർ വ്യാസത്തിലും 30 സെ.മീറ്റർ ആഴത്തിലും തടങ്ങളെടുക്കണം. വരികൾ തമ്മിൽ രണ്ടു മീറ്ററും ചെടികൾ തമ്മിൽ ഒരു മീറ്ററും അകലം നൽകാം. തടങ്ങളിൽ അടിവളമായി 5 കി.ഗ്രാം ചാണകപ്പൊടിയോ കംബോസ്റ്റോ ചേർത്ത് മണ്ണമായി യോജിപ്പിക്കണം. മേൽ വളമായി മണ്ണിര കംബോസ്റ്റ് മാസത്തിലൊരിക്കൽ രണ്ട് കി.ഗ്രാം വീതം നൽകണം. നിലക്കടല പിണ്ണാക്ക് ഒരു കി.ഗ്രാം 10 ലിറ്റർ വെള്ളത്തിൽ എന്ന തോതിൽ കുതിർത്ത് ഒരു തടത്തിന് ഒരു ലിറ്റർ വീതം രണ്ടു തവണ നൽകാം. പൂവിട്ടതിന് ശേഷം രണ്ടാഴ്ചയിലൊരിക്കൽ പച്ചച്ചാണകസ്ലറി നൽകുന്നത് നല്ല ഫലം ചെയ്യും.

ജലസേചനം

വളർച്ചയുടെ ആദ്യഘട്ടത്തിൽ ഒന്നരാടൻ ദിവസങ്ങളിലും തുടർന്നു പൂവിട്ടതിനു ശേഷം ദിവസവും നന നൽകണം.

മറ്റു കൃഷിപ്പണികൾ

ഇട ഇളക്കൽ, കളനീക്കം ചെയ്യൽ എന്നിവ ആവശ്യാനുസരണം ചെയ്യണം. ചെടി വള്ളി വീശി തുടങ്ങുമ്പോൾ പന്തൽ നിർമ്മാണം നടത്തണം.

സസ്യസംരക്ഷണം

രോഗങ്ങൾ:

മൊസൈക്ക് .
ഇലകളിൽ മഞ്ഞയും പച്ചയും കലർന്ന തടിപ്പുകൾ കാണുന്നത് മൊസൈക്ക് രോഗ ലക്ഷണമാണ്.
ഇതൊരു വൈറസ് രോഗമാണ്. വൈറസിനെ പരത്തുന്ന പ്രാണിയെ വേപ്പെണ്ണ – വെളുത്തുള്ളി മിശ്രിതമോ വേപ്പധിഷ്ഠിത കീടനാശിനികളോ ഉപയോഗിച്ച് നിയന്ത്രിക്കാം. വള്ളി വീശുമ്പോൾ കിരിയാത്ത് സോപ്പ് ലായനി തളിക്കുന്നതും ഫലപ്രദമാണ്.

പൊടി പൂപ്പ്

ഇലയുടെ അടിഭാഗത്ത് വെള്ളം നനഞ്ഞ പാടുകളുണ്ടായി ഇലകൾ കരിഞ്ഞുണങ്ങും.
സ്യൂഡോമോണാസ് 20 ഗ്രാം ഒരു ലിറ്റർ വെള്ളത്തിൽ കലർത്തി രണ്ടാഴ്ചയിലൊരിക്കൽ വീതം തളിക്കണം.

പാവൽ ഔഷധ ഗുണമേറിയ പച്ചക്കറി

കീടങ്ങൾ

കായീച്ച
കായ് തുരന്നു തിന്നു നശിപ്പിക്കുന്നു. കടലാസ് കൊണ്ടോ പോളിത്തീൻ കവറുകൊണ്ടോ പൊതിഞ്ഞു സൂക്ഷിക്കാം. ഈച്ച കുത്തിയ കായ്കൾ നശിപ്പിക്കുക. ബിവേറിയ ബാസ്സിയാന എന്ന ജീവാണു നാശിനി പത്തു ഗ്രാം ഒരു ലിറ്റർ വെള്ളത്തിൽ കലർത്തി തളിക്കുക. പഴക്കെണി, തുളസിക്കെണി, മീൻ കെണി , ഫിറമോൺ കെണി എന്നിവയിലൊന്ന് തോട്ടത്തിൽ അങ്ങിങ്ങായി വെച്ചും കായീച്ചകളെ കുടുക്കാം.

ആമ വണ്ട് , ചിത്രകീടം

ഇവ രണ്ടും ഇലകളെയാണ് നശിപ്പിക്കുക. നാല് ശതമാനം വീര്യമുള്ള വേപ്പിൻ കുരുസത്ത് പ്രയോഗിച്ച് ഇവയെ നശിപ്പിക്കാം. വേപ്പെണ്ണ – വെളുത്തുള്ളി മിശ്രിതവും ഫലപദമാണ്.

വിളവ് , വിത്ത് ശേഖരണം

പാവൽ ഔഷധ ഗുണമേറിയ പച്ചക്കറി

വിത്ത് പാകി രണ്ടു മാസത്തിന്നകം ആദ്യ വിളവെടുപ്പ് നടത്താം. ഏക്കറൊന്നിന് കാലാവസ്ഥ, ഇനം , പരിചരണം ഇവയ്ക്കനുസൃതമായി ഏക്കറിന് 4 മുതൽ 5 ടൺ വരെ വിളവ് പ്രതീക്ഷിക്കാം.

രോഗ കീടബാധയില്ലാത്ത, നന്നായി മൂത്ത് പഴുത്ത കായ്കളിൽ നിന്നു വേണം വിത്ത് ശേഖരിക്കാൻ. ആദ്യത്തേതും അവസാനത്തേയും രണ്ടു മുന്ന് വിളവെടുപ്പുകൾ ഒഴിവാക്കി, ഇട സമയത്തുള്ള കായ്കളിൽ നിന്ന് വിത്തെടുക്കുന്നതാണ് നല്ലത്. കായുടെ നടുഭാഗത്തുള്ള വിത്താണ് ഏറ്റവും ഗുണമേന്മയുള്ളത്. നാലഞ്ച് ദിവസം വെയിലത്തു വെച്ചുണക്കി ഇവ സൂക്ഷിക്കാവുന്നതാണ്.

പരസ്യം • Advertisement
പങ്കുവെക്കാം (Share): WhatsApp Facebook

Leave a Reply