ഞാവൽപ്പഴം: പ്രമേഹശമന ശേഷിയുള്ള പഴങ്ങളിൽ മുഖ്യമാണ്

എ കെ പി മാവിലായി

ഇന്ത്യ , ശ്രീലങ്ക ഉൾപ്പെടെ മിക്ക ഏഷ്യൻ രാജ്യങ്ങളിലും സ്വാഭാവികമായി കണ്ടുവരുന്ന ഞാവൽ മരം ഹിന്ദുക്കളും ബുദ്ധമതക്കാരും ഒരുപോലെ പവിത്രമായി കരുതുന്ന ഒരു ഫലവൃക്ഷമാണ് .സിസിജിയം കുമിനി( Syzygium cumini) എന്ന ശാസ്ത്രനാമത്തിലറിയപ്പെടുന്ന ഈ ചെടി
മിർട്ടേസിയേ (Myrtaceae) കുടുംബാംഗമാണ്.

ഇന്ത്യയാണ് ഞാവലിന്റെ സ്വദേശം .വളരെ വേഗത്തിൽ വളരുന്ന ഇവയ്ക്ക് 30 മീറ്ററോളം ഉയരത്തിൽ വളരാനാകും . മാത്രമല്ല നൂറ് വർഷത്തിലധികം ആയുസ്സുമുണ്ട്. മങ്ങിയ വെളുത്ത നിറമുളള പൂക്കൾ കുലകളായി നേരിയ നറുമണമായി വിരിഞ്ഞു വരും. മാർച്ച് -ഏപ്രിൽ മാസങ്ങളിലാണ് പുക്കൾ വിരിയുന്നത്.
കായ്കൾ പച്ചനിറത്തിലാണ് ആദ്യം. പിന്നീട് പിങ്ക്, പർപ്പിൾ നിറങ്ങളിലായി മാറുന്നു. വിളവെടുപ്പിനടുക്കുമ്പോൾ ഏതാണ്ട് വയലറ്റ് കലർന്ന കറുപ്പ് നിറത്തിലാണ് കാണപ്പെടുക. പൂക്കൾ ഒരു മാസം കൊണ്ട് മൂത്ത് പഴുത്ത ഫലമായി മാറും. കുട്ടികൾക്ക് പ്രിയങ്കരമാണ് ഞാവൽപ്പഴം. പഴത്തിനുളളിൽ ഉരുണ്ടതും അകം കട്ടിയുളളതുമായ ഒരു വിത്ത് കാണാം. പരമ്പരാഗതമായി വിത്തുപയോഗിച്ചാണ് ഞാവൽ വൃക്ഷം വളർത്തിയെടുക്കുക. തൈകൾ എട്ടു വർഷത്തെ വളർച്ചയെത്തിയാൽ കായ്ച്ച് തുടങ്ങും. ഇപ്പോൾ ഇതിന്റെ ഒട്ടുതൈകൾ നഴ്സറികൾ ലഭ്യമാണ്. ഇവ നട്ട് പരിചരിച്ചാൽ നാല് വർഷത്തിനകം വിളവെടുക്കാനാവും.

രാസഘടന

ഞാവൽ പഴത്തിന്റെ വിത്തിൽ ജാംബാെലിൻ (Jambolin) എന്ന ഗ്ലൈക്കോസൈഡും ജാംബോസൈൻ(Jamposene) എന്ന മറ്റൊരു രാസ പദാർത്ഥവുമടങ്ങിയിട്ടുണ്ട്. ഇവ കൂടാതെ ആന്തോസയാനിൻ ( Anthocyanin ) എന്ന വർണകമാണ് ഫലത്തിന് കടുത്ത നിറം നൽകുന്നത്. ഫലത്തിന് ചവർപ്പ് രസം നൽകുന്നത് ഗാലിക് അമ്ലം (Gallic acid) ആണ്. ഐസോ ക്യൂർ സെറ്റിൻ (Isoquercetin), കാംപ് ഫറോൾ (kampferol), മാൾവിഡിൻ (Maluidin), പെറ്റ്യുണിഡിൻ (Petuni din) എന്നിവയാണ് ഈ ഫലവൃക്ഷത്തിൽ കാണപ്പെടുന്ന മറ്റു രാസഘടകങ്ങൾ.

പോഷകങ്ങൾ

100 ഗ്രാം ഞാവൽപ്പഴത്തിൽ 48 അന്തർദ്ദേശീയ യൂണിറ്റ് കരോട്ടിൻ, 18 മില്ലിഗ്രാം വിറ്റാമിൻ സി, 55 മില്ലി ഗ്രാം പൊട്ടാസ്യം, 15 മില്ലിഗ്രാം വീതം ഫോസ്ഫറസ്, കാൽസ്യം, 26 മില്ലിഗ്രാം
സോഡിയം എന്നിവ അടങ്ങിയിട്ടുണ്ട്. കാർബോഹൈഡ്രേറ്റിന്റെ തോത് 14 ശതമാനവും മാംസ്യത്തിന്റേത് 0.7 ശതമാനവുമാണ്.

ഔഷധ പ്രാധാന്യം
പ്രമേഹശമന ശേഷിയുള്ള പഴങ്ങളിൽ മുഖ്യമാണ് ഞാവൽ. പാൻക്രിയാസ് ഗ്രന്ഥിയെ ഉത്തേജിപ്പിക്കുവാൻ ഇതിനാവും. ഞാവൽക്കുരു ഉണക്കിപ്പൊടിച്ചത് 3 ഗ്രാം വീതം വെള്ളത്തിൽ കലർത്തി ദിവസവും നാല് നേരം കഴിക്കുന്നതിനാണ് വൈദ്യ നിർദ്ദേശം. പൈൽസ് ശമിക്കാൻ ഞാവൽ പഴം വെറും വയറ്റിൽ കഴിക്കുന്നത് നല്ലതാണ്. ഞാവൽ പഴ സിറപ്പ് കഴിക്കുന്നത് വിളർച്ച, രക്തസമ്മർദ്ദം, മൂത്രതടസ്സം, വയറിളക്കം എന്നിവക്ക് ആശ്വാസകരമാകും.
ഇതിന്റെ ഇലക്കും, തടിയിലെ തൊലിക്കും ഔഷധ പ്രാധാന്യമുണ്ട്.
വൈദ്യശാസ്ത്ര രംഗത്ത് ഏറെ ഉപയോഗിക്കപ്പെടുന്ന ഒന്നാണ് ഞാവൽ എന്ന ഞാറക്ക .
ജംബു എന്നാണ് സംസ്കൃതത്തിൽ ഈ ഫലം അറിയപ്പെടുന്നത്.