എം കെ പി മാവിലായി
പാഷൻ ഫ്രൂട്ട് നമ്മുടെ നാട്ടിൽ വളരെക്കാലം മുൻപ് തന്നെ മരത്തിലും മതിലിലും കയറ്റി വിട്ട് കൃഷി ചെയ്തു വരുന്നുണ്ടെങ്കിലും ഈയടുത്തകാലത്താണ് ഇതിന് വളരെയധികം പ്രാധാന്യം വന്നു തുടങ്ങിയത്.
മാനസിക സമ്മർദ്ദം കുറക്കാനുപകരിക്കുന്ന രാസവസ്തുക്കൾ ഈ പഴത്തിലുണ്ടെന്ന കണ്ടുപിടിത്തം ലോക വിപണിയിൽ ഇതിനെ കൂടുതൽ പ്രിയങ്കരമാക്കി.
സസ്യ വിവരണം
പാസിഫ്ളോറേസിയേ (Passifloraceae) കുടും ബത്തിൽപ്പെട്ട ഈ ചെടിയുടെ ശാസ്ത്രനാമം പാസിഫ്ളോറ എഡുലിസ്(Passiflora edulis) എന്നാണ്. തെക്കെ അമേരിക്കയാണ് സ്വദേശം. ഇത് പടർന്ന് വളരുന്ന വളളിയാണ്. താങ്ങ് മരമോ, പന്തലോ ഇതിന്റെ വളർച്ചക്ക് ആവശ്യമാണ്. അതീവ ആകർഷകമാണ് ഇതിന്റെ പൂക്കൾ .നമ്മുടെ കാലാവസ്ഥയിൽ ശക്തമായ മഴക്കാലമൊഴികെ ഇവ പൂക്കുകയും കായ്ക്കുകയും ചെയ്യും. കായ്കൾക്ക് ഗോളാകൃതിയാണ്. ഇവയിൽ വ്യത്യസ്ഥ ഇനങ്ങൾ പ്രചാരത്തിലുണ്ട്. ഇവയിൽ
ഇളം മഞ്ഞ നിറത്തിലുളളതും ഇളം പർപ്പിൾ നിറത്തിൽ കായ്കൾ ഉളള ഇനങ്ങളുമാണ് നമ്മുടെ നാട്ടിൽ യോജിച്ചതായി കാണുന്നത്. കട്ടിയുള്ള തൊണ്ടോടു കൂടിയ പാഷൻ ഫ്രൂട്ടിന്റെ അകത്ത് നിറയെ വിത്തുകളാണ്. വിത്തിന് ചുറ്റും ആവരണമായി കാണുന്ന പഴച്ചാറാണ് ഭക്ഷ്യയോഗ്യമായ ഭാഗം.
കൃഷി രീതി
വെളളം കെട്ടി നിൽക്കാത്ത ഏത് തരംമണ്ണിലും ഈ ചെടി നന്നായി വളരും. കടുത്ത ചൂടും അതിശൈത്യവും പാടില്ല. വിത്തുമുളപ്പിച്ചും തണ്ടുകൾ മുറിച്ച് നട്ടും കൃഷി ചെയ്യാം. ആറ് – ഏഴ് മാസം വളർച്ചയെത്തിയതും പൂവിടാത്തതുമായ കമ്പുകളാണ് മുറിച്ച് നടാൻ അനുയോജ്യം. അടിഭാഗത്തെ രണ്ട് മുട്ടിലുളള ഇലകൾ നീക്കം ചെയ്ത ശേഷം നടാനായി ഉപയോഗിക്കാം. തണ്ട് നട്ട് രണ്ട് മൂന്നാഴ്ചക്കുളളിൽ
തളിർപ്പുകൾ വന്നു തുടങ്ങും. ഒരു വർഷത്തിനുളളിൽ ഇവ നന്നായി പടർന്നു കയറും.
നടുമ്പോൾ രണ്ടടി നീളവും വീതിയും താഴ്ചയുമുള്ള കുഴികളെടുത്ത് അത് മേൽമണ്ണും പഴകിയ ചാണകപ്പൊടിയും കലർത്തി നിറക്കണം. വളളിനടുന്നതിന് ഒരു മാസം മുമ്പ് ഇത് ചെയ്ത് വെക്കുന്നതാണ് നല്ലത്.
മഴക്കാലത്ത് ചെടിക്ക് ചുറ്റും വെളളം കെട്ടി നിൽക്കുന്നില്ലെന്നുറപ്പ് വരുത്തണം.
വിത്ത് നട്ടും തൈകളാക്കാം. ശേഖരിച്ച വിത്തുകൾ ഒരു ദിവസം ചെറുനാരങ്ങാ നീരിൽ ഇട്ടു വെക്കണം. ഇത് വെള്ളത്തിൽ കഴുകിയ ശേഷം നടാനായി ഉപയോഗിക്കാം. ഇങ്ങിനെ ചെയ്യുന്നത് മൂലം വിത്ത് എളുപ്പം കിളിർത്തുവരും.
മഞ്ഞ, പർപ്പിൾ നിറത്തോടു കൂടിയ ഇനങ്ങൾക്ക് പുറമെ ഈ രണ്ടിനങ്ങളുടേയും സങ്കരണത്തിലൂടെ ഇന്ത്യൻ ഹോർട്ടിക്കൾച്ചറൽ ഗവേഷണ ഇൻസ്റ്റിറ്റ്യൂട്ട് വികസിപ്പിച്ച ഇനമാണ് കാവേരി. പർപ്പിൾ നിറമുള്ള കായ്കളാണ് ഈ ഇനത്തിൽ ഉണ്ടാവുക. മജ്ജക്ക് മധുരം കൂടുതലാണ്. മറ്റുള്ളവ കായ്ക്കാൻ ആറ് മാസമെടുക്കുമ്പോൾ ഇത് നട്ട് നാലാം മാസം തന്നെ കായ്ക്കുകയും ചെയ്യും. ഉൽപ്പാദന ക്ഷമതയും കൂടുതലാണ്.
വേനൽക്കാലത്ത് പൊതുവെ ഇവ ഇലകൾ പൊഴിക്കാറുണ്ട്. കടുത്ത വേനലിൽ തണ്ടുകൾ ഉണങ്ങാനും സാധ്യതകളുണ്ട്. അടുത്ത മഴക്കാലത്ത് വീണ്ടും പുതിയ തളിർപ്പുകൾ ഉണ്ടാവും. ഈ പുതിയ തളിർപ്പുകളിലാണ് പൂക്കളും കായ്കളും കൂടുതലായി ഉണ്ടാവുക.
ഒരു ചെടിയിൽ നിന്നും വർഷം പ്രതി ശരാശരി 10 കി.ഗ്രാം കായ്കൾ ലഭിക്കും. മൂത്ത് പഴുക്കുമ്പോൾ വിളവെടുപ്പ് നടത്താം. സപ്തംബർ-ഒക്ടോബർ, മെയ്-ജൂൺ മാസങ്ങളിലാണ് ധാരാളം കായ്കൾ ഉണ്ടാവുക. നനക്കുകയും നല്ല പരിചരണം നൽകുകയും ചെയ്താൽ വർഷം മുഴുവൻ ഇവ കായ്ക്കുന്നതായി കണ്ടിട്ടുണ്ട്. വർഷം പ്രതി 5 കി.ഗ്രാം ചാണകവും, അര കി.ഗ്രാം വീതം കടലപിണ്ണാക്കും, എല്ലുപൊടിയും നൽകിയാൽ ആവശ്യമായ വളമായി. ചെടിയിലെ ശോഷിച്ചതും , ആരോഗ്യം കുറഞ്ഞതുമായ ശാഖകൾ മുറിച്ചു മാറ്റുകയും വേണം. മഞ്ഞുകാലമാണ് ഇതിന് അനുയോജ്യം.
പോഷക ഗുണം
പാഷൻ ഫ്രൂട്ടിന്റെ 100 ഗാം കഴമ്പിൽ 2 മില്ലിഗ്രാം ഇരുമ്പ്, 189 മില്ലിഗ്രാം പൊട്ടാസ്യം, 60 മില്ലിഗ്രാം ഫോസ്ഫറസ്, 54 അന്തർദ്ദേശീയ യൂണിറ്റ് കരോട്ടിൻ എന്നിവ അടങ്ങിയിരിക്കുന്നു. ഇതിന്റെ ജ്യൂസിന് പുളിരസം പ്രധാനം ചെയ്യുന്നത് മുഖ്യമായും സിട്രിക്ക് അമ്ലവും (Citric acid), മാലിക് അല്ലവും (Malic acid) ആണ്. ഇത് കൂടാതെ അസ്കോർബിക് അമ്ലവും ( Ascorbic acid) ഈ പഴത്തിൽ അടങ്ങിയിട്ടുണ്ട്.
ഹാർമേൻ (Harmane), ഹാർമൈൻ (Harmine) , ഹാംലൈൻ(Harm line) , ഹാർമോൾ (Harmole), പാസിഫ്ളോറിൻ (Passiflorine) തുടങ്ങിയ ആൽക്കലോയിഡുകൾ ഈ പഴത്തിൽ നിന്നും വേർതിരിച്ചെടുത്തിട്ടുണ്ട്. പാഷൻ ഫ്രൂട്ടിലുള്ള ഫ്ളേവനോയിഡുകളാണ് മന സംഘർഷത്തെ ലഘൂകരിക്കാൻ ഉപകരിക്കുന്നത്.
പഴത്തിലടങ്ങിയിട്ടുള്ള ഹാർമേൻ എന്ന ആൽക്കലോയിഡിന് അധിക രക്തസമ്മർദ്ദം കുറക്കുവാനും നിദ്ര പ്രധാനം ചെയ്യുവാനുമുള്ള കഴിവുണ്ട്. ഇതിലെ ഡയറ്റി നാരുകൾ രക്തത്തിലെ കൊളസ്ട്രോൾ നീക്കം ചെയ്യുവാൻ സഹായിക്കുന്നു.
ബി – കോംപ്ലക്സ് വിറ്റാമിനുകളുടെ അഭാവം കൊണ്ടുണ്ടാകുന്ന വായ്പ്പുണ്ണ് മാറ്റാനും പാഷൻ ഫ്രൂട്ട് ശീലമാക്കുന്നത് കൊണ്ട് സാധിക്കും.
വിദേശ രാജ്യങ്ങളിൽ പ്രധാനമായും വിവിധ ഔഷധനിർമ്മാണത്തിനായാണ് ഈ പഴത്തെ പ്രയോജനപ്പെടുത്തുന്നത്.
