വിത്ത് മുളക്കാനും , വിളകളുടെ വളർച്ച ത്വരിതപ്പെടുത്താനും , പുഷ്പ്പിക്കാനും , ഗുണമേന്മയുള്ള കായ്ഫലം കിട്ടാനും സഹായിക്കുന്ന ഒരു കൂട്ടം സൂക്ഷ്മജീവികളുടെ ഒരു മിശ്രിതത്തിന് ഇപ്പോൾ ജൈവകർഷകർക്കിടയിൽ പ്രീയമേറി വരുന്നുണ്ട്.
കാര്യക്ഷമതയുള്ള സൂക്ഷ്മാണുക്കൾ ( ഇ.എം) എന്നറിയപ്പെടുന്ന ഇവ ജൈവസ്തുക്കളുടെയും കാർഷിക അവശിഷ്ടങ്ങളുടെയും വിഘടനം ത്വരിതപ്പെടുത്തുകയും , മണ്ണിലെ തദ്ദേശീയരായ ഉപകാരികളായ സൂക്ഷ്മജീവികളുടെ പ്രവർത്തനം ഊർജ്ജിതമാക്കുകയും ചെയ്യുന്നു. പ്രകാശസംശ്ലേഷണ ബാക്ടീരിയ , ലാക്ടിക് ആസിഡ് ബാക്ടീരിയ , യീസ്റ്റ് , ആക്ടിനോമൈസൈറ്റുകൾ , കിണ്വന കുമിളുകൾ എന്നിവയുടെ ഒരു മിശിതമാണ് ഇത്.
നമ്മുടെ സ്വാഭാവിക ചുറ്റുപാടുകളിൽ കാണുന്ന പ്രയോജനപ്രദമായ ഇത്തരം സൂക്ഷ്മജീവികളെ അനുകൂല സഹചര്യമുണ്ടാക്കി എണ്ണം പെരുപ്പിച്ച് കൃഷിയിടങ്ങളിലെത്തിക്കുകയാണ് ഇവിടെ ചെയ്യുന്നതു്. ഇത് മണ്ണിലൂടെയും വെള്ളത്തിലൂടെയും ജൈവവളങ്ങളിലൂടെയും വിളകൾക്ക് ലഭ്യമാക്കിയാൽ നല്ല അനുകൂല ഫലങ്ങൾ ലഭിക്കും .
ആക്ടിവേറ്റഡ് ഇ .എം ( എ.ഇ.എം) :
ഇ.എം.സ്റ്റോക്ക് ലായനിയായും പ്രവർത്തനസജ്ജമായ ഇ.എമമായും വിപണിയിൽ ലഭിക്കും. ഇതിൽ സ്റ്റോക്ക് ലായനി വാങ്ങുന്നതാണ് ഗുണമേന്മ കൊണ്ടും സാമ്പത്തികമായും മെച്ചം . എന്നാൽ സ്റ്റോക്ക് ലായനി നേരിട്ട് പ്രയോഗിച്ചാൽ ഗുണം കിട്ടില്ല. ഇവ വെള്ളത്തിൽ ശർക്കരയും ചേർത്ത് ഇളക്കി സൂക്ഷിച്ചാൽ പ്രവർത്തനസജ്ജമായ ഇ.എം .ലഭിക്കും.
ഇതിനായി ഒരു ലിറ്റർ ഇ.എം.സ്റ്റോക്ക് ലായനി ഒരു കിലോ ശർക്കര എന്നിവ ഇരുപത് ലിറ്റർ വെള്ളത്തിൽ ചേർത്ത് നന്നായി ഇളക്കി പ്രകാശവും ചൂടും തട്ടാതെ പത്ത് ദിവസം വെക്കണം. ( ക്ലോറിൻ കലർന്ന വെള്ളം ഉപയോഗിക്കാതിരിക്കാൻ പ്രത്യേകം ശ്രദ്ധിക്കണം) . ഇതാണ് എ.ഇ.എം . ഇത് രണ്ട് മില്ലി ഒരു ലിറ്റർ വെള്ളത്തിൽ ചെടികളിൽ തളിക്കാനും ചുവട്ടിൽ ഒഴിച്ചു കൊടുക്കാനും ഉപയോഗിക്കാം.
കൂട്ടിയിട്ടിരിക്കുന്ന ജൈവാവശിഷ്ടങ്ങളിൽ ഇവ തളിച്ചാൽ അവ എളുപ്പം വിഘടീകരിച്ച് ഗുണമേന്മയുള്ള ജൈവവളമായി മാറുകയും ചെയ്യും.
ഇ. എം. കമ്പോസ്റ്റ്:
ഇ.എം . ഉപയോഗിച്ച് വ്യത്യസ്തങ്ങളായ പുളിപ്പിച്ച ദ്രാവക വളങ്ങളും ബൊക്കാഷി ( പുളിപ്പിച്ച ) കമ്പോസ്റ്റുകളും തയ്യാറാക്കാം. ഇ. എം. കമ്പോസ്റ്റ് ഉണ്ടാക്കാൻ ആദ്യമായി അതിനുള്ള ലായനി തയ്യാറാകണം. സ്റ്റോക്ക് സൊലൂഷൻ ഉപയോഗിച്ച് തയ്യാറാക്കിയ അരലിറ്റർ എ.ഇ.എം , മുനൂറ് മില്ലി ശർക്കര ലായനി എന്നിവ 30 ലിറ്റർ വെള്ളത്തിൽ ചേർത്ത് നന്നായി
ഇളക്കുക .
കമ്പോസ്റ്റ് മണ്ണിലുണ്ടാക്കുന്നതാണ് നല്ലത്. കമ്പോസ്റ്റ് ഉണ്ടാക്കാൻ ഉദ്ദേശിക്കുന്ന സ്ഥലം നന്നായി വൃത്തിയാക്കണം. ഈ പ്രതലത്തിൽ ഏകദേശം അഞ്ച് ലിറ്റർ ഇ.എം .ലായനി ഒഴിച്ച് നന്നായി കുതിർക്കുക. പിന്നീട് പ്രതലത്തിൽ അഞ്ച് സെൻററി മീററർക്കനത്തിൽ ചാണകം വിതറുക. ചാണകത്തിലും കുറച്ച് ഇ.എം .ലായനി തളിക്കുക. അതിന് മുകളിൽ ചപ്പുചവറുകളും , കളകളും മറ്റു ജൈവാവശിഷ്ടങ്ങളും കൂട്ടിയിടുക. വീണ്ടും ലായനി തളിക്കുക. ചാണകവും വിതറുക. ഈ പ്രക്രിയ ഉദ്ദേശം ഒന്നര മീറ്റർ വരെ ആവർത്തിക്കണം. ഈ കൂമ്പാരം ഷീറ്റുപയോഗിച്ച് മൂടേണ്ടതാണ്. 20-25 ദിവസങ്ങൾക്ക് ശേഷം ഈ കൂമ്പാരത്തിലെ ഈർപ്പം പരിശോധിച്ച് , കറവാണെങ്കിൽ വെള്ളം തളിച്ചു കൊടുക്കണം. അഞ്ച് കിലോ വീതം എണ്ണക്കുരു പിണ്ണാക്ക് , മീൻ വളം , എല്ലുപൊടി എന്നിവയും ജൈവാവശിഷ്ടങ്ങളോടൊപ്പം ചേർക്കാവുന്നതാണ് . 40 – 45 ദിവസം കൊണ്ട് ഇത് നല്ല കമ്പോസ്റ്റായി മാറുന്നതാണ്.
ജൈവകൃഷിയുടെ ആദ്യ രണ്ടു വർഷങ്ങളിലെ ഇ. എം .ഉപയോഗിച്ചുള്ള പ്രയോഗങ്ങൾ തുടർവർഷങ്ങളിലും നല്ല പ്രയോജനം നൽകുന്നതായി കണ്ടെത്തിയിട്ടുണ്ട്.
കെ. പി. ജയരാജൻ, മാഹി
9446347813
