എംകെപി മാവിലായി
കാഴ്ചയിൽ ഒരു ഉദ്യാന സസ്യം പോലെ നിറയെ ഇലകളും മുള്ളുകളുമുളള കരോണ്ട ചെറി കായ്ച്ച് നില്ക്കുന്നത് മനോഹര കാഴ്ചയാണ്.
അപ്പോസൈനേസ്യേ (A pocynaceae) കുടുംബത്തിൽപ്പെട്ട ഈ സസ്യത്തിന്റെ ശാസ്ത്രനാമം കരൈ സ കരൺഡാസ് (Carissa carandas) എന്നാണ്.
യൂറോപ്പ് ആണ് ചെടിയുടെ ജന്മദേശമായി അറിയപ്പെടുന്നത്. പൊതുവെ എല്ലാതരം മണ്ണിലും ഇത് വളരുമെങ്കിലും എക്കൽ മണ്ണാണ് ഏറ്റവും അനുയോജ്യം. ശാഖകളും ഉപശാഖകളുമായി വളരുന്ന കരോണ്ട ചെടികളുടെ പരമാവധി ഉയരം അഞ്ച് മീറ്ററോളമാണ്. ചെടിയുടെ ഫലമുൾപ്പടെ എല്ലാ ഭാഗങ്ങളിലും വെളുത്ത പാൽപോലുള്ള കറയുണ്ടാകും. നമ്മുടെ കാലാവസ്ഥയിൽ ജനുവരി മുതൽ പുഷ്പിക്കുന്ന ചെടിയിൽ കായ്കൾ ഉണ്ടാക്കുന്നത് ഏപ്രിൽ , മെയ് മുതലാണ്. ഇവയുടെ പൂക്കൾ വെളുത്തതും സുഗന്ധികളുമാണ്.
രണ്ടോ മൂന്നോ പൂക്കളുള്ള കുലകളായാണ് കാണുക. രണ്ടര സെ.മീറ്റർ വരെ നീളമുള്ള ഫലത്തിന്റെ രണ്ടറ്റവും ഉരുണ്ടതാണ്. നാലോ അഞ്ചോ വിത്തുകൾ ഒരു ഫലത്തിൽ കാണും.
കൃഷി രീതി
സാധാരണയായി വിത്തുപയോഗിച്ചാണ് വംശവർധനവ്. നന്നായി മൂത്ത കായ്കളിൽ നിന്നും വിത്ത് ശേഖരിക്കാം. ഇവ അധിക നാൾ കഴിയുംമുമ്പേ പാകണം. പഴകുന്തോറും വിത്തിന് കിളിർപ്പ് ശേഷി കുറയും. വിത്ത് നട്ട് ഒന്നര മാസം വരെ എടുക്കും കിളിർത്ത് വരാൻ. പോളിത്തീൻ ബാഗിൽ വിത്ത് മുളപ്പിച്ച് തൈകളാക്കുന്നതാണ് എളുപ്പം. തൈകൾ ഒരു വർഷത്തെ വളർച്ചയെത്തിയാൽ സ്ഥിരമായ സ്ഥലത്തേക്ക് മാറ്റി
നടാം. ചെടിയുടെ ശാഖകളിൽ ലെയറിങ്ങ് അഥവാ പതിവെക്കൽ നടത്തിയും എളുപ്പം തൈകൾ തയ്യാറാക്കാം. ഇത്തരം ലെയറുകൾ നട്ടാൽ അടുത്ത വർഷം മുതൽ ഇവ കായ്ച്ച് തുടങ്ങും. വിത്ത് തൈകളാണെങ്കിൽ കായ്ക്കാൻ മൂന്ന് വർഷം എടുക്കും.
ഈർപ്പമുളളതും നല്ല സൂര്യപ്രകാശം ലഭിക്കുന്നതുമായ സ്ഥലമാണെങ്കിൽ ചെടികളിൽ സമൃദ്ധമായി കായ്കൾ ഉണ്ടാകും.
കായ്കൾ പല പ്രാവശ്യമായിട്ടാണ് മൂപ്പെത്തുന്നത്. കായ്കൾ മൂപ്പെത്തി പൊഴിയും മുമ്പേ വിളവെടുക്കണം. സാധാരണ രീതിയിൽ വിളവെടുത്ത പഴങ്ങൾ 5 ദിവസം വരെ കേടുകൂടാതിരിക്കും. ഫ്രിഡ്ജിൽ രണ്ടാഴ്ച വരെ കേടാകാതെ സൂക്ഷിക്കാം.
പോഷക ഗുണം.
90 ശതമാനം ജലാംശം അടങ്ങിയിട്ടുളള ഫലത്തിൽ 1.5 ശതമാനം ഭക്ഷ്യയോഗ്യമായ നാരുകളും , 2.9 മി.ഗ്രാം അന്നജവും , 9.5 മി.ഗ്രാം മാംസ്യവും 2.9 മി.ഗ്രാം കൊഴുപ്പുമുണ്ട്. വിറ്റാമിൻ സി, വിറ്റാമിൻ എ, ബി1, ബി2, ബി3, എന്നീ ജീവകങ്ങളും കാണപ്പെടുന്നു. ധാതുലവണങ്ങളായ കാൽസ്യം, ഫോസ്ഫറസ് എന്നിവയും ഉണ്ട് . കേക്കുകൾ, മധുര പലഹാരങ്ങൾ തുടങ്ങിയവയിൽ ചെറിപ്പഴം ചേർക്കാറുണ്ട്. ചെറിപ്പഴത്തിന്റെ വിത്തിൽ നിന്നും വേർതിരിച്ചെടുക്കുന്ന എണ്ണ സലാഡുകൾ നിർമ്മിക്കാൻ ഉപയോഗിക്കുന്നു. ചെടിയുടെ തായ്ത്തടിയിൽ നിന്നും ഊറി വരുന്ന പശപോലുള്ള പദാർത്ഥം ച്യൂയിംഗമായി ഉപയോഗിക്കാറുണ്ട്.
ഔഷധ ഗുണം
ഉറക്കക്കുറവ് പരിഹരിക്കുന്ന മെലാറ്റോനിൻ എന്ന വസ്തു ഫലത്തിൽ അടങ്ങിയിട്ടുണ്ട്.
പഴത്തിൽ അടങ്ങിയിട്ടുള്ള ആന്റി ഓക്സിഡന്റ്സ് സ്ട്രോക്ക്, ഹൃദ്രോഗം എന്നിവക്കുള്ള സാധ്യത കുറക്കും.
ആൽക്കലിൻ സ്വഭാവമുളള പഴമായതിനാൽ ദഹനക്കുറവും , അസിഡിറ്റി പ്രശ്നങ്ങൾ പരിഹരിക്കുന്നതിനും
പഴത്തിന്റെ ഉപയോഗം മൂലം സാധ്യമാകും.
സംസ്കരണം
കായ്കളിലെ കറ നീക്കം ചെയ്തു വേണം ഇവ ഭക്ഷ്യയോഗ്യമാക്കാൻ. ബേക്കറിയിൽ കിട്ടുന്നത് നമ്മുടെ നാട്ടിലുണ്ടാകുന്ന ചെറിയുടെ കായ്കൾ സംസ്ക്കരിച്ചുണ്ടാക്കുന്നതാണ്.
പഴങ്ങൾ നന്നായി കഴുകിയ ശേഷം ഒരു തുണിയിൽ കിഴികെട്ടി തിളക്കുന്ന വെള്ളത്തിൽ ഒന്ന് – രണ്ട് മിനുട്ട് നേരം മുക്കിയിടണം. ഇതിന് ശേഷം മൂർച്ചയുളള കത്തി ഉപയോഗിച്ച് കായ്കളുടെ ഒരു വശം മാത്രം നെടുകെ മുറിച്ച് വിത്തുകൾ നീക്കം ചെയ്യണം. തുടർന്ന് കായ്ക്കുള്ളിലെ കറ നീക്കുന്നതിനായി നാല് ശതമാനം വീര്യമുള്ള ചുണ്ണാമ്പ് ലായനിയിൽ പത്ത് – പന്ത്രണ്ട് മണിക്കൂർ ഇട്ട് വെക്കണം. 40 ഗ്രാം ചുണ്ണാമ്പ് ഒരു ലിറ്റർ വെളളത്തിൽ കലർത്തിയാൽ മേൽ കാണിച്ച വീര്യത്തിലുളള ചുണ്ണാമ്പ് ലായനിയാക്കാം. കായ്കൾ ചുണ്ണാമ്പ് ലായനിയിൽ നിന്നും മാറ്റി നന്നായി ശുദ്ധവെള്ളത്തിൽ കഴുകിയെടുക്കണം.
അടുത്ത പടിയായി കായ്കൾക്ക് ആകർഷകമായ നിറവും രുചിയും കിട്ടുന്നതിനായി പഞ്ചസാര ലായനിയിലേക്ക് മാറ്റണം. ഇതിനായി ഒരു കി.ഗ്രാം പഞ്ചസാര അര ലിറ്റർ വെള്ളത്തിൽ അലിയിച്ച് അതിൽ കായ്കളിടാം. ഇത്രയും ലായനി ഒരു കി.ഗ്രാം പഴത്തിന് മതിയാകും. ഭക്ഷ്യ യോഗ്യമായ ചുവപ്പ് നിറം ഈ പഞ്ചസാര ലായനിയിൽ ചേർക്കുന്നത് കായ്കൾക്ക് ആകർഷകമായ നിറം കിട്ടാൻ ഉപകരിക്കും. കായ്കൾ ഒരു ദിവസം ഈ ലായനിയിൽ ഇട്ടു വെക്കുക. ഈ സമയത്ത് കായ്ക്കുളളിലെ ജലാംശം ലായനിയിലേക്ക് ഇറങ്ങി വരും. ഒരു ദിവസത്തിനുശേഷം ലായനിയിൽ നിന്നും കായ്കൾ പുറത്തേക്ക് എടുക്കണം. ലായനി തിളപ്പിച്ച് അധികമുളള ജലാംശം നീക്കം ചെയ്യാം. ഭാഗികമായി സംസ്ക്കരിച്ചെടുത്ത കായ്കൾ വീണ്ടും പഞ്ചസാരസിറപ്പിലേക്ക് ഇടുക. ഈ പ്രക്രിയ രണ്ടു മൂന്നു പ്രാവശ്യം ആവർത്തിക്കണം. ഇതിനു ശേഷം പഞ്ചസാര സിറപ്പിൽ കായ്കൾ ഇട്ട് കുറച്ചു സമയം തിളപ്പിച്ചതിനു ശേഷം കായ്കൾ ലായനിയിൽ നിന്നും പുറത്തേക്ക് എടുക്കണം.
കായ്കൾ കൂടുതൽ കാലം സൂക്ഷിക്കുവാനായി പുതിയതായി തയ്യാറാക്കിയ പഞ്ചസാര സിറപ്പിലേക്ക് മാറ്റാം. ഒരു കി.ഗ്രാം പഞ്ചസാര ഒരു ലിറ്റർ വെളളത്തിൽ ലായനിയാക്കിയതിൽ കായ്കൾ ഇട്ടുവെക്കാം.
കായ്കൾ കേടാകാതിരിക്കുവാൻ ഒരു ഗ്രാം സോഡിയം ബെൻസോവേറ്റ്, 5 ഗ്രാം സിട്രി ആസിഡ് ഇവ രണ്ടും ലായനിയിൽ ചേർക്കാവുന്നതാണ്.
ബേക്കറികളിലേയും പലഹാരക്കടകളിലേയും ചില്ലു ഭരണികളിൽ നീന്തിത്തുടിക്കുന്ന ചുവന്ന ചെറിപ്പഴങ്ങൾ കാണുമ്പോൾ ഈ കുഞ്ഞു പഴത്തിന്റെ ഭൂതകാല ചരിത്രം പലർക്കും അറിയില്ലെന്നതാണ് സത്യം.
