ആന്തൂറിയം സങ്കര തൈകൾ തയ്യാറാക്കാം

നമ്മുടെ പുഷ്പ സങ്കൽപ്പത്തിന് പുതിയ രൂപവും ഭാവവും പകർന്നുകൊണ്ടാണ് ആന്തൂറിയം നമ്മുടെ മനസ്സിലും മണ്ണിലും കടന്നുവരുന്നത്.

തണ്ടു മുറിച്ചും ചുവട്ടിൽ നിന്ന് മുളച്ച് വരുന്ന പുതിയ മുകുളങ്ങൾ ഉപയോഗിച്ചും വിത്തുമുളപ്പിച്ചുമാണ് പുതിയ ചെടികൾ ഉൽപ്പാദിപ്പിക്കുന്നത്. വ്യാവസായികാടിസ്ഥാനത്തിൽ ടിഷ്യൂ കൾച്ചർ വഴിയും ചെടികൾ ഉൽപ്പാദിപ്പിക്കുന്നുണ്ട്.
പൂക്കളിൽ കൃത്രിമ പരാഗണം നടത്തി ഒരിനം ചെടിയിൽ നിന്നും വ്യത്യസ്ഥ നിറങ്ങളോടു കൂടിയ നിരവധി ചെടികൾ നമുക്ക് സ്വന്തമായി ഉരുത്തിരിച്ചെടുക്കാനാവും. വലിയ സാങ്കേതിക ജ്ഞാനമൊന്നും ഇതിന്നാവശ്യമില്ല.
ആന്തൂറിയത്തിൽ അപൂർവ്വമായേ വിത്തുകൾ ഉണ്ടാവാറുള്ളൂ. ആൺ പൂക്കളും പെൺപൂക്കളും വ്യത്യസ്ഥ കാലങ്ങളിൽ വിരിയുന്നത് കൊണ്ടാണിത്. എന്നാൽ ഒരു ചെടിയിലെ പെൺപൂക്കളിൽ യഥാസമയം തെരഞ്ഞെടുത്ത മറ്റൊരു ചെടിയിലെ പരാഗം പതിപ്പിക്കുകയാണെങ്കിൽ പരാഗണം നടന്ന് ധാരാളം വിത്തുകളുണ്ടാകും. ആന്തൂറിയത്തിന്റെ തിരികൾ വിരിഞ്ഞ് ആറു മുതൽ എട്ടു ദിവസം കൊണ്ട് പെൺപൂക്കൾ പരാഗണത്തിന് പ്രാപ്തമായിരിക്കും. ഇത് പെട്ടെന്ന് തിരിച്ചറിയാം. ഈ സമയത്ത് പെൺപൂക്കളിൽ പശയുളള ദ്രാവകം പറ്റിയിരിക്കുന്നതായി കാണാം. ഇതേ പൂത്തണ്ടിലെ ആൺപൂക്കൾ വിരിയുന്നത് പെൺപൂക്കളുടെ പരാഗണത്തിനുള്ള സമയം കഴിഞ്ഞിട്ടാണ്. അതായത് എട്ട് ദിവസങ്ങൾക്ക് ശേഷം. കൃത്രിമപരാഗണം നടത്തേണ്ടത് പെൺപൂക്കൾ പരാഗണത്തിന് സന്നദ്ധമായിട്ടുള്ള സമയത്ത് തന്നെയാവാൻ ശ്രദ്ധിക്കണം. ഈ സമയത്ത് പരാഗണം നടത്തേണ്ട പൂക്കളിൽ നിന്ന് വ്യത്യസ്ഥമായ ഒരു കളർ ഉള്ള ചെടിയിൽ നിന്ന് പൂക്കളിലെ പരാഗം അഥവാ പൂമ്പൊടി നനഞ്ഞ ബ്രഷ് കൊണ്ടോ കൈവിരൽ കൊണ്ടോ പെൺപൂവിലേക്ക് പുരട്ടി കൊടുക്കണം. പരാഗണ പ്രക്രിയ കഴിഞ്ഞ് ആറു മാസത്തിന്നകം കുരുമുളക് മണി പോലുളള വിത്തുകൾ തിരിയിൽ നിന്നും പുറത്തേക്ക് തളളി വരുന്നത് കാണാം. നിരവധി വിത്തുകൾ ഒരു തിരിയിൽ ഉണ്ടാകാം.

കുരുമുളക് മണിയുടെ വലുപ്പത്തിൽ കാണുന്ന കായ്കൾ മെല്ലെ അടർത്തിയെടുത്ത് അവയിലെ മാംസളമായ ഭാഗം അഥവാ പൾപ്പ് ഞെക്കിക്കളഞ്ഞ് കഴുകി വിത്ത് വൃത്തിയാക്കണം. ഇവ കാലതാമസം കൂടാതെ പാകണം. പരന്ന ചട്ടിയിലോ പ്ലാസ്റ്റിക്ക് ട്രേയിലോ കഴുകി വൃത്തിയാക്കി ഉണക്കിയ മണൽ നിരത്തി ചെറുതായി നനച്ചശേഷം മണലിൽ ചെറിയ ഈർക്കിലോ കമ്പോ ഉപയോഗിച്ച് ഉപരിഭാഗത്ത് ചെറിയ ദ്വാരങ്ങൾ ഉണ്ടാക്കി വിത്ത് അതിൽ നടാം. മണലിന് പകരം നനച്ച പഞ്ഞി നിരത്തിയും വിത്തുകൾ നടാം. മണലോ പഞ്ഞിയോ ഏതായാലും അവ ഉണങ്ങിപ്പോകാത്ത വിധം നേരിയ നന നൽകണം. ഒരു പരന്ന ഗ്ലാസ് കഷണമോ, പോളിത്തീൻ ഷീറ്റോ ഉപയോഗിച്ച് ട്രേയോ ചട്ടിയോ മൂടിവെക്കുന്നത് നല്ലതാണ്. ഈ പാത്രങ്ങൾ തണലിൽ വെക്കണം. ഇത്തരത്തിൽ വിത്ത് പാകിയാൽ എട്ട് പത്ത് ദിവസത്തിനകം മുളയ്ക്കുന്നതാണ്. മുള വരുന്നതോടെ മൂടിവെച്ച ഷീറ്റോ, ഗ്ലാസോ മാറ്റണം. വിത്തിൽ നിന്ന് മുളവന്ന ചെടികളുടെ ത്വരിതഗതിയിലുള്ള വളർച്ചക്ക് നേരിയ തോതിൽ വളം നൽകാവുന്നതാണ്. വിത്ത് മുളച്ച് രണ്ട് ഇല വന്ന ശേഷമാണ് വളപ്രയോഗം നടത്തേണ്ടത്. അഞ്ചുലിറ്റർ വെളളത്തിൽ ഒരു ഗ്രാം എന്ന നിലയിൽ വെള്ളത്തിൽ അലിയുന്ന 19:19:19 എന്ന വളം ചേർത്ത് ആവശ്യത്തിന് ലായനി തയ്യാറാക്കാം.

ചെടിയുടെ വളർച്ചയുടെ നിരക്കനുസരിച്ച് വളത്തിന്റെ തോത് കൂട്ടുകയും നൽകുന്നതിന്റെ
കാലദൈർഘ്യം കുറയ്ക്കുകയും ചെയ്യാം. കുമിൾ രോഗങ്ങൾ വരാതിരിക്കാൻ ഏതെങ്കിലും കുമിൾനാശിനി തളിക്കാം. ആറുമാസം പ്രായമെത്തിയാൽ ചെടികളെ ചെറിയ ചട്ടികളിലോ പോളിത്തീൻ ബാഗിലോ മാറ്റി നടാം.
ഇപ്രകാരം വിത്തുൽപ്പാദിപ്പിച്ച് കിളിർത്തുവരുന്ന തൈകളിൽ മിക്കതും നാം തെരഞ്ഞെടുത്ത ആൺ-പെൺ ചെടികളിൽ നിന്നും വ്യത്യസ്ഥതയുളള പൂക്കളാകും ഉണ്ടാവുക.
__________
എംകെപി മാവിലായി.