എം.കെ.പി. മാവിലായി
__________
നമ്മുടെ കാടുകളെല്ലാം ഔഷധ സസ്യങ്ങളുടെ വൻ ശേഖരങ്ങളായിരുന്നു. നിരന്തരമായ ഔഷധ സസ്യങ്ങളുടെ ശേഖരണം കാലക്രമേണ ഈ അമൂല്യ സമ്പത്തിനെ നിർമ്മാർജ്ജനം ചെയ്യുന്ന സ്ഥിതിയിലേക്ക് എത്തിച്ചിരിക്കുന്നു. വൻതോതിൽ മരുന്നുൽപ്പാദിപ്പിക്കുന്ന അനേകം ഫാക്ടറികൾ ഇന്ന് ആയുർവേദ രംഗത്ത് പ്രവർത്തിച്ചു കൊണ്ടിരിക്കുന്നു. പ്രകൃതിയിൽ നിന്നും സ്വമേധയാ ലഭിക്കുന്ന മരുന്നു ചെടികളെ മാത്രം ആശ്രയിച്ച് വർധിച്ചു വരുന്ന ആവശ്യങ്ങൾ നിർവ്വഹിക്കുവാൻ ഇന്ന് സാധ്യമല്ല തന്നെ. ഇത്തരുണത്തിൽ ഔഷധസസ്യകൃഷി വ്യാപിപ്പിക്കുന്നതിനുള്ള പ്രവർത്തനങ്ങൾ പല വിധേനയും ആരംഭിച്ചിട്ടുണ്ട്. ഇപ്രകാരം കൃഷിക്കൊരുങ്ങുമ്പോൾ മികച്ച നടീൽ വസ്തുക്കൾ തന്നെ തിരെഞ്ഞെടുക്കാൻ ശ്രദ്ധിക്കണം. ഔഷധച്ചെടികളിൽ അത്യുൽപ്പാദന ശേഷിയുള്ള ഏതാനും ഇനങ്ങൾ കേരള കാർഷിക സർവ്വകലാശാല വികസിപ്പിച്ചെടുത്തിട്ടുണ്ട്. അവയിൽ ഏതാനു ഇനങ്ങൾ പരിചയെപ്പെടാം.
കച്ചോലം
കച്ചോലത്തിെന്റെ പ്രകന്ദങ്ങളാണ് നടീൽ വസ്തു. ഇന്ന് പ്രചാരത്തിലുള്ള ഇനങ്ങളിൽ ഏറ്റവും വിളപ്പൊലിമ കാണിക്കുന്നത് രജനി, കസ്തൂരി എന്നീ ഇനങ്ങളാണ്. ഇവ നട്ട് ഏഴ് – എട്ട് മാസങ്ങൾ കൊണ്ട് വിളവെടുപ്പിനാകും. ഒരു ഹെക്ടടറിൽ നിന്നും കസ്തൂരി ഇനത്തിൽ നിന്നും 2.27 ടണും , രജനി ഇനത്തിൽ നിന്നും 2.19 ടണും ഉണങ്ങിയ കച്ചോലം ലഭിക്കും. കസ്തൂരിയുടെ കിഴങ്ങ് ഇളം തവിട്ട് നിറത്തിലും, രജനിയുടത് ക്രീം നിറത്തിലുമാണ്. ഭാഗികമായ തണലിലും ഇവ കൃഷി ചെയ്യാം.
അടപതിയൻ
വിത്ത് മുളപ്പിച്ച് തൈകളാക്കിയും , വള്ളികൾ മുറിച്ചു നട്ടും, വേരുകൾ ഉപയോഗിച്ചും അടപതിയൻ കൃഷി ചെയ്യാം. വിത്ത് വെള്ളത്തിൽ കുതിർത്ത ശേഷം മണലിൽ പാകി തൈകളാക്കാം. വളളികൾ ഒന്നോ രണ്ടോ മുട്ടുകളുള്ള കഷണങ്ങളാക്കി വേര് പിടിപ്പിക്കാം. വേരുകൾ രണ്ടിഞ്ച് വലിപ്പമുള്ള കഷണങ്ങളാക്കി നടാം. അടപതിയനിൽ ഏറ്റവും കൂടുതൽ ഉൽപ്പാദന ക്ഷമത കാണിക്കുന്നത് ജീവ എന്ന
നമാണ്. ഇത് നട്ട് ഒന്നര വർഷം കൊണ്ട് വിളവെടുപ്പിന്നാവും. ഒരു ഹെക്ടർ കൃഷിയിൽ നിന്നും 4.51 ടൺ പച്ച വേര് ലഭിക്കും. ഇത് ഉണക്കിയെടുത്താൽ ഒന്നര ടൺ ലഭിക്കും. വേരുകൾക്ക് വണ്ണവും ഗുണവും കൂടുതലാണ്. ഭാഗിക തണലിലും നന്നായി വളരും
ചിറ്റാടലാടകം
ഇളം തലപ്പുകളാണ് ഇതിന്റെ നടീൽ വസ്തു . ഏകദേശം 20 സെ.മീറ്റർ നീളത്തിൽ കഷണങ്ങളാക്കി നടാം. അജഗന്ധി, വാസിക എന്നിവയാണ് ഇതിലെ ഉൽപ്പാദന ക്ഷമത കൂടിയ ഇനങ്ങൾ. ഇവ നട്ട് രണ്ട് വർഷത്തിന്നകം വിളവെടുപ്പ് നടത്താം. അജഗന്ധിയുടെ ഇലകൾക്ക് വലിപ്പം താരതമ്യേന കൂടുതലാണ്. ഒരു ഹെക്ടറിൽ നിന്നും ചെടി സമൂലം പച്ചയായി 39.78 ടണും , ഉണക്കിയാൽ ഇത് 12.37 ടണും ലഭിക്കും. വേരുകൾക്ക് അനുയോജ്യമായത് വസികയാണ്. ഒരു ഹെക്ടറിന് ചെടി സമൂലം പച്ചയായി 34.72 ടണും, ഉണക്കിയത് 11.25 ടണും ലഭിക്കും. ഈ രണ്ടിനങ്ങളും ഇടവിളയായും, തനി വിളയായും കൃഷി ചെയ്യാം
തിപ്പല്ലി
വള്ളികൾ മൂന്നു മുതൽ അഞ്ചു വരെ മുട്ടുകളുള്ള കഷണങ്ങളാക്കി നടാം. നാടൻ ഇനങ്ങളേക്കാൾ വിശ്വം എന്നയിനത്തിന് മികച്ച വിളവുൽപ്പാദന ശേഷിയുണ്ട്. കട്ടികൂടിയ ബലമുള്ള തിരികൾ ഇതിന്റെ പ്രത്യേകതയാണ്. ദീർഘകാലം വിള നൽകുന്നുമുണ്ട്. ഒരു ഹെക്ടറിൽ നിന്നും 433.3 കി.ഗാം ഉണക്ക തിപ്പല്ലി ലഭിക്കും. തെങ്ങിൻ തോപ്പുകളിൽ ഇടവിളയായും കൃഷി ചെയ്യാം.
ചെത്തിക്കൊടുവേലി
ഇടത്തരം മൂപ്പുളളതണ്ടുകളാണ് വംശവർധനവിനായി ഉപയോഗിക്കുന്നത്. രണ്ടോ മൂന്നോ മുട്ടുകളുള കഷണങ്ങളാക്കി നടാം. മൃദുല , അഗ്നി എന്നിവയാണ് ഇതിെലെ അത്യുൽപ്പാദന ശേഷിയുളള ഇനങ്ങൾ. ഇവ രണ്ടും നട്ട് ഒന്നര വർഷം കൊണ്ട് വിളവെടുപ്പിനാകും. വണ്ണം കുറഞ്ഞ് നീളം കൂടിയ വേരുകളാണ് മൃദുലക്ക്. ഒരു ഹെക്ടറിന് പച്ച വേര് 9.93 ടൺ ലഭിക്കും. ഇത് ഉണക്കിയാൽ 2.94 ടൺ ലഭിക്കും. അഗ്നി ഇനത്തിന് അൽപ്പം കട്ടികൂടി നീളം കുറഞ്ഞ വേരുകളാണ്. ഒരു ഹെക്ടറിൽ നിന്നും 8.6 ടൺ പച്ച വേര് ലഭിക്കും. ഇതുണക്കിയാൽ 2.65 ടൺ ലഭിക്കും. ഭാഗിക സൂര്യപ്രകാശത്തിലും ഈ രണ്ടിനങ്ങളും നന്നായി വളരും
