ലോക പരിസ്ഥിതി ദിനത്തിന്റെ ഭാഗമായി വ്യക്തികളും സംഘടനകളും സ്ഥാപനങ്ങളുമെല്ലാം വൃക്ഷ തൈകൾ ആവുന്നിടത്തെല്ലാം വെച്ചു പിടിപ്പിക്കാറുണ്ട്. എന്നാൽ അവയിൽ നല്ലൊരു ഭാഗവും പിന്നീട് നശിച്ചു പോകുന്നതായിട്ടാണനുഭവം.
പൊതുവെ എല്ലാവരും സാമാന്യം വലിപ്പമുളള കുഴികളെടുത്ത് അതിലാണ് തൈകൾ വെക്കുന്നത്. നമ്മുടെ പരിസ്ഥിതി ദിനം വരുന്നത് ജൂൺ 5 കാലവർഷം ശക്തിപ്പെടുന്ന സമയത്താണ്.
അപ്പോൾ സ്വാഭാവികമായും തുടർന്ന് ലഭിക്കുന്ന മഴയിൽ നട്ട കുഴികളിലെല്ലാം വെളളം കെട്ടി നില്ക്കും. ദിവസങ്ങളോളം കെട്ടി നിൽക്കുന്ന വെളളത്തെ അതിജീവിക്കാനാവാതെ നട്ട തൈകളിൽ ഒട്ടു മിക്കതും നശിച്ചു പോയേക്കും.
ഏത് തരം തൈകൾ നടാനും സാമാന്യം വലിപ്പമുളള കുഴികൾ എടുക്കുന്നത് നല്ലതാണ്. വിദഗ്ദർ ശുപാർശ ചെയ്യുന്നതും നടുന്ന തൈകൾ അനുസരിച്ച് പ്രാരംഭമായി കുഴികൾ എടുക്കാൻ തന്നെയാണ്. എന്നാൽ അവ മൂടിയ ശേഷമാണ് തൈകൾ നടാൻ നിർദ്ദേശിക്കുന്നത്. ഇങ്ങിനെ ചെയ്യുന്നത് കൊണ്ട് നട്ട തൈകൾക്ക് ചുറ്റും മണ്ണിളക്കമുണ്ടാകും, ചുറ്റിലുമുളള കളകളെ നീക്കം ചെയ്യാനാകും , ശൈശവത്തിൽ വളർച്ചക്കാവശ്യമായ പോഷകങ്ങൾ ലഭ്യമാക്കാനും ആകും എന്ന കാരണത്താലാണ്. മേൽമണ്ണ് ഏതെങ്കിലും ജൈവ വളവുമായി ചേർത്താണ് എടുത്ത കുഴി പൂർണ്ണമായും മൂടാൻ പറയുന്നത്. മൂടി കഴിഞ്ഞ കുഴിയിലെ മണ്ണ് നിലനിരപ്പിനേക്കാളും അൽപ്പം ഉയരത്തിലായാലും കുഴപ്പമില്ല.
പോളിത്തീൻ ബാഗിലോ മറ്റോ വളർത്തിയെടുത്ത തൈകളാണെങ്കിൽ ബാഗിലെ മണ്ണ് നിലനിർത്തി ബാഗ് മാത്രം നീക്കം ചെയ്യണം. ബാഗിൽ എത്ര ആഴത്തിലായിരുന്നുവോ ചെടി ഉണ്ടായിരുന്നത് അതേ ആഴത്തിൽ തന്നെ തയ്യാറാക്കി വെച്ച സ്ഥലത്ത് ആവശ്യത്തിന് മണ്ണ് നീക്കി ചെടി നടണം. ചുറ്റുമുള്ള മണ്ണ് നന്നായി ചവിട്ടി ഉറപ്പിക്കണം. നട്ട ചെടിക്ക് ചുറ്റും വെളളം കെട്ടി നില്ക്കില്ലെന്ന് ഉറപ്പു വരുത്തണം.
പരിമിതമായ സ്ഥലത്ത് പഴവർഗ്ഗങ്ങളുടേയും മറ്റും ഒട്ടുതൈകൾ നടാനാണ് എല്ലാവർക്കും താൽപ്പര്യം. നേരത്തെ ഫലം തരുമെന്നതും അധികം ഉയരത്തിലല്ലാത്തെ വളർന്നു പന്തലിക്കുമെന്നതും ഒട്ടു ചെടികളുടെ പ്രത്യേകതയാണ്.
ഒട്ടുതൈകൾ നടുമ്പോൾ ഒട്ടിച്ച ഭാഗം മണ്ണിന് മുകളിലാകാൻ ശ്രദ്ധിക്കണം. ഒട്ടിച്ച ഭാഗത്തിന്റെ താഴെ നിന്നും വരുന്ന മുകുളങ്ങൾ വളരാനനുവദിക്കാതെ അപ്പപ്പോൾ നീക്കം ചെയ്യണം. നട്ട തൈകൾക്ക് സമീപം ഒരു വടി നാട്ടി ചെടിയെ അതുമായി ചേർത്ത് കെട്ടണം.
വേനൽക്കാലമാകുന്നതോടെ ചെടിക്ക് ചുറ്റും ഉണങ്ങിയ ഇലകൾ പുതയിട്ട് ഈർപ്പ സംരക്ഷണം നൽകുന്നത് ഗുണകരമാകും. തണൽ ആവശ്യമായ വിളകൾക്ക് നിർബ്ബന്ധമായും വേനൽ മാസങ്ങളിൽ തണൽ നൽകാനും ശ്രദ്ധിക്കണം. (ജാതി, കൊക്കോ, ഗ്രാമ്പൂ എന്നിവക്ക് തണൽ നിർബ്ബന്ധം ) നട്ട തൈകൾക്ക് ചുറ്റും മഴക്കാലത്ത് വെളളം കെട്ടി നില്ക്കുന്നില്ലെന്ന് ഉറപ്പ് വരുത്തുക, വേനലിൽ ആവശ്യത്തിന് തണൽ നൽകുക, കഴിയുമെങ്കിൽ ജല സേചനം നൽകുക, ചുറ്റുമുളള കളകളെ നീക്കം ചെയ്യുക , നട്ട ചെടികളിൽ ഏതെങ്കിലും വളളിച്ചെടികൾ പടർന്നു കയറുന്നുണ്ടെങ്കിൽ അവ നീക്കം ചെയ്യുക എന്നിവ ചെടികൾ നട്ടശേഷം ആദ്യവർഷങ്ങളിൽ പ്രത്യേകം ശ്രദ്ധിക്കേണ്ട പരിപാലന പ്രവർത്തനങ്ങളാണ്.ഒട്ടു ചെടികളുടെ വളർച്ച തൃപ്തികരമായ ശേഷം മാത്രം അവയെ കായ്ക്കാൻ അനുവദിക്കുന്നതാണ് ആരോഗ്യകരം. നേരത്തെയുണ്ടാവുന്ന പുക്കൾ നീക്കം ചെയ്യാം.
ശോഷിച്ചു വള രുന്നതും ഉണങ്ങിയതുമായ സസ്യഭാഗങ്ങൾ ഇടക്കിടെ മുറിച്ചു മാറ്റുന്നത് ചെടികളുടെ ആരോഗ്യകരമായ വളർച്ചക്ക് ഉപകരിക്കും.
M.K PAVITHRAN
(MKP MAVILAYI)
PO.MAVILAYI
KANNOOR DIST.
Mob.9446088605
Comments are closed.