ഔഷധ ഗുണത്തിന്റെ കാര്യത്തിലും ചതുരപ്പുളി മുന്നിൽ

ഫലത്തിന്റെ രൂപ സവിശേഷതയാണ് ചതുരപ്പുളിക്ക് ഇത്തരമൊരു പേര് ലഭിക്കാൻ കാരണം. മടക്കുകളായി കാണുന്ന ഈ ഫലം മുറിച്ചാൽ നക്ഷത്രാകൃതിയിലുള്ള കഷണങ്ങളാണ് ലഭിക്കുക.
ഉഷ്ണമേഖലാ മിതോഷ്ണമേഖലാപ്രദേശങ്ങളിൽ കാണപ്പെടുന്ന പ്രധാന ഫലവർഗ്ഗ വിളയാണിത്. ഓക്സാലിഡേസിയേ (Oxalidaceae) കുടുംബത്തിൽപ്പെട്ട ഈ ചെടിയുടെ ശാസ്ത്രനാമം അവരോവ കാരംബോള ( Averrhoa Carambola) എന്നാണ്.
ചെടിയുടെ ജന്മദേശം ഇന്തോനേഷ്യയാണ്. കേരളത്തിലെ സമതലപ്രദേശങ്ങളിലെ കാലാവസ്ഥയിൽ നന്നായി വളരുകയും കായ്ക്കുകയും ചെയ്യുന്നു.
ചതുരപ്പുളിയുടെ പ്രജനനം പ്രധാനമായും വിത്ത് വഴിയാണ്. എന്നാൽ കായിക പ്രവർധന രീതികളായ പതിവെക്കൽ, ഒട്ടിക്കൽ രീതിയിലും തൈകൾ ഉൽപ്പാദിപ്പിക്കാം. ശരിയായ സംരക്ഷണമേറ്റ് വളരുകയാണെങ്കിൽ വിത്ത് തൈകൾ നട്ട് അഞ്ച് – ആറ് വർഷത്തിന്നകം ഫലം ഉൽപ്പാദിപ്പിക്കും. ഒരു ഫലത്തിൽ ധാരാളം വിത്തുകൾ കാണപ്പെടുന്നതിനാലും വിത്തുകൾ എളുപ്പത്തിൽ ശേഖരിക്കുവാൻ കഴിയുന്നതിനാലും വിത്ത് തൈകൾ ഉൽപ്പാദിപ്പിക്കുകയാണ് എളുപ്പം. വിത്തുകൾ ശേഖരിച്ച് നന്നായി കഴുകി മാംസളമായ ഭാഗം നീക്കം ചെയ്തു അധികം ഉണങ്ങാൻ അനുവദിക്കാതെ നനവാർന്ന മണലിലോ മണ്ണിലോ ഇട്ടാൽ ഏകദേശം ഒരാഴ്ച കൊണ്ട് കിളിർത്ത് തുടങ്ങും. രണ്ടാഴ്ചക്ക് ശേഷം ഇവ പോളിത്തീൻ കവറിൽ വളർത്തിയെടുക്കാവുന്നതാണ്. തുടർന്ന് മൂന്ന് മാസം കൊണ്ട് സ്ഥിരമായ സ്ഥലത്തേക്ക് മാറ്റിനടാം.
ഒട്ടുതൈകളാണെങ്കിൽ നട്ട് മൂന്ന് വർഷത്തിനുളളിൽ കായ്ക്കും. ചെറിയ തണ്ടുകളും ഏറെ ശാഖകളും ഇവയ്ക്കുണ്ടാകും. ആറ് മുതൽ ഒമ്പത് മീറ്റർ വരെ ഉയരത്തിൽ വളരുന്ന ഇവയുടെ തായ്ത്തടി വെള്ളനിറത്തിലോ ചാരനിറത്തിലോ ആയിരിക്കും.ചുവന്ന നിറത്തിൽ ഞെട്ടുകളോട് കൂടിയ പൂക്കൾ തണ്ടുകളുടെ അഗ്രഭാഗത്തും ഇലകളുടെ മുട്ടുകളിലുമാണ് ഉണ്ടാകുക. പൂക്കൾക്ക് പർപ്പിൾ നിറമാണ്.
ഇന്ത്യയിൽ പൊതുവെ സെപ്തംബർ-ഒക്ടോബർ മാസങ്ങളിലാണ് ചതുരപ്പുളി വിളവെടുക്കുന്നത്. പിന്നീട് ഡിസംബർ – ജനുവരി മാസങ്ങളാകുമ്പോഴേക്കും ഒരു തവണ കൂടി വിളവെടുക്കാൻ സാധിക്കും. നല്ല വളർച്ചയുള്ള വൃക്ഷത്തിൽ നിന്നും ശരാശരി 500 കി.ഗ്രാം പഴങ്ങൾ ലഭിക്കും. വിളവെടുത്ത പഴങ്ങൾ ശീതീകരണിയിൽ സൂക്ഷിച്ചാൽ മൂന്നാഴ്ചയോളം കേടാകാതെയിരിക്കും.
ചതുരപ്പുളിയുടെ കായ്കൾ വളരെയേറെ ഭക്ഷ്യയോഗ്യമാണ്. ചിലയിടങ്ങളിൽ കറികളിൽ പുളിക്ക് പകരമായി ഇവ ചേർക്കാറുണ്ട്. കൂടാതെ അച്ചാറിനും ചട്നിക്കും സലാഡിനും , ജാമിനു വേണ്ടിയും ഇവ ഉപയോഗിക്കുന്നു.

പോഷക ഗുണം
നന്നായി പഴുത്ത ഫലത്തിന് പുളിയും മധുരവും ഇടകലർന്ന രുചിയാണ്. ഇത് അതേപടി ഭക്ഷ്യയോഗ്യമാണ്. ഇത് കറികളിൽ നേരിട്ട് ചേർക്കാം.
50 ശതമാനത്തിലധികം നീരടങ്ങിയിട്ടുള്ള ഈ ഫലത്തിൽ 0.75 ശതമാനം അമ്ലങ്ങൾ ഉണ്ട്. 100 ഗ്രാം ഫലത്തിൽ 12-5 ഗ്രാം വിറ്റാമിൻ സിയും ഓക്സാലിക് അമ്ല (Oxalic acid) വും ഉണ്ട്.
ഫലത്തിൽ നാല് ശതമാനത്തോളം അടങ്ങിയിരിക്കുന്ന ഗ്ലൂക്കോസ് . ഫ്രാക്ടോസ് തുടങ്ങിയ പഞ്ചസാരകളാണ് മധുരരസം നൽകുന്നത്.
ധാതുലവണങ്ങളായ പൊട്ടാസ്യം, കാൽസ്യം, ഫോസ്ഫറസ്, കോപ്പർ എന്നിവയും കാണപ്പെടുന്നു.

ഔഷധ ഗുണം

ഔഷധ ഗുണത്തിന്റെ കാര്യത്തിലും ചതുരപ്പുളി മുന്നിൽ തന്നെ. കരളിനെ സംരക്ഷിക്കുവാനുളള ഇതിന്റെ കഴിവ് ശാസ്ത്രീയമായി തെളിയിക്കപ്പെട്ടിട്ടുണ്ട്.
വടക്ക് കിഴക്കൻ സംസ്ഥാനങ്ങളിൽ മഞ്ഞപിത്ത രോഗ ചികിത്സക്കായി ഇവ ഉപയോഗിക്കപ്പെടുന്നു. ചില പാരമ്പര്യ രോഗങ്ങൾക്കെതിരേയും ത്വക്കിലുണ്ടാകുന്ന ചില അസുഖങ്ങളുടെ നിവാരണത്തിനും ഇത് വളരെയേറെ ഫലപ്രദമാണ്.
ഇതിന്റെ ഫലം , ഇലകൾ ചേർത്തുണ്ടാക്കുന്ന കഷായം ഛർദ്ദി ശമിപ്പിക്കാൻ ഉത്തമമാണ്. മാത്രമല്ല ചിക്കൻ പോക്സ്, വിരകൾ എന്നിവ മൂലമുണ്ടാകുന്ന പ്രണങ്ങൾക്ക് ഇതിന്റെ ഇലകൾ ലേപനമായി ഉപയോഗിക്കാറുണ്ട്.
ഔഷധമെന്ന നിലയിൽ ഇവ ഉപയോഗിക്കുമ്പോൾ വൈദ്യോപദേശം തേടേണ്ടതാണ്.

സംസ്ക്കരണം

നന്നായി മൂത്ത ചതുരപ്പുളിയുടെ മാംസളമായ കാമ്പ് അരച്ചെടുത്ത് പൾപ്പാക്കി ഇതിൽ തുല്യ അളവിൽ പഞ്ചസാരയും ചേർത്ത് ജാം തയ്യാറാക്കാം. ജാം കൂടുതൽ നാൾ കേടാകാതിരിക്കുവാൻ സിട്രിക്ക് ആസിഡും ചേർക്കാവുന്നതാണ്.
പഴത്തിന്റെ പൾപ്പ് നേർത്ത തുണിയിൽ കെട്ടി പിഴിഞ്ഞെടുത്ത ചാറ് ഉപയോഗിച്ച് സ്ക്വാഷ് തയ്യാറാക്കാം.
വിലുമ്പി ക്കായ മുറിക്കാതെ ഉപ്പിലിട്ട് അതിന്റെ നീര് 20 മില്ലി എടുത്ത് നേർപ്പിച്ച് ദിവസവും കഴിക്കുന്നത് കൊഴുപ്പ് കുറക്കാൻ സഹായിക്കും.

എംകെപി മാവിലായി