രക്തധമനികളെ വികസിപ്പിക്കുവാൻ കെൽപ്പുള്ള രാസ പദാർത്ഥങ്ങൾ വരെ തണ്ണിമത്തനിലുണ്ട്

എംകെപി മാവിലായി

വേനലിൽ വഴിയോരങ്ങളിലും കടകളിലും വൻ തോതിൽ വിൽപ്പന നടത്തുന്ന തണ്ണിമത്തൻ എന്ന വത്തക്ക അധികവും അയൽ സംസ്ഥാനങ്ങളിൽ നിന്നുമാണ് നമ്മുടെ നാട്ടിൽ എത്തിച്ചേരുന്നത്.ഏഷ്യ, ആഫ്രിക്ക ഭൂഖണ്ഡങ്ങളിലായി കണ്ടുവരുന്ന തണ്ണിമത്തന്റെ സ്വദേശം ദക്ഷിണാഫ്രിക്കയാണ്. മറ്റ് ആഫ്രിക്കൻ രാജ്യങ്ങളായ നമീബിയ, ബോത് സ്വാന, സിംബാവെ, മൊസാംബിക്, സംബിയ, മലാവി എന്നിവിടങ്ങളിലും ഇന്ന് തണ്ണിമത്തൻ വ്യാപകമായി കൃഷി ചെയ്തു വരുന്നു. കൂടാതെ അമേരിക്കയിലെ മിക്ക സ്ഥലങ്ങളിലും ഇത് വിപുലമായി കൃഷി ചെയ്തു വരുന്നുണ്ട്.എ.ഡി. പത്താം നൂറ്റാണ്ടിൽ തണ്ണിമത്തൻ കൃഷിയിൽ പ്രശസ്തി നേടിയ രാജ്യമാണ് ചൈന. ഇന്നും ലോക രാജ്യങ്ങളിൽ ഏറ്റവും കൂടുതൽ തണ്ണിമത്തൻ ഉൽപ്പാദിപ്പിക്കുന്ന രാജ്യങ്ങളിലൊന്നായാണ് ചൈന അറിയപ്പെടുന്നത്. കേരളത്തിൽ തണ്ണിമത്തൻ കൃഷി ചെറിയ തോതിലെങ്കിലും വ്യാവസായികാടിസ്ഥാനത്തിൽ കൃഷി ചെയ്യുന്നത് മലപ്പുറം, കണ്ണൂർ, കാസർക്കോഡ്, ആലപ്പുഴ, പാലക്കാട് ജില്ലകളിലാണ്.ഇന്ത്യയിൽ കേരളത്തിന് പുറമേ തമിഴ്നാട്, കർണ്ണാടക, ഉത്തർപ്രദേശ്, രാജസ്ഥാൻ, ഗുജറാത്ത് , മഹാരാഷ്ട്ര, ആന്ധപ്രദേശ്, ബംഗാൾ, ഹരിയാന, ഒറിസ്സ എന്നീ സംസ്ഥാനങ്ങളിലാണ് തണ്ണി മത്തൻ കൃഷി ചെയ്തു വരുന്നത്.കുക്കർബിറ്റേസിയേ (Cucurbitaceae) സസ്യകുടുംബത്തിൽപ്പെട്ട ഇതിന്റെ ശാസ്ത്രനാമം സിട്രൂലസ് ലനേറ്റസ് (Citrullus lanatus) എന്നാണ്.

സസ്യ വിവരണം

കുമ്പള വർഗ്ഗത്തിൽപ്പെട്ട ഈ സസ്യത്തിന് മണ്ണിൽ പടർന്നു വളരാനാണ് താൽപ്പര്യം. നീണ്ട തണ്ടുകളും വലിയ ഇലകളുമാണ് തണ്ണിമത്തന്റെ ഘടനാപരമായ ഒരു സവിശേഷത. തണ്ടുകൾ ജലാംശമേ റിയതും നേർത്ത രോമങ്ങൾ കൊണ്ട് പൊതിഞ്ഞവയുമായിരിക്കും. പൂക്കൾ വെളള കലർന്ന പച്ചനിറത്തിലും ചില ഇനങ്ങളിൽ മഞ്ഞ നിറത്തിലും കണ്ടുവരുന്നു. ഒരു സസ്യത്തിൽ തന്നെ ആൺ പൂക്കളേയും പെൺപൂക്കളേയും വെവ്വേറെ കാണാനാവും. തേനീച്ച തുടങ്ങിയ പ്രാണികൾ മുഖേനയാണ് പരാഗണം നടക്കുക.

കൃഷി രീതി

കേരളത്തിൽ എല്ലാകാലത്തും ഇത് കൃഷി ചെയ്യാമെങ്കിലും വെളളം കിട്ടാൻ സൗകര്യമുളള സ്ഥലങ്ങളിൽ നവംബർ – ഡിസംബർ മാസങ്ങളിൽ കൃഷി ചെയ്താൽ വേനൽക്കാലത്ത് വിളവെടുക്കാൻ സാധിക്കും. അർക്ക ജ്യോതി, അർക്ക മാനിക്, പൂസ ബഡാന, കിരൺ , ഐശ്വര്യ, സുൽത്താൻ, റെഡ് സ്വീറ്റ് തുടങ്ങി വിവിധ ഇനങ്ങൾ തണ്ണിമത്തനിൽ മെച്ചപ്പെട്ടവയാണ്.എന്നാൽ ഇതിൽ കേരളത്തിലേക്ക് ഏറ്റവും അനുയോജ്യമായി കണ്ടത് ഷുഗർ ബേബി എന്നയിനമാണ്. ഇന്ത്യൻ അഗ്രികൾച്ചറൽ റിസർച്ച് ഇൻസ്റ്റിറ്റൂട്ട് പുറത്തിറക്കിയിരിക്കുന്ന ഇവയുടെ കായ്കൾ ഉരുണ്ട് ഇടത്തരം വല്ലപ്പമുള്ളതും കടുത്തചുവന്ന അകക്കാമ്പോട് കൂടിയതുമാണ്.

മണൽ കലർന്ന ചെളിമണ്ണാണ് തണ്ണിമത്തന്റെ കൃഷിക്കുത്തമം. ഈർപ്പം എല്ലാപ്പോഴും ചെടിക്ക് ആവശ്യമാണെങ്കിലും വെളളക്കെട്ടിനെ ഇതിന് സഹിക്കാനാവില്ല. വിത്ത് നടുന്നതിന് മുമ്പ് 12 മണിക്കൂറെങ്കിലും വെള്ളത്തിൽ കുതിർത്തുവെച്ചാൽ എളുപ്പം മുളക്കാൻ സഹായകമാകും. നന്നായി കിളച്ചൊരുക്കിയ മണ്ണിൽ വരികൾ തമ്മിൽ രണ്ടു മീറ്ററും തടങ്ങൾ തമ്മിൽ ഒരു മീറ്ററും അകലം കിട്ടത്തക്കവിധം തടങ്ങൾ എടുക്കണം. ഇതിൽ പാകം വന്ന കാലിവളമോ കംബോ സ്റ്റോ ഒന്നോ രണ്ടോ കി.ഗ്രാം വീതം ചേർത്ത് മണ്ണുമായി നന്നായി യോജിപ്പിക്കണം. കുറച്ച് ദിവസം മുന്നേ ഇത് ചെയ്തു വെക്കുന്നത് നന്നായിരിക്കും.ഓരോ തടത്തിലും നാല് – അഞ്ച് വിത്തുകൾ നടാം. ഇവ മുളച്ച് നാല് – അഞ്ച് ഇല പ്രായമാകുമ്പോൾ കരുത്തുള്ള രണ്ടാേ മൂന്നോ തൈകൾ നിർത്തി ബാക്കിയുളവ പറിച്ചു മാറ്റണം.
ഒരു സെന്റ് സ്ഥലത്തേക്ക് 30 ഗ്രാം യൂറിയ, 50 ഗ്രാം മസൂറിഫോസ് അല്ലെങ്കിൽ രാജ് ഫോസ്, 90 ഗ്രാം പൊട്ടാഷ് എന്നിവ അടിവളമായി ചേർക്കാം. പിന്നീട് ചെടി പടർന്നു തുടങ്ങുമ്പോൾ 160 ഗ്രാം യൂറിയ, 90 ഗ്രാം പൊട്ടാഷും നൽകാം.ചെടി പുഷ്പിക്കുന്ന സമയത്ത് 150 ഗ്രാം യൂറിയ കുടി നൽകണം.
രാസവളം ചേർക്കാത്ത പക്ഷം പിണ്ണാക്ക് വളങ്ങൾ സെന്റിന് രണ്ട് കി.ഗ്രാം എന്ന കണക്കിന് ചേർത്താലും മതി.
ഫിഷ് അമിനോ ആസിഡ്, എഗ്ഗ് അമിനോ ആസിഡ് എന്നിവ തയ്യാറാക്കി പ്രയോഗിക്കുന്നത് ഉൽപ്പാദന ക്ഷമത കൂട്ടാൻ ഉപകരിക്കും.
വള്ളി പടർന്ന് കായ്കൾ രൂപപ്പെട്ട ശേഷം രണ്ടു ദിവസത്തിലൊരിക്കൽ മാത്രം നനച്ചാൽ മതി. ചെടികൾ പടർന്നു തുടങ്ങുമ്പോൾ ഓലയോ, മരച്ചില്ലകളോ, ഉണങ്ങിയ വാഴയിലകളാേ നിലത്ത് വിരിച്ചു കൊടുക്കുന്നത് കായ്കൾ മണ്ണിൽ മുട്ടിയിരുന്ന് കേടുവരാതിരിക്കാൻ സഹായിക്കും. വിളവെടുപ്പിന് മുമ്പുള്ള ഒരാഴ്ചക്കാലം നന ഒഴിവാക്കുന്നത് കായ്ക്ക് നല്ല മധുരവും നിറവും ലഭിക്കുവാൻ ഉപകരിക്കും.വിളഞ്ഞ തണ്ണിമത്തൻ കൈ കൊണ്ടു തട്ടുമ്പോൾ ലോഹത്തിൽ തട്ടുന്ന മാതിരി ശബ്ദം കേൾക്കും.നമ്മുടെ കാലാവസ്ഥയിൽ നടീൽ കഴിഞ്ഞ് 90 ദിവസം കൊണ്ട് വിളവെടുപ്പിനാവും.

Citrullus_lanatus-krishippura.com

വേനലിൽ ഒന്നാന്തരം ദാഹശമിനിയാണിത്. പഞ്ചസാരയുടെ അളവ് 13 ശതമാനം വരെയാണ്. 100 ഗ്രാം തണ്ണിമത്തനിൽ 0.3 ഗ്രാം മാംസ്യം, 3.3 ഗ്രാം കാർബോഹൈഡ്രേറ്റുകൾ, 6.2 ഗ്രാം കൊഴുപ്പ്, 0.2 ഗ്രാം ഭക്ഷ്യ നാര്, 160 മില്ലിഗ്രാം പൊട്ടാസ്യം 11 മി.ഗ്രാം കാൽസ്യം, 27.3 മി.ഗ്രാം സോഡിയം, 7.9 മി.ഗ്രാം ഇരുമ്പ് 12 മി.ഗ്രാം ഫോസ്ഫറസ് ഒരു മി.ഗ്രാം വിറ്റാമിൻ സി എന്നിവ അടങ്ങിയിരിക്കുന്നു.സമീപകാലത്ത് നടത്തിയ പഠനങ്ങൾ കാണിക്കുന്നത് ഇതിൽ കാണുന്ന അമിനോ അമ്ലമായ സിട്രൂലിൻ (citrulline) രക്തധമനികളെ വികസിപ്പിക്കുവാൻ കെൽപ്പുള്ള രാസ പദാർത്ഥമാണെന്നാണ്. ഇത് മനുഷ്യ ശരീരത്തിൽ രാസപ്രക്രിയ വഴി നൈട്രിക്ക് ഓക്സൈഡ് ആയി മാറുകയും നമ്മുടെ രക്തധമനികളുടെ വി കാസത്തിന് സഹായിയായിത്തീരുകയും ചെയ്യുന്നു. ശരീരത്തെ റേഡിയേഷനിൽ നിന്നും സംരക്ഷിക്കാൻ സഹായകമാകുന്ന പെക്ടിൻ എന്ന ഘടകവും തണ്ണിമത്തനിൽ അടങ്ങിയിട്ടുണ്ട്.
രക്തസമ്മർദ്ദം കുറയ്ക്കാനും , രക്തധമനികളെ വികസിപ്പിക്കുവാനും മൂത്രാശയ സംബന്ധമായ അസുഖങ്ങൾക്കും പ്രതിവിധിയായി തണ്ണി മത്തനെ പ്രയോജനപ്പെടുത്താമെന്ന് ആയുർവേദത്തിലും പ്രകൃതി ചികിത്സയിലും
പറയുന്നുണ്ട്.