വളപ്രയോഗം കുറ്റമറ്റതാകാൻ മണ്ണു പരിശോധന

എം കെ പി മാവിലായി

ഫലപുഷ്ടിയുള്ള മണ്ണാണ് ചെടികളുടെ ആരോഗ്യകരമായ വളർച്ചയ്ക്കും ഉയർന്ന ഉൽപ്പാദനത്തിനും നിദാനം.
മേൽമണ്ണിന്റെ മൂല്യം അതിന്റെ വളക്കൂറാണ്. വിള വള ർത്തലെന്നാൽ ഒരർത്ഥത്തിൽ വളം ഊറ്റലാണ്. എടുക്കുന്നതത്രയും തിരിച്ചു നൽകിയില്ലെങ്കിൽ തുടർച്ചയായ വിളവെടുപ്പ് സാധ്യമല്ലാതെ വരും. ശ്രദ്ധിക്കാതെയുള്ള വളപ്രയോഗത്തിലൂടെ ചിലത് വേണ്ടതിൽ കൂടുതൽ നൽകിയെന്നും വരും. വളത്തിന്റെ അഭാവമെന്ന പോലെ തന്നെ അമിതവും കുഴപ്പമാണ്. മണ്ണിന്റെ തനത് വളക്കൂറും അതനുസരിച്ച് ഓരോ വിളകൾക്കും നൽകേണ്ട വളത്തിന്റെ അളവും കൃത്യമായി നിർണ്ണയിക്കാൻ മണ്ണു പരിശോധന ആവശ്യമാണ്. മണ്ണിൽ ഉളളതെത്രയെന്നും എടുക്കുന്നതെത്രയെന്നും തിരിച്ചറിഞ്ഞ് ആവശ്യമുള്ളതത്ര തിരിച്ചു നൽകി മേൽമണ്ണിന്റെ ഉൽപ്പാദന ക്ഷമത നിലനിർത്താനും അനാവശ്യമായ ചെലവ് ഒഴിവാക്കുവാനും മണ്ണു പരിശോധന അത്യാവശ്യമാണ്. മണ്ണ് അമ്ലസ്വഭാവമുളളതാണോ ക്ഷാരസ്വഭാവമുള്ളതാണോ ആണെങ്കിൽ അതിന്റെ തോതെത്ര , മണ്ണിൽ ലയിച്ചു ചേർന്നിട്ടുള്ള ചെടികൾക്ക് ഉപദ്രവകരമാകുന്ന ലവണങ്ങളുടെ അളവ് എത്ര, മണ്ണിൽ സസ്യങ്ങൾക്ക് എളുപ്പത്തിൽ ലഭ്യമാകുന്ന തരത്തിലുള്ള നൈട്രജൻ, ഫോസ്ഫറസ്, പൊട്ടാഷ് എന്നിവ എത്ര അടങ്ങിയിരിക്കുന്നു എന്നെല്ലാം മണ്ണു പരിശോധനയിലൂടെ മാത്രമേ അറിയാൻ കഴിയൂ.

മണ്ണ് സാമ്പിൾ തയ്യാറാക്കുമ്പോൾ ശ്രദ്ധിക്കേണ്ട കാര്യങ്ങൾ

കൃഷിയിടത്തെ മുഴുവൻ പ്രതിനിധീകരിക്കുന്ന മണ്ണു സാമ്പിൾ ആണ് ശേഖരിക്കേണ്ടത്.

വ്യത്യസ്ഥ രീതിയിൽ വളം ചേർത്തതോ, വ്യത്യസ്ഥ രീതിയിൽ കൃഷി ചെയ്തതോ ആണെങ്കിൽ ഓരോ കൃഷിയിടത്തിൽ നിന്നും പ്രത്യേകം പ്രത്യേകം സാമ്പിൾ തയ്യാറാക്കണം.
അസാധാരണമായ സ്ഥലങ്ങളിൽ നിന്ന് സാമ്പിൾ എടുക്കരുത്.
ജൈവ വളം കൂടിക്കിടക്കുന്ന സ്ഥലങ്ങൾ ഒഴിവാക്കണം.
വരമ്പിനോട് വളരെ ചേർന്ന് കിടക്കുന്ന ഭാഗങ്ങൾ, പുതുതായി വളം ചെയ്ത സ്ഥലങ്ങൾ, ചെളി കെട്ടി നിൽക്കുന്ന പ്രദേശങ്ങൾ, വളക്കുഴിക്കടുത്ത പ്രദേശങ്ങൾ, ജലാശയങ്ങൾക്ക് തൊട്ടു കിടക്കുന്ന പ്രദേശങ്ങൾ, പഴയ കുഴികൾ എന്നിവ ഒഴിവാക്കണം.
വരിവരിയായി ചെടികൾ അഥവാ വൃക്ഷങ്ങൾ നട്ടിരിക്കുന്ന സ്ഥലങ്ങളിൽ വരികൾക്കിടയിൽ നിന്നും സാമ്പിൾ ശേഖരിക്കണം.
സാമ്പിൾ ശേഖരിക്കാൻ കൈകോട്ട്, തൂമ്പ, ഓഗർ എന്നിവയിലൊന്ന് ഉപയോഗിക്കാം.
കൃഷി ചെയ്യാൻ ഉദ്ദേശിക്കുന്ന വിളയുടെ വേരുപടലത്തിന്റെ ആഴത്തിലുള്ള മണ്ണ് സാമ്പിളുകളാണ് എടുക്കുക. നെല്ല്, പച്ചക്കറി, പയർ വർഗ്ഗങ്ങൾ മുതലായ ചെടികൾക്ക് 15 മുതൽ 20 സെ.മീറ്റർ ആഴത്തിലും തെങ്ങ്, മറ്റു വൃക്ഷവിളകൾക്ക് 25 മുതൽ 30 സെ.മീറ്റർ ആഴത്തിലുമാണ് സാമ്പിളുകൾ എടുക്കേണ്ടത്.
സാമ്പിൾ എടുക്കുന്ന സ്ഥലത്തെ പുല്ല്, കരിയില എന്നിവ മാറ്റുക. കുമ്മായമോ വളമോ ചേർത്തിട്ടുണ്ടെങ്കിൽ
മൂന്നു മാസം കഴിഞ്ഞേ സാമ്പിൾ എടുക്കാവൂ.
തൂമ്പയോ കൈക്കോട്ടോ ആണ് ഉപയോഗിക്കുന്നതെങ്കിൽ നിർദ്ദിഷ്ട ആഴത്തിൽ ഇംഗ്ലീഷിൽ വി ( V ) ആകൃതിയിൽ കുഴിയെടുക്കുക. തുടർന്ന് ഒരു വശത്ത് നിന്ന് ഉപരിതലം മൂതൽ അടി വരെ മൂന്ന് സെ.മീറ്റർ കനത്തിൽ ഒരു പോലെ മണ്ണ് അരിഞ്ഞെടുക്കുക. ഇപ്രകാരം ഒരേ സ്വഭാവമുള്ള ഒരു കൃഷിയിടത്തിലെ പത്ത് പതിനഞ്ച് സ്ഥലങ്ങളിൽ നിന്നും സാമ്പിളുകളെടുത്ത് വൃത്തിയുള്ള ഒരു പോളിത്തീൻ ഷീറ്റിലോ, തുണിയിലോ ഇട്ട ശേഷം മണ്ണിൽ നിന്നും കല്ല്, വേരിന്റെ അവശിഷ്ടങ്ങൾ മുതലായവ നീക്കം ചെയ്യണം. സമചതുരത്തിൽ പരത്തിയിട്ട സാമ്പിളിനെ നാലായി ഭാഗിച്ച് എതിർ വശത്തുള്ള രണ്ടു ഭാഗം ഒഴിവാക്കുക. ശേഷിക്കുന്ന മണ്ണ് വീണ്ടും സമചതുരത്തിൽ പരത്തി നാലായി ഭാഗിച്ച് എതിർവശത്തുള്ള രണ്ട് ഭാഗം ഒഴിവാക്കുക.

മണ്ണ് സാമ്പിൾ ഏകദേശം 400 – 500 ഗ്രാം ആകുന്നതുവരെ ഈ രീതി തുടരണം.
ഇങ്ങനെ ലഭിക്കുന്ന
മണ്ണ് സാമ്പിൾ തണലിൽ ഉണക്കിയ ശേഷം പോളിത്തീൻ കവറിലാക്കി സൂക്ഷിക്കുക. ഒന്നിലധികം സാമ്പിളുകൾ ഉണ്ടെങ്കിൽ തിരിച്ചറിയാനുള്ള നമ്പറോ പേരോ സഞ്ചിക്കുള്ളിലും പുറത്തും വെയ്ക്കുക.

മണ്ണ് സാമ്പിളിനോടൊപ്പം അയക്കേണ്ട വിവരങ്ങൾ

ഇതിനുള്ള നിർദ്ദിഷ്ട ഫോറങ്ങൾ അതതു കൃഷിഭവനുകളിൽ നിന്നും ലഭിക്കും.
താഴെ കാണിച്ച വിവരങ്ങളാണ് അതിൽ നൽകേണ്ടത്.

1. കർഷകന്റെ പേരും പൂർണ്ണവിലാസവും :
2. വില്ലേജ്, ഗ്രാമ പഞ്ചായത്ത്, ജില്ല :
3. സാമ്പിൾ എടുത്ത തിയ്യതി:
4. കൃഷിസ്ഥലത്തിന്റെ സർവ്വെ നമ്പർ , വിസ്തൃതി :
പുരയിടം /വയൽ

5. കൃഷി ചെയ്യാൻ ഉദ്ദേശിക്കുന്ന വിള അല്ലെങ്കിൽ നിലവിലുള്ള വിള:
6. തൊട്ടു മുമ്പ് കൃഷി ചെയ്തിട്ടുള്ള വിളയും വളപ്രയോഗവും :
7. ജലസേചന സൗകര്യം :
8. സ്ഥലത്തിന്റെ കിടപ്പ് :
9. നീർവാർച്ചാ സൗകര്യം :
10. മുമ്പ് നൽകിയ കുമ്മായം, മറ്റു വളപ്രയോഗം എന്നിവ സംബന്ധിച്ച വിവരങ്ങൾ :

11. ഏതെല്ലാം വിളകൾക്കാണ് വളപ്രയോഗത്തിനുള്ള നിർദ്ദേശം വേണ്ടത്.
12. മറ്റു വിവരങ്ങൾ ( ഉണ്ടെങ്കിൽ).

മണ്ണ പരിശോധനാ ലാബിൽ മണ്ണിൽ അടങ്ങിയിട്ടുള്ള അമ്ലത്വം, ലേയ ലവണങ്ങളുടെ അളവ്, നൈട്രജൻ, ഫോസ്ഫറസ്, പൊട്ടാഷ് എന്നിവയുടെ അളവ് തിട്ടപ്പെടുത്തുന്നു.
ഇതറിഞ്ഞു കഴിഞ്ഞാൽ ഓരോ വിളകൾക്കും ഏതെല്ലാം വളങ്ങൾ ഏതളവിൽ ഏതെല്ലാം സമയങ്ങളിൽ ചേർക്കണമെന്നും
അമ്ലാംശമോ ക്ഷാരാംശമോ, ലവണാംശമോ മറ്റോ കൂടുതൽ ഉണ്ടോ എന്നും അറിയാൻ കഴിയുന്നു. നാം ചേർക്കുന്ന ഓരോ തരി വളവും മണ്ണിനും വിളവിനും അനുയോജ്യമാണെന്ന് ഉറപ്പു വരുത്താനാവുന്നു.

കേരളത്തിൽ എല്ലാ ജില്ലാകളിലും മണ്ണു പരിശോധന ലാബറട്ടറികൾ പ്രവർത്തിക്കുന്നുണ്ട്.
ഇതിനു പുറമെ തിരുവനന്തപുരം, കൊല്ലം, ആലപ്പുഴ, കോട്ടയം, തൃശൂർ, പാലക്കാട്, മലപ്പുറം, കോഴിക്കോട്, കണ്ണൂർ ജില്ലകളിൽ സഞ്ചരിക്കുന്ന മണ്ണു പരിശോധനാ ലാബറട്ടറികളും ഉണ്ട്. കൃഷിയിടങ്ങളിൽ കാമ്പ് ചെയ്തു മണ്ണു പരിശോധിച്ച് ഫലം അപ്പപ്പോൾ നൽകുന്ന സൗകര്യങ്ങളും ഏർപ്പെടുത്തിയിട്ടുണ്ട്.