കുടമ്പുളി : വാണിജ്യ സാധ്യതയേറുന്ന വിള

എംകെപി മാവിലായി

പിണറ്റുപുളി, പെണംപുളി, തോട്ടു പുളി, കൊറുക്ക പുളി എന്നിങ്ങന്നെ കുടമ്പുളി വിവിധ
പേരുകളിലറിയപ്പെടുന്നു. ക്ലോസിയേസിയേ ( Clausiaceae ) സസ്യകുടുംബത്തിൽ പെട്ട ഈ ചെടിയുടെ ശാസ്ത്രനാമം ഗാർസീനിയ ഗമ്മിഗട്ട (Garcinia gummigutta) എന്നാണ്.
പശ്ചിമഘട്ട മലനിരകളിലെ നിത്യ ഹരിത വനങ്ങളുടെ സന്തതിയായ കുടമ്പുളി മഹാരാഷ്ട്ര, ഗോവ, കർണ്ണാടക, തമിഴ്നാട്, കേരള തുടങ്ങിയ സംസ്ഥാനങ്ങളാണ് കൂടുതലായും കാണുന്നത്.
കുടമ്പുളിയിൽ ആൺ മരങ്ങളും , ആൺ-പെൺ മരങ്ങളും ഉണ്ട്. ആൺ മരത്തിൽ കായുണ്ടാകില്ല. വിത്ത് മുളച്ചുണ്ടാകുന്ന തൈകളിൽ പകുതിയിലേറെയും ആൺ വർഗ്ഗമായിരിക്കും. പെൺ മരങ്ങളാകട്ടെ കായ്ക്കുവാൻ പത്ത് – പന്ത്രണ്ട് വർഷങ്ങൾ എടുക്കും. ഒട്ടുതൈകൾ ഉപയോഗിച്ചാൽ ഇവ മൂന്ന് വർഷത്തിനുളളിൽ കായ്ച്ച് തുടങ്ങും.
വിത്ത് തൈകൾ തയ്യാറാക്കാനാണെങ്കിൽ നന്നായി കായ്ക്കുന്ന മരങ്ങളിൽ നിന്നും ശേഖരിച്ച വിത്തുകളുടെ മാംസളമായ ഭാഗങ്ങൾ കഴുകി കളഞ്ഞതിനു ശേഷം തണലിൽ മൂന്നാഴ്ചയോളം ഉണക്കണം. തുടർന്ന് വിത്തുകൾ മണ്ണ് നിറച്ച പോളിത്തീൻ ബാഗിലോ തയ്യാറാക്കിയ നഴ്സറിയിലോ നടാം. ഓഗസ്ത് – സപ്തംബർ മാസങ്ങളാണ് വിത്തിടാൻ അനുയോജ്യം. വിത്ത് മുളച്ച് പൊങ്ങാൻ അഞ്ച് – ആറ് മാസമെടുക്കും.
വിത്തിന്റെ പുറം തൊലി ഉള്ളിലെ പരിപ്പിന് യാതൊരു കേടും സംഭവിക്കാതെ വളരെ ശ്രദ്ധയോടെ
നീക്കം ചെയ്തതിനു ശേഷം നടുകയാണെങ്കിൽ വിത്ത് ഒരു മാസത്തിനകം മുളച്ച് പൊങ്ങും.
പരമാവധി വളർച്ചയെത്തിയ മരത്തിന് 20 മീറ്ററി ലധികം ഉയരവും 75 സെ.മീറ്റർ വരെ വ്യാസവും വയ്ക്കും.
ഒട്ടുതൈകൾ നട്ടാൽ ശാഖകൾ കോതി വലുപ്പം ക്രമീകരിച്ച് കുറച്ച് സ്ഥലം മാത്രം ഉപയോഗിച്ച് പരിപാലിക്കാൻ സാധിക്കും. കുടമ്പുളിയുടെ പൂവിടൽ കാലം ഡിസംബർ- മാർച്ച് മാസങ്ങളിലാണ്.
മഞ്ഞ കലർന്ന വെളളനിറമാണ് പൂക്കൾക്ക് . ആൺപൂക്കൾ പെൺപൂക്കളേക്കാൾ ചെറുതാണ്. വിളഞ്ഞു കഴിഞ്ഞാൽ കായ്കൾ മഞ്ഞ നിറത്തിലാകും. കായ്കൾക്ക് ആറ് സെ.മീറ്ററോളം വ്യാസമുണ്ട്. പുറത്ത് എട്ട് പത്ത് പൊഴി കാണും. ഉള്ളിൽ എട്ട് പത്തു വിത്തുകളുണ്ടാകും. മാംസളമായ തോട് ഉണക്കിയെടുക്കുന്നതാണ് വാണിജ്യപ്രാധാന്യമേറിയ കുടമ്പുളി .

ഇന്ന് നമ്മുടെ നാട്ടിൽ കണ്ടുവരുന്ന കുടമ്പുളിമരങ്ങളിലധികവും വിത്ത് മുളച്ച് വളർന്നു വന്നവയാണ്. ഇതേ കുടമ്പുളിയുടെ സഹോദരങ്ങളാണ് മാങ്കോസ്റ്റീനും പുണർപ്പുളിയും. ഈ വൃക്ഷത്തിന്റെ വ്യാവസായിക ഉപയോഗം പ്രചരിച്ചതോടെ എല്ലാവർക്കും പെട്ടെന്ന് വിളവെടുപ്പിന് തയ്യാറാകുന്ന ഇനം വേണമെന്നായി.
ഈ അവസരത്തിലാണ് കാർഷിക സർവ്വകലാശാലയുടെ കുമരകം പ്രാദേശിക കാർഷിക ഗവേഷണ കേന്ദ്രം ഇതിൽ ഒട്ടു സാങ്കേതിക വിദ്യ വികസിപ്പിച്ചത്. 2015 ൽ ഇവിടെ നിന്നും പുറത്തിറക്കിയ അത്യുൽപ്പാദന ശേഷിയുളള ഇനങ്ങളാണ് അമൃതയും ഹരിതയും. വർഷത്തിൽ
ശരാശരി 500 – 1000 കായ്കൾ ലഭിക്കുന്ന ഇവയിൽ നിന്നും 10 മുതൽ 16 കി.ഗ്രാം വരെ ഉണങ്ങിയ തോട് പ്രതീക്ഷിക്കാം. ഇതിൽ വ്യാവസായികാവശ്യത്തിനുളള ഹൈഡ്രോക്സി സിട്രിക് ആസിഡ് 16 – 19 ശതമാനം വരെ ഉണ്ട്.

രാസഘടന

കുടംപുളിക്ക് നേരിയ മധുരമുള്ള പുളിരസമാണ്. ഇതിൽ അടങ്ങിയിട്ടുള്ള വിവിധ തരം അമ്ലങ്ങളാണ് പുളിരസം നൽകുന്നത്. ഹൈഡ്രോക്സി സിട്രിക്ക് അമ്ലം (Hydroxy citric acid), മാലിക് അമ്ലം (Malic acid), ടാർടാറിക് അമ്ലം (Tartaric acid) എന്നിവയാണ് മുഖ്യമായവ. ഗാർസിനോൾ ( Garcinol) , ഐസോ ഗാർസിനോൾ (Isogarcinol) എന്നിവയാണ് മറ്റു രാസഘടകങ്ങൾ.

സംസ്ക്കരണം

പച്ചക്കായ്കൾ അഞ്ചു ദിവസത്തിൽ കൂടുതൽ വെച്ചിരുന്നാൽ കേടായിപ്പോകുമെന്നതിനാൽ അവ ഉണക്കി സൂക്ഷിക്കണം. കായ്കൾ രണ്ടായി മുറിച്ച് അരികൾ ഉൾക്കൊള്ളുന്ന മാംസളമായ ഭാഗം നീക്കുന്നു. 50-55 ശതമാനം വരുന്ന തോട് പഴങ്ങളിൽ നിന്ന് ഊറി വരുന്ന ചാറിൽ മുക്കി പല തവണ ഉണക്കുന്നു. ഉപ്പു ചേർത്തും ചേർക്കാതെയും കുടമ്പുളി ഉണക്കി എടുക്കുന്നു.

ഔഷധ – വാണിജ്യപ്രാധാന്യം

കുടംപുളി ഔഷധമായും ആഹാരമായും പ്രാചീന കാലം മുതൽക്കേ ഉപയോഗിച്ചു വരുന്നു.
കായ്കളിൽ നിന്നും ലഭിക്കുന്ന കോക്കം ബട്ടർ അമൂല്യ ഉൽപ്പന്നമാണ്. വളരെയേറെ പോഷക പ്രധാനമാണിത്. ഒരു ശമനൗഷധവും കൂടിയാണ്. വേദനക്ക് ആശ്വാസം പകരുന്നു. മുറിവുകൾ ഉണക്കാനും ഉത്തമമാണിത്. ചോക്ലേറ്റും മറ്റു ബേക്കറി ഉൽപ്പന്നങ്ങൾ ഉണ്ടാക്കാനും ഉപയോഗിക്കാറുണ്ട്.
മലബന്ധം, ഹൃദ്‌രോഗം, അജീർണം, വാത രോഗം, വായുക്ഷോഭം എന്നിവ അകറ്റുന്ന ഒരു സിദ്ധൗഷധവും കൂടിയാണ് കുടമ്പുളി . അലർജി, പൊളളൽ തുടങ്ങിയവക്കും ഫലപ്രദമായ മരുന്നാണ്.
തളിരില , വിത്ത്, വേരിന്റെ തൊലി എന്നിവയും ഔഷധാവശ്യങ്ങൾക്കായി ഉപയോഗിക്കാറുണ്ട്.
2012 ൽ അമേരിക്കൻ ഡോക്ടരായ ഓസ് ആണ് ഈ പഴത്തിന്റെ സത്തിൽ ശരീര ഭാരം കുറക്കാനുള്ള ഘടകങ്ങൾ ഉണ്ടെന്ന് ആദ്യമായി കണ്ടുപിടിച്ചത്. ശരീരത്തിലെ എനർജി വർദ്ധിപ്പിക്കുവാനും , വിഷാംശത്തെ പുറന്തള്ളാനും ഹൃദയ സംബന്ധമായതും ദഹന സംബന്ധമായതുമായ ആരോഗ്യത്തെ പ്രോത്സാഹിപ്പിക്കുവാനും ഇവക്ക് കഴിവുണ്ടെന്ന് ഗവേഷണങ്ങളിലൂടെ കണ്ടെത്തിയത് .
ശരീരഭാരം കുറക്കുന്നതിനുളള ഫൈറ്റോ കെമിക്കലായ ഹൈഡ്രോ സിട്രിക്കാസിഡ്‌ (HCA ) ഉയർന്ന അളവിൽ ഈ ഫലത്തിൽ അടങ്ങിയിട്ടുണ്ട്.