യുവത്വം നിലനിർത്താൻ പഴങ്ങളുടെ രാജാവ് ദുരിയാൻ

എംകെപി മാവിലായി

തെക്ക് കിഴക്കൻ ഏഷ്യയിൽ കിങ്ങ് ഓഫ് ഫ്രൂട്ട്സ് എന്നറിയപ്പെടുന്ന ഫലമാണ് ദുരിയാൻ . മാൽവേസിയേ (Malvaceae) കുടുംബത്തിൽപ്പെട്ട ഈ ചെടിയുടെ ശാസ്ത്ര നാമം ദുറിയാേ സിബെൻ ന്തിനസ് (Durio zibenthinus) എന്നാണ്.
പഴം ഏതാണ്ട് നമ്മുടെ ചെറിയ ചക്കപ്പഴം പോലിരിക്കും. മുള്ളുകൾ നിറഞ്ഞതാണ് ഇതിന്റെ പുറന്തോട് .മലയഭാഷയിലെ ദുരി എന്ന വാക്കിൽ നിന്നാണ് മുളളുള്ള ഫലം എന്നർത്ഥം വരുന്ന ദുരിയൻ എന്ന പേര് ഈ ഫലത്തിന് ലഭിച്ചത്.പഴത്തിനുളളിലെ കാമ്പിന്റെ ആസ്വാദ്യകരമായ രുചിയും പോഷക ഗുണവും ഔഷധ ഗുണവുമെല്ലാമാണ് ദു രിയൻ പഴത്തിന്റെ മഹിമ. ഒരു ഫലവൃക്ഷമെന്ന നിലയിൽ അടുത്ത കാലത്താണ് ഇത് പ്രശസ്തിയിലേക്കുയർന്നത്.

ലോക രാജ്യങ്ങളിൽ തായ്ലൻഡിലാണ് ദുറിയൻ ഏറ്റവുമധികം വാണിജ്യാടിസ്ഥാനത്തിൽ കൃഷി ചെയ്യുന്നത്.
വലിയ വൃക്ഷമായി വളരാനുളള കഴിവുണ്ട്. പൂക്കൾ നല്ല വലുപ്പമുള്ളതും വെളളനിറമുളളവയുമാണ്. ഇവ തടിയിലും വളർച്ചയെത്തിയ കമ്പുകളിലുമാണുണ്ടാവുക. നാല് മാസങ്ങൾക്കകം ഫലം പാകമാകും. നമ്മുടെ നാട്ടിൽ ജൂൺ – ജൂലൈ മാസങ്ങളിലാണ് ഈ വൃക്ഷം സമൃദ്ധമായി പുഷ്പിക്കുക. ഒക്ടോബർ-ഡിസംബർ മാസത്തോടെ വിളവെടുപ്പിനാകും. മൂത്ത് പഴുത്ത പഴത്തിന് ഒന്ന് മുതൽ മുന്ന് കി.ഗ്രാം വരെ തൂക്കം കാണും. ചക്കപ്പഴത്തിനേക്കാൾ വലുപ്പവും കട്ടിയു ള്ളതുമായ മുള്ളുകളാണ് ദുരിയാന്റെ പുറംതോടിനുളളത്.
ദുരിയാനിൽ ചക്കപ്പഴം പോലെ തന്നെ വരിക്കയും കൂഴയും ഇനങ്ങളുണ്ട്. ഇതിൽ വരിക്കയിനത്തിനാണ് കൂഴയിനത്തേക്കാൾ രുചി കൂടുതലുള്ളത്. മൂപ്പെത്തി പുറംഭാഗം പൊട്ടിത്തുടങ്ങുമ്പോഴാണ് ഇത് ഭക്ഷ്യയോഗ്യമാകുക. ഒരാഴ്ച വരെ ഇത് കേടില്ലാതിരിക്കും.

വിത്ത് വഴിയും ഗ്രാഫ്റ്റിങ്ങ് രീതിയിലും ഇതിന്റെ തൈകൾ ഉൽപ്പാദിപ്പിക്കാം. ഒരാഴ്ച കൊണ്ട് വിത്ത് മുളക്കും .തുടർന്നുള്ള വളർച്ച വളരെ പെട്ടെന്നാണ്. വിത്ത് വഴി വളർത്തിയെടുത്ത തൈ നട്ട് എട്ട് വർഷങ്ങളോളം എടുക്കും കായ്കൾ ഉൽപ്പാദിപ്പിക്കാൻ. എന്നാൽ ഗ്രാഫ്റ്റ് തൈകൾ നാല് -അഞ്ച് വർഷങ്ങൾ കൊണ്ട് തന്നെ ഫലം തരാറുണ്ട്.
നല്ല സൂര്യ പ്രകാശവും ജല ലഭ്യതയും ചെടിയുടെ ആരോഗ്യകരമായ വളർച്ചക്ക് ആവശ്യമാണ്.

ദുരിയാൻ ഫലത്തിൽ പഞ്ചസാര, വിറ്റാമിൻ സി, പൊട്ടാസ്യം, അമിനോ ആസിഡ്, കാർബോഹൈഡ്രേറ്റ്, പ്രോട്ടീൻ, കാൽസ്യം ഫോസ്ഫറസ്, അയൺ , തയാമിൻ തുടങ്ങി ധാരാളം പോഷക ഘടകങ്ങൾ അടങ്ങിയിട്ടുണ്ട്.

ഈ പഴത്തെ കുറിച്ചുളള ശാസ്ത്രീയ പഠനത്തിൽ യുവത്വം നിലനിർത്താൻ ഈ ഫലം പ്രയോജനം ചെയ്യുമെന്ന് കണ്ടിട്ടുണ്ട്. തമിഴ് നാട്ടിലെ ഭാരതീയാർ സർവ്വകലാശാലയിൽ നടത്തിയ പഠനങ്ങൾ കാണിക്കുന്നത് സ്തീകളിൽ ഗർഭധാരണത്തിനായി ദുരിയാൻ നല്ലതാണെന്നാണ്. ഈ ഫലത്തിലടങ്ങിയിട്ടുള്ള ഈസ്ടോജൻ ഹോർമോണിന്റെ ഘടനയോട് സാമ്യമുളള രാസ പദാർത്ഥമാണ് ഗർഭധാരണത്തിന് വഴിയൊരുക്കുന്നത്രെ.

ചെടിയുടെ ഇല, ഫലം, വേര് ഉപയോഗിച്ചുണ്ടാക്കുന്ന കഷായം പല അസുഖങ്ങൾക്കും പ്രതിവിധിയായി ആയുർവേദ ഗ്രന്ഥങ്ങളിൽ പരാമർശിക്കുന്നുണ്ട്.